上回《X檔案（十一）》講到終於等到大貓信用卡有 Apple 鳩嗚回贈優惠，拖拖拉拉等到網購使用額清零之後，終於在11月初可以一炮過食盡網購回贈，終於可以落單。在《再度投入 MacBook Air 懷抱》中本來諗住買部輕啲的 Macbook Air 13吋，但年紀大對眼唔係咁好，都係揀返個 15 吋 大啲 screen 好睇啲，亦一次性可以睇多喲：
落咗單之後都好難預計佢幾時送貨，果然 Apple 經 DHL 送貨，又話要簽收，結果第一次送貨時魔術師返咗工，要送貨員打來再約時間，然後過咗兩日再有 email 同客服姐姐真人打來 confirm，才確認今天（11月8日）可以收貨：
結果今天一早（9:00 am 好早㗎喇）起身等 DHL 電話，9:30 打嚟約實 9:45 送到，送貨之後竟然唔使簽收，玩咩？
要撕爛個 DHL 紙箱才能打開：
又係要拉開上方的封條才能打開個盒。下方宇幕說明，Apple 為了逃避侵侵關稅，果然是「Assembled in Vietnam」：
取出部機之後，就係行禮如儀的說明書、抺布、叉電機、及叉電線組合：
早上收貨，下午去屯門市中心的 Apple 授權經銷商幫部 Macbook Air 買保護殻同螢幕貼。幫魔術師貼螢幕貼的肥仔職員，一面幫魔術師刮走啲氣泡，一邊留意到魔術師手腕上的手錶，問：「咦，呢隻係咪 F.P.Journe？」
魔術師想不到幫人貼 mon 貼的肥仔職員竟然識「玩錶」，便說：「呢隻係朗格（見《網購手錶開箱記（2023年3月）》）。」
肥仔同魔術師傾一輪錶經之後，又問魔術師可否借隻錶俾佢睇吓個錶背的機械，魔術師當然無問題。
肥仔讚賞完一輪之後，話本來都想買返隻正裝錶，但又未到呢個年紀 carry 到，話「只能戴返隻撈」。
於是肥仔亦 show 一 show 手上的「熊貓」計時鋼撈。
魔術師心諗，乜依家貼 Mon 都咁好搵嘅咩？又或者依家啲後生炒弊賺好多？
＊＊＊
伸延閱讀：
沒有留言:
張貼留言