爽歪歪摩洛哥（十）之 Day 9-11 由瑪拉喀什（Marrakech）到卡薩布蘭卡（Casablanca）再到歸程：Sayonara o

12月30日，原來的行程是0600起床，0700執好行李(痴線，臨尾仲要咁早！)：

前往卡蕯布蘭卡(全日車程約6小時)

午餐於中途餐廳

卡蕯布蘭卡~加利福利購物城

晚餐於Rick's Cafe

入住酒店

卡蕯布蘭卡:13-18°C

至於靚姐姐同魔術師就留在瑪拉喀什這間「四星酒店」宿一宵，靚姐姐成晚囉囉攣疑心生暗鬼，一大早就起身執行李。魔術師就慢慢來，唔使同佢急。我們落到樓下退房，叫 reception 姐姐搵 bell boy 幫手拎行李落§嚟，但 reception 姐姐竟然叫我哋自己拎，似乎呢間嘢一星都無，認真氣壞。

魔術師打開銀包，見到乾塘，便叫靚姐姐繼續跟酒店搞定行李，魔術師就行返去前一晚的精緻餐廳，裡面有找換店，兌返啲錢打的。

（靚姐姐在餐廳中其中一隻戰利品。）

當地啲路唔難搵，都係行10分鐘左右便去到，少少哋以50元帝幣兌咗 DH，順手截埋的士，靠 iPhone 翻譯叫司機大哥先去「四星酒店」接過靚姐姐和行李，再去 Grand Plaza Hotel。

由於為時尚早，Grand Plaza Hotel 未有房住，所以我們 check 了 in 之後便去附近的餐廳食個 brunch 先：

Hea 完一輪終於可以攞房，個景觀唔錯屬「開揚鬧市景」，但唔知點解有三張單人床：

一不離二、二不離三，靚姐姐話不如又去呢間酒店揼骨，一於「三打白骨精」。一問之下，竟然即日下午有位，5點揼到7點，認真爽歪歪！

今次呢間 Grand Plaza 就無蒸汽浴玩，屬「傳統」按摩 - 但係非洲大媽的手勁就係三間「按摩店」之中最勁，魔術師就好似被架壓路機碾過咁！最緊要就係大媽忽然用力將魔術師右邊小腿向後拗，腳踭掂到屁股，真係又痛又輕鬆；不過由於魔術師左腳傷過（見《魔術師的恐懼鬥室》），為免生意外，便以手勢叫大媽輕手啲，唔使咁出力... 

按完摩已是晚上7點，在酒店餐廳食完晚飯便返房，經 Agoda book 埋車，竪日接我哋去卡薩布蘭卡（Casablanca）和大隊集合返歸！

＊＊＊

12月31日，原來的行程係

- 參觀哈辛二世清真寺

- 穆罕默德五世廣埸

- 機場

臨上機都仲要逛景點，真係「盡興而回」。而魔術師和靚姐姐就施施然起身嘆個早餐，Agoda 司機準時到達，只消2.5小時車程便由瑪拉喀什去到卡薩布蘭卡。

同領隊和眾團友會合，同靚姐姐食返個午餐用哂啲 DH 現金，魔術師便由得靚姐姐跟他們 social，魔術師就到機場商店買返些少嘢當手信俾兩位舅父和兩位堂家姐。

準備上機時發現團友愈來愈少，原來已經開始分道揚鑣，各有各行程：好似闊太M就坐 business class 就唔同我哋啲平民一齊，去到杜拜再繼續玩了。

而我們就經杜拜轉機返巷，返到我城已是1月1日下午（Day 11）。

＊＊＊

伸延閱讀：

魔術師的恐懼鬥室

爽歪歪摩洛哥（九）之 Day 8 唔去索維拉（Essaouira），留在瑪拉喀什（Marrakech）：無心睡眠腦交戰