功利教育

這天魔術師見義工計劃已完成了一大半，便借機問一問一眾學員的感受，同時也藉這個機會跟他們分享一下自己的看法．

魔術師綜合了大家的意見，得出以下的看法：

1.hea得就hea，所以時間管理很差．從小魔術師的媽媽就教魔術師未雨綢繆，功課要一早做好，書要一早溫好，書包要一早執好（寫寫下有d似BT的口號）等等．難道現在的教育程度應該較高的父母都只是會叫子女去學琴棋書畫，卻連最基本的做事方法都不教嗎？

2.時間觀念差，成日遲到，我呢個義工好似老奉要浪費時間去等佢地咁．（伸延閱讀：　時間觀念）

3.無創意，缺乏彈性，唔識執生．說穿了，其實就係太乖太循規蹈矩（但係又常常遲到喎），或者應該說他們習慣了劃地為牢，把自己限定了在一個既定的範疇裡思考活動．呢一點魔術師覺得白家長文化的影響遠較考試文化深．無錯考試係有marking scheme　和考試技巧，香港的考試文化差就差在不跟model answer回答的，即使各答對了也未必滿分　（正如腦筋急轉彎的解答二，出如此　intuitive　的怪招未必會有滿分），無疑是扼殺了同學們的創造力．但，即使是要跟考試方法，但都應該知道 this is for the exam only，點會連平時做人都係咁死板呢？d　家長平時點教仔女既呢？ （伸延閱讀：　腦筋急轉彎，高分低能）

4.大部份學員無熱誠，士氣低落．基本上呢一點同下一點「功利主義」是一而二，二而一的．而無熱誠亦導致溝通差做事差：所以學員之間講者費事講，聽者唔想聽，　2-way communication 變　no way communication；做野唔上心，同一件事可以錯完又再同樣地再犯錯，講極唔聽．

5.功利主義．呢個觀念係由同學A提出來的，佢話唔團結，無士氣，d人唔做野其實主要原因係呢班 free riders都只係為左「完成計劃」後果張cert，用呢d課外活動來　polish　自己個　resume．魔術師心想，如果呢班人真係只係為左張cert，其實一d貢獻都無既話，咁同欺詐有何分別？最起碼的ethics，道德和品格又放在何處？老師家長係咁樣教育下一代的嗎？

魔術師認為，真正高手應該是游刃有餘，有如小說裡的獨孤求敗一樣，明其理精其術，以上的旁門左道利己主義加呃人一時的小聰明根本就不值一哂．但華人社會（包括中國大陸，台灣，甚至星加坡）的教育偏就好像要時光倒流搞科舉考功名一樣，不取明事理的正道，卻去捉試題呃沙紙背答案，甚至連作文都有得背：作文不是要表達個人經歷情感和看法的嗎？連作文都要背的人，他會思考嗎？他會敢言嗎？這不是走火入魔是甚麼？

2007/02/12　11:09:32