錯是永恆 與其激氣不如食餐好

真係在現公司最後倒數幾日都要俾班電車仔激一激，成日都話呢樣做唔切，嗰樣又話錯俾個客搵到好多 bugs，搞到ＰＭＯ小組投訴上去ＣＥＯ，另外某部門 Director 就話魔術師底下某小組同光頭Ｍ小組無溝通，搞到咁鬼多甩漏。

魔術師抵唔住頸用 email 話咗個小組長Ｃ一嘢，要佢整定個 list，話某些已知答案自己可以下決定的 configuration 就可以確定喇，使乜唔處理、留白搞到做錯嘢呢；點知小組長Ｃ可能見魔術師「人就走茶就涼」，竟然仲駁嘴頂返轉頭話「thank you for running the team smoothly for so long.  We are working as a team to continuously improve the process. We are going to have a meeting for this purpose.」，講埋啲虛到唔虛嘅嘢來遮醜。

好在看守領隊指派的跟隨魔術師學師接手的新仔Ｒ出來打圓場，都叫阿Ｃ整返個 issue list 出來 review。魔術師於是便順水推舟，寫返個 thank you note 淨係 copy ＣＥＯ同看守領隊，讚吓新仔Ｒ等佢有返啲 credibility。

然後夜晚黑返到屋企，就收到現時僱傭兵艇仔公司的「糧單」：話說自從舊年返咗呢份工由艇仔公司出糧之後，每個月都係有糧出但無糧單的，出糧就靠 bank transfer，有幾個月連「Salary」呢個 remark 都無，如果要申請大額借貸例如買樓按揭隨時有問題。

今次魔術師趁離職一次過叫艇仔公司將所有糧單補返俾魔術師。點知一查核之下就知出事，事緣就係強積金僱主供款部份，雖然話頭６０日僱主「唔使供住」，但只要魔術師返滿６０日，僱主就要從第１日供起。結果，雖然實際上強積金公司有 show 到從 day 1 到 day 60 的供款額，艇仔公司卻入錯數，頭６０日唔使供就當無供過，糧單亦無反映，搞到強質金結單同糧單條數唔夾。

魔術師寫 email 叫艇仔公司更正，竟然仲俾佢個人治部話返轉頭，話強積金僱主供款部份同報稅無關，魔術師拎住強積金公司的 statement 做證據就可以了，糧單無乜用的。做嘢又錯又求其，真係俾佢激死。

（圖片來源：強制性公積金計劃管理局 > 強積金制度 > 強制性供款 > 僱員, captured on 4 Aug 2022）

但，錯得最離譜的竟是新公司的人治部。唔知係咪又用埋啲唔知頭唔知路的外判僱傭兵小妹妹做 HR coordinator，早前走來「幫」魔術師跟進入職事宜，竟然

１. 合約（及其他入職文件）打錯咗魔術師的身分證號碼。

２. 魔術師一早向新公司的求職系統就提交了學歷申報，點知人治妹妹就連魔術師的學歷都可以 copy 錯，將魔術師的保你大IＴ碩士學位寫成

（ｉ）「食Ｃ大的IＴ學士」（變咗有鄉大同食Ｃ大兩個學士學位）同埋

（ｉｉ）「食Ｃ大的IＴ Postgraduate diploma」

然後將呢份入職文件（身分證號碼當然是錯的）要魔術師簽名，再在入職時連同證書正本給上級核實。錯到咁，魔術師點簽呀？話佢錯叫佢改，阿人治妹妹就永遠只係「講嗰句改嗰句」，完全唔會由頭睇一次睇吓有無重覆錯誤。魔術師不禁要問，人治妹妹發出呢啲文件之前，佢上司有無睇過㗎？魔術師是來返工，唔係幫佢 debug 的喎！

＊＊＊

總之，依家啲人做嘢總好似好低標準咁，求求其其得過且過（唔怪得之會演唱會會跌爆芒），１ take 過無錯完成似是奢求。可能魔術師的要求真係太高...

不過，話雖如此，魔術師這晚找到了一家新的外賣餐廳，唔理黃藍隻烤雞（配炒菜加麻辣汁）又真係幾好味！只要有好嘢食，一切唔開心都可以一掃而空！

（圖片來源：Openrice > Chicken Factory (御海灣商場), captured on 3 Aug 2022）

＊＊＊

伸延欣賞：