2022年12月5日 星期一

一王雙后之與 Yoyo 和 Chloe 對話

這天下午當魔術師正處理緊12月份投資理財交易時,手機響了起來,是3字頭的電話,直覺叫自己熄掉了就好,但反正做得悶悶哋,就接來聽吓,反正又不會被電騙呃咗去賣豬仔的。

於是魔術師接過電話,另一邊傳來一把女聲:

囡: Hello 你好,我叫 Yoyo,想問你幾個有關投資習慣的問題,做完問卷之後會送返超市禮券俾你。

(圖片來源:【全民造星4】22歲Yoyo仙氣滿瀉實力出眾獲讚全能型選手 花姐誇下海口:「放棄MIRROR都要簽佢」, U港生活 2021.11.12。圖片跟文中「Yoyo」無關。)

魔:你係邊個單位㗎?

Yoyo: 唔使擔心,我哋只係做個簡單關於理財習慣的問卷,問4條問題就可以獲得超市禮劵。

魔:你係邊個單位㗎?

Yoyo: 請問你有無儲蓄習慣?

Yoyo 自說自話,問咗第二條問題。

魔:你都唔識我,點送超市禮劵俾我?

Yoyo 自說自話,問咗第三條問題。

魔:點解你唔答我問題,而我又要答你問題嘅?

Yoyo 自說自話,問咗第四條問題。

魔術師今次唔出聲。

Yoyo: Hello? 我聽唔到你嘅答覆。我叫 Yoyo,只係想問你幾個關於理財習慣的問題。

然後 Yoyo 又重覆了問題。

魔:點解你一直都唔回應我嘅?

Yoyo: 請問你每月收入係幾多?俾個大概嘅數我得㗎喇!

魔:你係咪 AI 嚟㗎?點解你淨係識得讀稿嘅?

Yoyo:多謝你嘅回應,我哋遲啲會送返超市禮券俾你㗎喇!

跟住「Yoyo」就 cut 咗魔術師線,全程無乜個魔術師姓乜,亦唔知點樣俾到張超市禮劵魔術師。呃人都要俾啲誠意先得㗎!

當然「Yoyo」亦無留低聯絡電話。

基本上呢個電騙在開頭都呃到吓人,起碼背景聲寧靜,「Yoyo」把聲亦相當溫柔,好似好 pro 咁。不過弱點就係「Yoyo」並唔係真.AI,唔識同人互動,只係識自說自話,被訪者出聲就當成答咗問題,proceed to next question;被訪者唔出聲就代表有疑惑,「Yoyo」就會出安慰 script 然後再重覆問題。

「Yoyo」呢個程式雖然幼嫰,但魔術師都係第一次見,覺得非常有創意!而且俾着頭腦差一點的人或者係廢老接聽,就真係可能會俾「Yoyo」呃到!

正當魔術師在疑惑究竟是誰開發出「Yoyo」來騙人,又慎防唔記得,要將上述「電騙新點子」寫下來的時候,big boss 現身了!

又係3字頭的電話,又係同 Yoyo 一樣的女聲。

Yoyo:Hello 你好,我叫 Chloe,係代表宏利強積金打嚟,想問吓你有無收到宏利強積金的月結單呢?

(圖片來源:Chloë Grace Moretz Facebook。圖片跟文中「Chloe」無關。)

原來又係魔術師最討厭的保險從業員!

魔:咦,乜你唔係 Yoyo 咩?我都無宏利強積金,點解會收到月結單呀?你電腦無 record 嘅咩?

Chloe:多謝你嘅回覆,我哋會有投資顧問幫閣下整合同管理你嘅強積金組合,唔知你會唔會有興趣約出嚟傾吓呢?

魔:你係咪機械人嚟㗎? 

Chloe:不如我同你約個強積金顧問見面吖,唔知地鐵沿線邊個站方便你呢?

魔術師又試唔出聲。

Chloe:你放心,呢個唔係電話錄音。我係代表宏利打嚟嘅,我叫Chloe。唔知唔知地鐵沿線邊個站方便約出嚟見面呢?

電話錄音竟然否認自己係電話錄音,又真係幾黑色幽默!

魔:你去死喇!

Chloe:好呀,我哋同你約個強積金顧問見面吖,你大概幾時得閒?

魔術師心想,可能話「想約你出嚟九龍塘爆房扑嘢」,「Chloe」都會話「好吖!幾時約出嚟?」。不過為免被「宏利」(都唔知係唔係真,「Chloe」自說自話信唔過)告話魔術師「性騷擾」佢哋個「Chloe」,都係忍住將說話吞回肚裡,cut 線算數。

11 則留言:

  1. //Chloe:好呀,我哋同你約個強積金顧問見面
    //「Chloe」都會話「好吖!幾時約出嚟?」
    Chloe淨喺幫人約顧問㗎咋,真喺約出咗嗰hehe顧問點算XD
    如果播願X光俾chloe聽,雖然冇得T字手勢,但喺會唔會快快就cut線呢?


    回覆刪除
    回覆
    1. //Chloe淨喺幫人約顧問㗎咋
      //「想約你出嚟九龍塘爆房扑嘢」

      指閒想約 Chloe 做 PTGF 都唔得~~~ XD

      刪除
  2. Hahaha, I had a good laugh.

    Old BJ

    回覆刪除
  3. 回覆
    1. 個電話錄音識得依被訪者的反應做應對,都算係「創科」㗎喇!

      刪除
  4. 我最近收到幾次暈利MPF月結單電話, 我一句"無用十幾年啦喎, 點收?" 阿Chole(?)就好職趣咁收左線

    回覆刪除
    回覆
    1. 我都收到過,應該係真人 call。呢知保險團隊,同一份 script 可以各有各做,有啲 sales 傳統啲用真人白墥,有啲 sales 就搵 Yoyo 同 Chloe 都說不定。

      刪除
    2. 講開我尋日FWD咗篇文俾D細路睇(有人學緊AI),跟住我哋討論點分佢真人定AI,然後話下次有junk call係咪應該聽返個,然後一齊驗證。估唔到最細嗰個話:梗係唔好啦,萬一係KK園區的真人,你咁玩法可能累到佢㗎!

      刪除
    3. //萬一係KK園區的真人,你咁玩法可能累到佢㗎!//
      居然仲有咁好心既人 T_T
      --Dogdogchi

      刪除
    4. //跟住我哋討論點分佢真人定AI

      其實 Yoyo 同 Chloe 個 logic 好渣,只係識得認對方有出聲就當係答咗,proceed to next script;對方唔出聲就係懷疑,加以安慰並 repeat script。由於Yoyo 同 Chloe唔識得回應,只識自說自話,好易拆穿,唔算係咩 AI.

      //居然仲有咁好心既人

      呢啲叫做家教!

      刪除