2018年6月22日 星期五

To 整 or not to 整

話說上星期二魔術師Call了師傅搭完棚之後,本來便預定三零冷氣會上來魔術師家中做檢查。誰知冷氣技工朝頭早唔來,係都要等到下午才來工作;點知一食完飯天文台就話雷暴警告,技工打電話嚟話唔出得棚做嘢...KLM,好在魔術師同包青天上司講好,拎定公司部手提電腦返家工作,無需要請假,否則豈不是白等一天仲要無端端浪費一日假期?

好喇,魔術師打去三零冷氣再約時間,接電話嗰位哥仔竟然話星期一三五先會嚟屯門工作,但上星期五已 book 到滿,今個星期一又公眾假期唔使做,即係要等到今個星期三先嚟得。
DKLM,落一場雨竟然就要拖魔術師一個星期,搭咗個棚仲要無人做嘢!
點知,上星期五朝頭早,冷氣技工竟然打嚟問魔術師下午是否可以開工!魔術師返咗工,又點會有人坐係屋企等候呢?
而最頂癮嘅就係,今個星期二冷氣技工又打嚟問魔術師下午是否可以開工!佢公司唔係話星期一三五先至做屯門單嘅咩?
頂,魔術師都唔知佢算唔算係服務態度良好,要約又唔早啲約,係要等魔術師返咗工先來約,唔通個天都唔想魔術師整好部冷氣?
終於,等到星期三,魔術師又同包青天上司講好在家工作,便終於等到冷氣技工大駕光臨。
經過檢驗後,技工判定係漏雪種,需要再測試在哪兒漏,然後換喉維修,報價$3,570。
「如果係大漏先測試到,細漏測試唔到,變相無得整。計我話不如換機喇!」技工也不知是否怕維修起來太辛苦抑或要跑數,竟然建議魔術師換機。
其實部機本體無壞,散熱又無壞,就咁拎去堆填是否太浪費了?魔術師又唔係鎢絲 sir,係又拆唔起又拆!
魔術師上網查找,如果換部大金1匹變頻冷暖機,最 top 型號要$17,220,大眾化型號就要$5,090。最大的問題,睡房呢部新機會同大廳部三零唔夾款,大金係白色,三零係銀灰;同時,由於大金的機身跟本來的三零唔同尺寸,換機後牆身會痕跡露出來,不太美觀。

如果魔術師換返同樣的三零型號,就要$9,050;雖然話個位可以 fit 返哂個裝潢,但魔術師部冷氣原本就無壞,換返部一樣的把鬼咩?

不過,無論係大金定係三零,點都要整多筆安裝費,要多千幾2千蚊(雖然棚已搭,可以慳返$3,000):

所以呢,睇嚟魔術師都會嘗試去修理先,真係整唔好再買機,$3,570修理費就當買個冷氣機 call option 喇!
***
圖片來源:
Ecox.com.hk, retrieved on 20 Jun 2018
***
伸延閱讀:
Call師傅

9 則留言:

  1. 依家D大牌包攬技工,D服務好差。另一家信xD技工,都係難服侍。呢D就係冇競爭既問題

    回覆刪除
    回覆
    1. 係囉,我搵原廠睇主要係驚要配原廠零件,如果只係漏雪種要換喉,又的確可以摒街鋪搞定。

      刪除
  2. 漏雪種+洗冷氣我搵街頭街尾攪掂。唔使搭棚。上次兩年前整1200攪掂,今日book聽日上門。(不過僅限明知之後只會用一年會大裝... 同埋前提係我區有半條街都係整冷氣... )

    回覆刪除
    回覆
    1. 哈哈,等我都去問下街頭街尾鋪頭先!

      刪除
  3. 變頻+冷暖,多兩隻香爐多兩隻鬼。換分體好煩,冬天唔怕凍的話買淨冷機種算了。

    漏雪種收$3,570, 把刀都好利下。一般大型連鎖電器鋪買新機基本安裝包五尺喉都係收兩千銀左右...

    回覆刪除
    回覆
    1. 我自己都好怕暖氣,以前冬天去北方或日本出trip夜晚會乾到訓唔到,反正我城凍極有限數,所以都情願挨下凍算了。

      刪除
    2. //多兩隻香爐多兩隻鬼。

      但係我又唔多鍾意另外要插電的暖爐, 淨係要收納都唔講得笑.

      //一般大型連鎖電器鋪買新機基本安裝包五尺喉都係收兩千銀左右

      因為大型連鎖電器鋪凡主機 mark 高咗價呢.

      //反正我城凍極有限數,所以都情願挨下凍算了。

      舊年我城連續好幾日凍到黐肺, 就係嗰幾日要開暖氣囉!

      刪除
    3. //舊年我城連續好幾日凍到黐肺, 就係嗰幾日要開暖氣囉!//

      咁就要揾人暖下床被啦啦!

      亞力士

      刪除
    4. D, 咁都有位俾你入到!! XD

      刪除