2018年5月3日 星期四

新聞雜評(一百九十二)

女子稱失500萬首飾兩女童被捕 更新:2018/05/01 20:04

一名女子住在男友家中,失去價值 500 萬元鑽石首飾。警方調查後懷疑,案件與男戶主 10 歲女兒有關。消息指她聲稱不喜歡該女子,將首飾交給一名 12 歲女同學,女同學否認收過首飾。警方以涉嫌盜竊拘捕兩名女童,正追尋首飾下落。
重案組探員早上再到現場,黃大仙龍滿樓一個高層單位調查。消息指單位男戶主是一名髮型師,他和 10 歲女兒及報稱失去鑽飾的女事主同住。 39 歲女事主已婚,與男戶主是朋友,但住在他家中。女事主報稱於三、四月時,發現放在房間內的兩條鑽石手鏈和一隻手鐲不見了,價值約 500 萬元,到星期一晚十一時許報警。
據了解警方初步調查,懷疑案件跟男戶主的 10 歲女兒有關。女童就讀小五,她向警方聲稱因為「唔鍾意個女人」,取去首飾交予一名 12 歲女同學。警方找到該同學,她說沒有收過首飾,警方搜查過她的家亦無發現。據了解,警方以涉嫌盜竊拘捕兩名女童。至於該批首飾至今仍然下落不明,案件交由黃大仙重案組跟進。

1. 本來以為係搵到公屋富戶,卻原來係軟飯王髮型師溝到闊太,女方仲唔嫌公屋狹小,帶埋幾百萬首飾「嫁妝」走去做「入幕之賓」,可見對君非常信任,係 One Life One Love嗰隻...
2. 呢單 case 同陳風水師有異曲同工之妙,一眾笨土有青千祈唔好話「機會不屬於我」,風水師、塞耐設計師、髮型師呢啲靠把口同對手搵食嘅,真係好易有「意外收獲」架!唔信?問吓陶藝才子就得:

***
立法會議員視察高鐵西九龍總站 更新:2018/04/30 20:24

立法會議員再次視察高鐵西九龍總站,民主派不滿政府不讓他們進入內地口岸區的後勤區域視察,其中朱凱廸一度在地庫逗留五小時,拒絕離開。
議員第二次視察西九站,運房局局長陳帆帶隊,上月上任的四位新議員亦有參加。民主派一開始便舉標語,要求視察內地口岸區分界線,港鐵指會模擬乘客路線行走,帶他們買車票、乘車。
去到 B3 離境層,這層有內地口岸區,民主派要求進入內地人員後勤區看看。他們聚集在門外說要進去,七位議員一度坐下做 Facebook 直播。建制派沒有理會,前往月台層,再返到入境層,完成視察。建他們表示滿意安排,批評民主派雞蛋裡挑骨頭。
毛孟靜、陳志全等議員稍後先行離開,留下朱凱廸一個在地庫留守,到下午五時自行離開。

3. 販民搞到玩 Facebook 直播,真係笑咗,唔知收視率有幾高了。嗰個後勤區係咪真係用嚟收埋啲公安武警之類嘅強力部門架?阿票王朱仔有無證據架?唔好好似689咁噏得就噏喎!
4. 「毛孟靜、陳志全等議員稍後先行離開,留下朱凱廸一個在地庫留守,到下午五時自行離開。」笑死!個個做完戲就走,留低朱仔一個!販民真係夠哂義氣,弱智瘋個位睇怕都大把人爭了!
***
歐聯四強皇馬 2:2 拜仁 2018/05/02 06:28

歐聯四強次回合,皇家馬德里主場與拜仁慕尼黑踢成二比二,總成績贏四比三,晉身決賽。
拜仁首回合輸一比二,今場作客來到班拿貝,開賽只是三分鐘就找到入球,兩個回合都是由右閘球員先開紀錄。沙治奧拉莫斯有姿勢,但解不到圍,得益的是甘美治,一射入網。踢得醒神的閘位球員,又怎只有甘美治,都有馬些路送入中間賓施馬頂入,皇馬十一分鐘追平一比一。
拜仁再攻過,利雲杜夫斯基起腳,過不到拿華斯,占士洛迪古斯衝前,亦未能夠補中。烏列治都有表演機會,救出 C 朗拿度的射門,拜仁下半場一次失誤就大件事,換邊後只是大約二十秒,射入空門。烏列治這樣甩漏,結果只能目送皮球入網。
不過去到六十三分鐘,他們又見到少許希望,占士洛迪古斯在這場次回合追成二比二,倒戈的他沒有特別慶祝。皇馬借將第一下射門被擋到,不過他夠機警,再走上前,射穿拿華斯大小龍門,拜仁總成績仍然落後,一於再搶攻,但都無法再入球,拿華斯好身手,無再失球。這場維持二比二完場,皇馬總比數就贏四比三,連續三屆踢入決賽。
5. 拜仁兩大主將洛賓(Arjen Robben)與及列貝利(Franck Ribéry)年事已高早就講咗好幾年,但球會買人繼任卻遲遲都未有大動作;比較近期的已是數年前由祖雲達斯借用至買斷的京士利高文(Kingsley Coman),奈何呢位細路潛質雖然不錯,但人又易傷,結果同2R一齊時傷時踢,表現大打折扣。而德國球會的股權架構更是不歡迎蘇俄中東蝗國等油王土豪入股,結果就係拜仁盤數靚則靚矣,但在現時鬥燒錢買人的時勢,卻是吸引不了球星加盟,以致容易成為歐洲賽「陪跑份子」。跟歐洲豪門鬥癲鬥傻以天價買球員以求打好歐洲賽,定係保持初心維持日耳曼(?)球會的「純正血統」,真係叫人搲爆頭。不過以魔術師自己來說,都係贊成「保持初心」多啲。
6. 有些工作就係講到明出錯唔死得人,即係好似前鋒咁,門前失機最多都係羸唔到;但後防,尤其是係門將,就萬萬不能出錯,一出錯就容易由贏變和,由和變贏。拜仁對皇馬兩個回合都有防守上的嚴重失誤,以致贏了形勢輸了波,足證全場保持 focused 與及 attentive to details 係幾咁重要,錯咗亦唔係打個哈哈就可以遮暪過去,好似烏列治(Sven Ulreich)咁,無論本季代替受傷的紐亞(Manuel Neuer)把關,表現一直有進步,但錯一次就隨時俾球迷記你一世(魔術師尋晚真係睇到0哂嘴)。
7. 又,斷估杜利素(Corentin Tolisso)回傳乏力,烏列治棄關出迎企圖接住個波,但又忽然想起回傳只可用腳踢;腦袋一時轉不過來以致大出洋相。即係咁,就算用手接回傳波,最多都只係判罰間接自由球,可以排人牆,皇馬未必藉機便會入波;兩害取其輕,當場「止蝕」用手接才是王道。所以話,做投資可以訓練人的決斷力,對做任何事都有益處。

9 則留言:

  1. 嗰晚碰巧訓唔着,睇咗上半場。如果馬些路球手球判十二碼,上半場拜仁入多球應該會好打啲。

    施丹其實都有料啦,呢兩年都無點買大牌,巴爾都夠膽變非必然正選,C朗年紀漸大亦都大膽輪換。近年德甲競爭下降,拜仁又再一枝獨秀,平時太輕鬆亦會影響出去打硬仗--所以我斷言法甲提升水準之前,巴黎就算買幾多人都攞唔到歐聯的...

    不過皇馬決賽對手係利物浦,牌面皇馬係上兩屆冠軍老師傅,卻撞啱對手係神經刀仲要中立場一場過,似乎三連冠有啲窄。

    回覆刪除
    回覆
    1. //如果馬些路球手球判十二碼,上半場拜仁入多球應該會好打啲。

      我都唔明點解歐聯唔用視像裁判, 我睇德甲, VAR run 得都幾好; 反而底線裁判穿形同虛設,未見過邊波底線裁判會有貢獻.

      //巴爾都夠膽變非必然正選,C朗年紀漸大亦都大膽輪換

      仲有連占士都借埋俾拜仁...

      //牌面皇馬係上兩屆冠軍老師傅,卻撞啱對手係神經刀仲要中立場一場過

      我唯一唔老嚟的就是高普, 呢條友個格太衰, 影衰哂優秀的日耳曼民族.

      刪除
    2. //VAR run 得都幾好

      我想講,蝗超今個球季引入咗VAR,以我所知應為亞洲首個聯賽咁做...

      //連占士都借埋俾拜仁...

      J洛係皇馬一直不受重用.

      //我唯一唔老嚟的就是高普, 呢條友個格太衰

      你唔妥啲咁激情既人嗻 XD

      刪除
    3. //蝗超今個球季引入咗VAR,以我所知應為亞洲首個聯賽咁做...

      蝗民很能適應接受新事物, 相比起來傷民保守得太多(淨係睇證監咁Q多保障投資者的條例就知, 佢地簡直就係當投資者係細路一樣).

      //J洛係皇馬一直不受重用.

      有傳話安76提係當日J洛轉會的推手,不過估唔到J洛傷完無踢得兩場, 76就被炒了.

      //你唔妥啲咁激情既人嗻 XD

      妖, 又被摩摩睇穿.

      刪除
    4. 今年利記有機。

      睇返拜仁對皇馬果兩場,皇馬一來唔算快,二來偏向死守中路,三來兩閘又成日走到好前,後面大把空位俾沙拿文尼左右兩邊快放。

      至於拜仁,只可以話有勢但冇波入,輸個龍on9就真係冇計。

      刪除
    5. //兩閘又成日走到好前

      乜馬些路系閘嚟既咩 XD

      皇馬打一板一眼既隊的確好強,但利記強在隊波根本無得估...

      如果利記今次贏咗,而美斯C朗攞唔到世界杯的話,金球獎都好大機會系沙拿攞。

      刪除
    6. //拜仁對皇馬果兩場

      拜仁有返當年三冠王的機動性, 希歷基斯應記一大功.

      //輸個龍on9就真係冇計。

      紐亞由上年對皇馬傷到依家, 真係一場波遺禍兩年.

      //乜馬些路系閘嚟既咩 XD

      佢似係自我家義的「自由人」多啲 XD

      //利記強在隊波根本無得估..

      又幾合高普的大情大性.

      //而美斯C朗攞唔到世界杯的話,金球獎都好大機會系沙拿攞。

      都好, 唔好成日都係得呢兩條友玩哂.

      刪除
  2. //卻原來係軟飯王髮型師溝到闊太

    闊太時時都去set頭一去就嗰幾兩個鐘,接觸髮型師時間真喺唔少,一定多過好多其他行業。
    闊太喺自己去報案,定喺有冇同嗰男人同個女了解吓傾過先,始終一嘢就咁樣揚出去對所有人都唔喺咁好

    //留下朱凱廸一個在地庫留守,到下午五時自行離開。
    有冇用鐵鍊先,冇?跌咗WATT喎

    回覆刪除
    回覆
    1. //觸髮型師時間真喺唔少

      闊太對髮型師真係一往情深,幾百萬首飾放響間公屋度都得。

      //闊太喺自己去報案,定喺有冇同嗰男人同個女了解吓傾過先,始終一嘢就咁樣揚出去對所有人都唔喺咁好

      闊太似乎同個繼女一早有牙齒印喇,所以即使會「贏咗場交輸咗個家」都在所不惜。

      //有冇用鐵鍊先,冇?跌咗WATT喎

      膠鐵柱男 XD

      刪除