2018年5月22日 星期二

Hea 裝95萬

主持人話要抄鎢絲 sir 嘅概念「夜晚訓咗,睡房幾大已不重要」並唔容易,究竟係咪暗串緊佢架(35:44—46:39)?
樓盤傳真 2018/05/05 2018/05/05 23:13

五月分新盤,將以一至兩房細單位主導,屯門御半山,雖入於二線位置,但竟然開出一線破頂呎價,新地摸底入地、摸頂賣樓,並繼續利用高成數按揭推人入市。但樓價高兼六月可能加息,用家面對雙重風險。 
居屋王富榮花園最平兩房放盤,綠表價也要 550 萬元,竟與補價後估值相約,居二價已經直逼自由市場。 
信和逸瓏海匯,鄰近消防局,需有緩解噪音裝置,驗樓單位 704 呎,窗設計不便打開,影響通風效果。 
銀禧花園兩房單位,改動間隔後,客飯廳加大,飯廳甚至夠空間加建開放式廚房。單位用色配合採光,加強空間效果
鎢絲 sir 的設計主要係依照戶主的要求:佢地招呼朋友的時間比較多,所以客飯廳要有較闊落的空間;戶主又鍾意下廚,所以需要一個開放式廚房(唔怕薰到全屋都係油煙?),以擴闊空間:

原裝間隔有點古怪,主人房的門口位無故突出(左上),於是慣於將整間屋所有牆壁砍掉重練的鎢絲 sir 便將主人房的牆身拆去,改成與門口位拉直,再從廁所偷位做衣櫃位;而廁所再從書房偷位做淋浴間;廚房牆係主力牆無得拆,頓變慘慘豬的鎢絲 sir 便將整套廚櫃搬出廳,原來的廚房就用來做雜物房和洗衣房(右上)。於是客飯廳便只得幾件單薄的宜居家俬,非常之有空間感(左中)。電視櫃後的牆壁最近窗最受光,所以用上深灰色,然後向大門口伸延,由淺灰到白色,以漸變色的效果配合返較暗的區域就用較淺的色調(右中)。書房門和廁所門用上半身磨砂玻璃,有啲似政府舊式建康院的格局,透光得嚟大緊便或者一面睇AV一面打JJ的身影都會若隱若現(左下)。近門處做了到頂鞋櫃,一貫所有空間都不要浪費的作風(右下):

由於開放式廚房沒有牆壁,只能以地磚分區(左上),廚櫃用色以淺色調為主,令到周圍都光啲,擴闊空間感(右上);打開廚櫃,減去預留的來去水位,空間有限(左中)。雖然鎢絲 sir 當然死口唔認,仲話個廚櫃可以擺到好多嘢,但身體卻很誠實,無厘頭又做個工業風的金屬架玻璃吊櫃(右中),話就話增加通透感,但好使唔好用:唔好話擺放重物驚玻璃會爆裂,而且櫃內東西又唔可以亂放,否則俾人望穿會好核突。原來的廚房位就用來擺雪櫃和洗衣機等大型電器(左下、右下):

話口未完,鎢絲 sir 便自打嘴巴:原來客廳個窗係望住對面屋(左上),睇怕都要長期落簾,所以鎢絲 sir 連燈槽都整埋(右上),咁說好的漸變色牆壁反光效果呢?呢間咁嘅蝸居,乜景都無,戶主有乜好 proud of,仲要成日請朋友上來坐煮嘢食分享呢?為咗擴闊個客飯廳招呼朋友(但凳都無多張),睡房便細咗好多(「夜晚訓咗,睡房幾大已不重要」),就算係衣櫃都疑似係紅蘋果的罐頭製品(左中、右中)。書房無入牆傢俱,hea 住做有彈性,第日有咗BB都可以方便變身BB房(左下)。廁房有淋浴間,不過就無浴缸,唔係咁BB friendly,而且馬桶無端端整高一格,容易叫人仆親(右下):

又查實,依照鎢絲 sir 「訓咗個睡屋有幾大都唔關事」的邏輯,戶主買咗樓做樓奴,逼住日日返工賺錢還返俾銀行,搞到間屋平時都無人用,咁個客飯廳整到咁多寬闊又有乜嘢用呢?不如唔好整喇笨!

13 則留言:

  1. 點解呢啲戶主一個二個都咁鬼鍾意呼朋喚友?
    尤其是間屋又唔係特別大

    回覆刪除
    回覆
    1. 話比人知用成六球買樓再用成球裝修,威盡朋友圈

      刪除
    2. //尤其是間屋又唔係特別大

      係我直程覺得乏禮,點夠膽招呼朋友?

      //威盡朋友圈

      柒盡裝修界就真 XD

      刪除
    3. 我都好奇怪, 而家唔係興用屋苑會所咩?

      刪除
    4. 成日都話戶主喜歡煮食, 乜唔係依家興無飯夫妻嘅咩? 港女又識得煮乜啊!

      刪除
  2. Curtains not included. Amazing!

    回覆刪除
  3. 冇咁大間屋真係唔好請鎢絲sir

    回覆刪除
    回覆
    1. 鎢絲sir下下玩全拆, 間屋愈大佢愈開心! 發達咯!

      刪除
  4. 香港人都唔睇書既,要個書房黎做乜?

    回覆刪除
    回覆
    1. 依家連漫畫都上網睇,整間網吧好過!

      刪除
  5. //無厘頭又做個工業風的金屬架玻璃吊櫃(右中),
    擺碗碟就會砰砰澎澎聲,夠晒嘈。

    //鎢絲 sir 「訓咗個睡屋有幾大都唔關事」的邏輯
    呀鎢絲 sir ,睡房唔喺一定用嚟瞓覺㗎 XD--就算真喺,點解唔可以話瞓覺時間佔三分一,點都多過喺廚房。

    回覆刪除
    回覆
    1. //擺碗碟就會砰砰澎澎聲,夠晒嘈。

      個吊櫃咁高要來放碗碟? 豈不是要擔凳仔? 危唔危險啲呀?

      //睡房唔喺一定用嚟瞓覺㗎 XD

      游小三:「有睡房但無地方扑嘢!」

      刪除