1. 雪村
|
| （圖片來源：Openrice > 餐廳 > 香港 > 尖沙咀 > 雪村 > 相片, captured on 14 Feb 2024） |
一月份同靚姐姐撐枱腳兼慶祝澳洲遊勝利完成，便到 K11 Art Mall 這所日式餐廳去食日本嘢（唔怕幅射？）。只見一眾海鮮都真係非常新鮮，個清酒煮蜆真係連汁都飲埋。正呀！
食咗乜：唔記得，睇圖：
幾多錢：唔知，靚姐姐請客，慰勞魔術師
＊＊＊
2. 西九豪宅會所
過年前靚姐姐話屋企無咗 wifi，部電腦又壞咗，魔術師上到佢個西九豪宅屋企睇吓...唓，原來只係隻無線滑鼠不知何故斷了線，篤唔返個 login 出來，所以部電腦咪 login 唔到囉！只要搵隻傳統有線 mouse 駁上去（一定要有有線 mouse 傍身），就可以 click 返個 login page 出來再 reconnect 隻藍芽滑鼠。同日仲有條寬頻佬上來修理 wifi，原來靚姐姐個 modem 甩咗火牛（咁都發現唔到！），而隻火牛又唔係原裝，寬頻佬唔肯用非原裝火牛，二話不說便在魔術師代靚姐姐 approve 下換了火牛，盛惠 300 大元。
擾攘了一輪，原來靚姐姐約咗世伯伯母大哥二哥成棚人來到西九豪宅會所食晚飯團年，搞到好似「一家人」咁。
相片都是大合照，從略。
＊＊＊
3. 住家飯
年三十晚，魔術師公司早放。靚姐姐打嚟話伯母叫埋魔術師上去佢瓏門屋企食餐便飯，唔使年三十晚又一人飯局咁慘。於是魔術師便跟靚姐姐同埋世伯伯母（仲有工人姐姐）食咗餐「家常便飯」 - 有蝦有蟹真係唔錯，而且竟然係工人姐姐煮！真係難以置信！
＊＊＊
4. 年初一拜年
大年初一去找堂家姐拜年。住沙田第一城的堂家姐屋企裝修，搬到了大埔新峰花園租屋住（記得魔術師多年前來過一次，就係第一任上司 F 請客，見《歷任上司評》）。新峰花園屬低密度住宅，環境清幽，只要不嫌稍為隔涉，都幾好住的。
細堂家姐係件生骨大頭菜，魔術師去親拜年，10次有7、8次都係唔見人出咗去玩嘅（佢班朋友又係無屋企嘅？），今年亦不例外。單車豎在廳就係細堂家姐的標誌。
但其實大堂家姐都唔好得幾多。魔術師跟大堂家姐在家中食個簡單來個二人午飯時談起鄉間「祖屋」的業權問題，發現佢雖然遠比魔術師跟國內的親戚混得熟，但依然都係唔清唔楚的 - 甚至乎去到一個點，就係大堂家姐話有個 app 可交鄉間「祖屋」的水電煤管理費...但魔術師問得兩問，才發現所謂「app」根本唔係「app」，個「app」只係微信小程式，而個小程式係屬於物管公司的...所以結論係業權混亂依舊（見《港燦理財（十二）之好仔不論爺田地》），交水電煤管理費亦毫無意義。
魔術師理順了大堂家姐的思維之後，不禁話：「你做人咁糊塗，要小心啲，好易俾人號㗎！」大堂家姐的回應就係：「求求其其得㗎啦！唔使咁精明嘅！」
魔術師心中嘀咕，唔通大堂家姐教小學，真係會愈教愈蠢？
＊＊＊
5. 年初二拜年
魔術師（2nd edition）早上到土瓜灣去探大舅父舅母，請佢哋食飯餐飯，又俾幾張靚姐姐嘅相佢哋睇，都唔知幾開心。二舅父一家就因二舅母娘家有白事而從缺，唔知細表弟買咗安達臣道的新居屋情況如何，幾時有得收樓。
（2nd edition）晚上走第二場，到瓏門跟靚姐姐、世伯伯母、及大哥夫婦拜年，會所晚餐，相片當然從略。
＊＊＊
6. 年初三赤口
年初三赤口，魔術師無出街。一人飯局自煎蘿蔔榚，睇碟過一日。
＊＊＊
伸延閱讀：
家族同家庭既團年飯都叫埋魔兄,
回覆刪除再無D回應就唔禮貌O勒
起碼去搵伯母拜個年
年初二己經同靚姐姐一家拜咗年，2nd edition 加返。
刪除年初二標準返外家拜年時間點, 這日子誰挑的
刪除如果男明星俾狗仔影到呢幾日去女方(及家人)屋企, 跳落黃河都洗唔清XD
//年初二標準返外家拜年時間點, 這日子誰挑的
刪除應該係靚姐姐先約定父母同大哥年初二一聚，後來再叫我去吧。
’整電腦‘ 係係好大路理由去請人上屋企
回覆刪除我都上過去好多次喇。飲湯都唔少。
刪除閨蜜男友化，還是男友閨蜜化？。。。。。。
回覆刪除呢句好難回應。
刪除哈哈，唔洗回應。網友網友，雖未謀面，都一早當你朋友喇。我只不過盡應有之義，啟發思維啫。
刪除人年紀越大，男女關係千變萬化，舒服就好，無需勉強定型。
//人年紀越大，男女關係千變萬化，舒服就好，無需勉強定型。
刪除哈哈，謝謝。我都係隨遇而安。