時間觀念

今天(2006年12月9日)魔術師做了一件久違了的事情：鬧人．

事緣是做義工的時候，每周例會中學員經常遲到，但係衰就衰在我個拍擋港女義工都係遲到當食菜，今日仲離譜，開兩個鐘既會遲四十五分鐘．魔術師本來想話班學員，但係見到自己個拍檔都係咁，又好似唔夠ｐｏｉｎｔ，結果魔術師把心一橫連學員連拍檔齊齊省．

魔術師算是一個守時的人，儘量都不會要人等．雖則都間中都有遲到，但應該都在可容忍的範圍內（５分鐘以內）．如果因較早的事情拖延而會遲多一點的話，亦會致電通知對方．至於魔術師認為可等人的容忍的範圍有幾多，則視乎約會性質而定，公事絕不可遲（對自己對別人都應這樣），私事可以有較大的彈性，不過都不能太離譜，總之要過得自己過得人．


＊＊＊
唔知點解，而家香港人係會慣性遲到．就以港女拍檔為例，第一日主辦單位ｂｒｉｅｆｉｎｇ都已經遲半小時，第一次同班學員開會，又遲二十分鐘，黎到仲笑笑口：「哎呀，唔好意思，我有個壞習慣就係遲到．」

頂，真係虧你咁好意思講到好似好正當咁，響ｄ細既面前做壞榜樣．

之後佢每星期都會平均遲二十分鐘，一來到便會問魔術師：「而家討論緊乜野呀？」

前個星期，港女拍檔話：「要班學員開會早ｄ入正題至得．」魔術師便打蛇隨棍上：「咁你下個禮拜不如早ｄ返．」

結果佢上個禮拜「只係」遲左十分鐘，真係蝕少當贏．

到今日，魔術師等左半個鐘，連學員都問魔術師呀港女拍檔係咪唔返？魔術師谷鬼氣咪打俾佢：「呀ｘｘ小姐，請問你幾點到呢？」

港女拍檔：「哎呀，唔好意思，今日有ｄ事遲左．」

魔術師：「有事要遲，你唔通知我？」

港女拍檔：「咁你想點呀？」

魔術師：「我想問你幾時到．」

港女拍檔：「咁十五分鐘啦！」

魔術師：「好，我俾夠你二十分鐘．」

結果，港女拍檔果然在第十九分鐘到達．

＊＊＊
開完會，港女拍檔同魔術師講：「ｓｏｒｒｙ呀，今朝早真係有ｄ亂．．．」

魔術師心想：「咁你係咪個個禮拜都亂？」便曰：「你都唔係一次半次架啦，我以為咁大個人，做得人導師，都唔應該好似ｄ細既咁，點都會有ｄ　ｄｉｓｃｉｐｌｉｎｅ掛．」

港女拍檔即刻啞左．

＊＊＊
不過魔術師認為，比遇到慣性遲到的人更激氣的是：慣性遲到仲要施施然行過來的人．大佬／大姐，你俾少少誠意，扮下野跑兩步，好冇？

2006/12/10 00:22:42