難得好耐冇見的大學同學放假，約魔術師星期一（11月17日）在魔術師公司附近見吓面食個頹 lunch。點知事與願違，魔術師星期五（11月14日）放工返到屋企，返到書房一開部電腦就見到唔妥：每次都會 by default 撻着的 web browser 竟然 load 唔到嘢，只係顯示 internet connection。
望吓放在電腦後面的 router，只見盞藍燈閃閃下，代表無訊號。再順藤摸瓜查找原因，原來係放在客廳，接駁光纖 modem 的 Mesh 主機燒了，無論是 LAN 線定 Wifi 都無哂，所以書房的「分機」亦唔着。
由於部 router 係向 8 號仔「妄想痕」租嘅（當年仲手痕就去試玩 Buy Now Pay Later，點知唔使幾年已經做唔住，見《Buy Now Pay Later 初體驗》），期間都仲 upgrade 過部 router 至另一型號，咁就梗係打去 8 號仔 hotline 叫佢哋嚟「換機」：
|
| （圖片來源：Price.com > Linksys Hydra Pro Mesh WiFi 6E 路由器 [MR7500], captured on 16 Nov 2025） |
打去「妄想痕」service hotline，一面輸入廣東話 > 寬頻上網服務 > 現有用戶 > 身份證號碼認證 > 登記住址樓層 > 技術問題，一面被被逼聽一大輪預錄廢話，電話另一端傳來一把電腦錄音聲：「現正為閣下進行寬頻測試」。
點知，聽完幾秒音樂之後，電話另一端的電腦錄音竟然話：「對唔住，依家系統非常繁忙，請您遲啲再打過嚟啦！拜拜！」
然後就 cut 魔術師線！
DKLM！
等咗幾分鐘，竟然俾部電腦 cut 線！
於是魔術師再打去再聽廢話再輸入資料，不過今次就唔係揀「技術問題」呢項，而係揀另一項似係會有真人接聽的項目（唔記得咗邊項，亦無動力再去花時間試多次）。果然，今次有人聽，係個有青電車男，飛快就聽明魔術師想點。有青電車男話幫魔術師約個師傅來處理，然後又俾魔術師聽音樂。
魔術師開住 speaker 等，過咗分幾兩分鐘，有青電車男就話最快都要星期一（11月17日）下午先安排到師傅過來。
魔術師知道呢啲維修嘢，你唔應承佢第一個期，要佢改就唔知改到幾時，唯有馬上應承，犧牲同大學同學的午飯聚會。
仲要向公司請假半天。
收線之後，都要解決眼前的問題，就係不能夠無得上網。幸好書房部 router 無問題，只要換去客廳代替壞了的 router，再 reset 由分機變主機便可。魔術師用手機 check 吓訊號，就算只係用一部 router，可能因為天線夠勁，只用一部 router，Wifi 訊號穿牆過壁，書房同睡房同樣收得清晰（即係根本唔使設置 Mesh 分機)。
又，科技進步，睡房電視可以用 App 睇有線睇 NOW 足球台同埋各大串流平台（極少睇 CCTVB，所以無裝 myTV Super），就連以往用開的 HDMI Extender 都慳返，更唔需要插電視天線了：
再睇返依家「妄想痕」個網站，魔術師用緊嘅$88 plan 已轉用華碩 router，睇怕到時都係成套 router 換了：
|
| （圖片來源：Netvigator 網上行 > 家居 Wi-Fi 服務, captured on 16 Nov 2025） |
佢老闆，呢個「妄想痕」仲敢來問魔術師意見（點解用 HKT（06823.HK）的牌頭？），你話係咪作死？
＊＊＊
伸延閱讀：
沒有留言:
張貼留言