我的掏寶初體驗

今年（２０２１年）立春在２月３日，風水上就是轉流年的日子，理論上陽宅放置風水擺設就是要在立春開始做。話說魔術師家中的廚房位又係先天財位八白土（艮卦，少男），廚房屬木火（古時以柴生火），火生土都算有利財運；但今年七赤金（兌卦，少女）飛到廚房位，土生金，金洩土氣（少女洩了少男的Ｘ...），而且七赤金亦可指盜賊、口舌、官非，莫要洩了財氣給賊人，理應放返個動水裝置（無理由廚房水龍頭長開），以洩去金的煞氣（金生水）。

不過由於魔術師實在太懶去找，拖吓拖吓到６１８支付佬大賣淘寶廣告，話有信用卡免手續費優惠，又想起了沙田堂定姐家中都有個類似的擺設，話係掏回來的東東，於是魔術師便破戒試玩。

魔術師今次選的是一個流水盤景，連霧化加濕裝裝置；擺係廚房係有啲 odd，不過下年的擺位又會唔同的了。揀完貨物同埋付款方式後，魔術師便懶醒咁揀咗「官方集運，跨境免郵」，基本上就係郵寄一條龍服務，本來以為可以安在家中乜都唔使理等收貨...

但，世事又點會盡如人意呢？

結果就係「系統」幫魔術師揀咗個離家甚遠的自提點，仲要無得轉自提點，去到山旮旯咁遠都咪話唔煩：

件貨原來都重好幾 kg，個箱 size 唔細，方方正正，又要行天橋又要搭車，拎住行嚟行去都幾唔方便：

（口罩盒係用來比大細之用。）

開箱就知道點解個箱會咁大，原來係有勁多嘅發泡膠，幾乎肯定唔會打爛件貨，但感覺上就唔係太環保。又要安全又要環保都係一個難題：

箱內有主體、擺設配件、電源、水泵、霧化器、說明書等：

安裝程序十分簡易，依照說明書做就可以了。裝好後又流水又在煙霧，真係仙氣十足（下年七赤金去到大門口，就唔使擺廚房咁突兀了）：

掏呢個盤景已經係算是超順利的了，魔術師另外仲掏咗套六帝錢，撳撳吓落錯單唔記得用張６０數人仔優惠劵不特只，仲無選到「官方集運，跨境免郵」，ＯＮ９９等咗幾日只見件貨停咗係集運倉唔郁，先識得用支付佬交跨境段運費，真係巷燦一名！