2018年6月12日 星期二

公屋豪裝50萬

租者置其屋真係威權正苦塞錢俾公屋居民的一大德政呀,樓價以倍數飛升不特止,單位面積仲大過納米新樓多多聲添(35:33—46:52)!
樓盤傳真 2018/05/26 23:19

白石角新發展區,預算有近 8,000 個新單位陸續落成入伙,預算人口逾 2 萬人,另加 3 萬就業人口來往科學園,但運房局一再否決增設鐵路站,並反建議提高單位對單車泊位比例至 10:1 。另拆解嘉華新盤嘉熙高溢價開盤,但前面海景受阻擋、後面接收吐露港公路噪音。
市建局收購價屢創新高,間接確認同區樓價升勢。市區重建概念如何影響區內二手交投?今集到充滿憧憬的土瓜灣區,參觀罕有洋樓放盤。
九龍城津匯,成為驗樓近七年來的低分王,廚櫃門甩、層板跌、渠口欠蓋,污水溢出。但鄰近未來沙中線土瓜灣站,加上開則以細取勝,不乏投資者捧場。
鑽石山鳳德邨公屋,業主 1998 年以 25 萬買入,如今綠表價市值超過 300 萬元。業主花 50 萬元全屋大裝修,用同一淺木色貫穿全屋,將公屋大變身。
屋主20年前以25萬買入市區公屋,現時樓價升了10倍,綠表價300萬都唔止;依家一家人變得一個人住(離婚?喪偶?),當然有錢便是任性:

本案最奇怪的地方就是廁所有條渠,仲要留返生口做維修,搞到廁所的一角有個三角位唔用得(左上)。設計師將原來三尖八角的廁所拉直,可是馬桶要對正廁所門,直沖大廳,不吉(右上)。整完之後,個廳便正常好多(左下)。廁所內籠空間比較窄,不過一個人住無乜所謂喇!

拉直了的廁所亦提供了一幅牆,可以擺張摺枱及電飯煲,簡簡單單好一餐唔好又一餐(左上、右上)。廚房擴充成開放式,咁大個廚房咁細張食飯枱,比例上有點落差(左中、右中)。廚房工作枱面伸延至露台位便開始收窄,保持通道足夠寬闊,就連肥嘟嘟記者妹同埋 Dyson 吸塵機都放得落(左下);廚房的盡頭係露台,放了洗衣機,可隔絕洗衣時的聲響,又方便晾衫(右下):

公屋單位最大的問題就是窗戶少,採光不足,本案亦不例外,設計師要以大量天花燈槽補救(左上)。單位大門側有落地大櫃,可以用來放鞋與及大型家電(右上);大櫃對面就是那張迷你摺合食飯枱,一面食飯一面對住電飯煲,好很有獨居老人 feel(左中)。公屋戶多是傳統住戶,設計點摩登都好,通常都會有個神位;今次電視台連人地列祖列宗都影埋出嚟,原來屋主姓謝。神位隔離就係通往睡房的隱藏門(右中)。客廳最吸晴的便是那套5.1.4 全景聲影迫系統,玩埋釘腳都真係幾 pro,仲有左右前置喇叭頂上個兩枝子彈型喇叭仔(?),魔術師都唔知有乜作用。電視機係 Sony 3D 2013 年旗艦,魔術師亦係用同一型號,可謂英雄所見略同(左下、右下):

公屋的好處就是可以任由戶主間房;於是設計師便將原來裝潢的兩間房打通成為特大主人房(左上、右上)。通過客廳中窄窄的暗門,就是主人睡房;睡房門兩旁造空心櫃,減輕壓逼感(左中、右中)。白色落地衣櫃,對窗的書枱,再由書枱延伸,跌落一級變成床頭櫃,都無乜好講;係床尾電視機電線應該要收好,就咁放下來有如套索,屬自縊之象,不吉(左下、右下)。

這就是50萬豪裝公屋的落成圖了(上:裝潢前、下:完工後);整間屋無乜特別嘢(影音設備係屋主自己的),尤其是啲木皮傢俱,款式頗為老土,真係唔太識欣賞。

14 則留言:

  1. 第一位!
    沙中線概念呢件野如果唔係公屋起碼賣10,000,000
    多謝香港政府

    回覆刪除
    回覆
    1. //沙中線

      成日delay,心血少啲都被激死。

      刪除
  2. 坐到沙發隔離的沙地。
    居屋梗係德政啦,3XX呎大過納米樓多多聲不突止,無坐上坐廁後關唔到門的廁所,又無三個工作平台先盞鬼嘛!

    回覆刪除
    回覆
    1. //坐到沙發隔離的沙地。

      唔係沙圈就得。

      //居屋梗係德政

      我就係典型的公屋轉居屋再轉私樓的「既得利益者」XD

      刪除
  3. 最近各位搶沙發既熱情真的非常厲害
    坐在沙發隔離的沙地邊沿之綠洲茶客上
    XD

    回覆刪除
  4. 睇嚟都似係獨居阿伯屋。
    公屋又dyson 又音響又按摩椅又五十萬裝修…
    嗰睡房打通之後唔細,張床其實可以擺得好少少唔駛頭對住窗啫。

    回覆刪除
    回覆
    1. //睇嚟都似係獨居阿伯屋。

      我都覺.

      //張床其實可以擺得好少少唔駛頭對住窗啫。

      其實好少人真係會在室內設計時考慮到風水設計.

      刪除
  5. 公屋都可以改開放式厨房咩?

    回覆刪除
    回覆
    1. 租者置咗其屋, 真係關人個關了.

      刪除
    2. 租置同居屋一樣,即使未補地價都當賣左俾住戶,所以整大龍鳳都無人會理,更何況加多個「白居二」,搞到未補地價的租置都水鬼升城隍,真係始料不及!

      刪除
    3. //更何況加多個「白居二」,搞到未補地價的租置都水鬼升城隍

      我都係既得利益者 XD

      刪除