2007年7月20日 星期五

兩個表弟

今晚和兩位舅父一家吃飯,便又見到舅父甲既兩個仔,表弟A和B.

舅父甲在某銀行工作超過三十年,呢類接近退休年齡而又無乜學歷既人,正是開刀對象.果然,舅父甲在六月尾便「提早退休」.

舅父甲一家住在某某豪園,舅母甲亦在銀行工作,有賓賓乙名,和兩位子女.佢地兩公婆自小便為兩名子女「打好基礎」,廿幾年前便去聖乜乜幼稚園排隊叩門,之後小學直升.之但係讀名校,又真係唔覺佢兩個仔有幾醒.

大仔表弟A叫做好d,當年會考得十幾分,高考好似肥中文,英文E,最好果科都係D,重讀中七之後考到藍血大學某學系,竟然俾佢考到一級榮譽畢業,而家讀博士,睇黎香港既考試制度可能真係唔適合佢.

佢中學時見親佢都係羅住本書讀,大學時呢就無喇,但係就呆呆咁,無乜反應,加上長長既脖子,有d似薛海皮;不過成面暗痯,好似似陶傑口中既小男生多d.

舅父甲話佢「聰明就唔係架啦,不過佢好勤力溫書既」.希望呢句係自謙啦,如果唔係,讀書讀到咁呆,非好事也.

細仔表弟B自細便頗為頑皮,一副頑劣樣,無心向學,而家係某Band 3中學中五畢業生,等緊放榜.

那天魔術師聽見舅父甲話退左休,無響銀行做,便想佢屋企經濟掂唔掂架?畢竟大仔響大學做tutor,人工唔會好高,就算畢業後都未必可以在藍血大學找到份教職,出去搵野做,到時成廿六歲人,又無工作經驗,如果見工好似魔術師所見咁呆,咁其實都幾「紮洗」.

果然,言談間舅父甲透露憑著人脈在一間小公司找到一份管大陸廠既工作,理由係「兩條化骨龍都未出身」.

***
今晚開餐,作為長輩既舅父乙梗係問下d細既學業情況.

舅父乙:阿B,你揀左學校未呀?

舅父甲:(搶住答)都未放榜,未有得揀住...

舅父乙:咁原校有無位呀?

舅父甲:(陪笑)都「炆」d喇...

舅父乙:咁放成幾個月假,無咩野做呀?

舅父甲:響屋企hea羅.

***
到魔術師撩下表弟A.

魔術師:阿A,你使唔使讀post-doc架?

表弟A:唔使

魔術師:咦,我以為多數都會讀既添.

表弟A:我地多數都唔讀

舅父甲:(緊張地)呢個係咩野黎架?

表弟A:「博士後」羅...(即係無講過野)

魔術師想,睇黎兩個細既仲有幾年書要讀,舅父甲自己年紀又有返咁上下,而家仲有時要返大陸睇廠,其實都會幾辛苦同壓力大.

唔知點解,魔術師總係覺得,如果俾著係自己,呢個博士一定唔會讀,會選擇下幫輕下老豆先羅.

***
轉左話題,講左投資.

魔術師:阿A,你今年幾多歲?有無22?

表弟A:差唔多23...(想了一想)係23.

魔術師:(下?幾多歲都要諗?咪成26歲先畢業?)咁有無羅少少錢玩下投資咁呀?

舅父甲:(搶住答)佢乜都唔識,又無膽架...

魔術師:哦,理財呢樣野,要由年紀輕開始架,羅少少錢出來試下,找些經驗,係好事黎架.

表弟A:...(無反應)

***
再轉話題,講興趣活動,魔術師話而家太熱,秋天先會行山,當然我知道行山唔係表弟那杯茱,便問:

魔術師:阿A,你有無睇開咩野小說架?

表弟A:(搖頭)...

魔術師:(乜係樣樣都無興趣架?)阿B,你呢?

表弟B:(苦笑)...

魔術師:(唉,梗係啦,好多年前都聽你老豆老母叫你大佬溫書,唔好睇埋d無用既課外書架啦)你不如試下搵個暑假,刨哂成套金庸佢,包你中文水平大進呀.

***
魔術師本來仲想講下影相,聽歌,打機,上網之類,不過,諗諗下,見兩個表弟成晚都講唔夠廿句野,唉,都係唔好講咁多喇.

家庭教育,同老豆老母識唔識諗,識唔識教,開唔開通,真係好重要.


***
嘩,好開心呀,而家係 20 Jul 2007 01:10,商業一台而家播緊「擦身情緣」呀!
有「知音」既感覺,真係好難形容!

2007/07/20 01:07:16

8 則留言:

  1. 哈,咁搞笑o既,我屋企樓下個看更未做看更前都係做大陸廠o架(絕無嘲笑成份)。個看更算好人,試過我白痴哩夜晚開咗窗,畀啲雨水淋濕個拖蘇,搞到間屋停電,佢上嚟幫我整返。係煩啲囉,好長氣,次次喺我趕到甩轆時叫停我問長問短。
    見到佢呢,都有時好唏噓,佢唔係唔識嘢,不過真係年紀大,脫咗節,唔知係咪好似你舅父咁仲有細路未出身,不過見佢咁辛苦,都有少少於心不忍囉。

    回覆刪除
  2. 魔術師,卓的哈七出了,到您出手.

    回覆刪除
  3. 我都覺得而家唔係好多讀得書但係又醒既小,中同大學生.再唔係就係醒得濟,走去挑戰法律.或者做一d無謂謂o既野,日日等個天跌d錢落o黎.
    hk o既小朋友好似唔太知道咩叫"一分耕耘,一分收穫".搵快錢個個都想,但係搵快錢都要落d心機,搵下方法,但佢地好似無乜呢d概念.最叻都只係用最傳統出賣勞力o既方法,排幾晚通頂,買野返黎炒,但呢d炒得o既野全都係短線搵快錢方法,唔多實際.
    係咪而家d小朋友無大志左?定係得到的太多亦太易?

    回覆刪除
  4. 魔術哥哥:
    舅父A個仔,查實係咪唔多鍾意佢老豆呢?會唔會覺得個老豆無“學識”,“影衰”人呢?
    我覺得舅父A其實係不恥下問囉。

    回覆刪除
  5. 唔好意思.我想話我都有收到呢d變態留言.

    呢d人真係好過份囉.我想問佢仲有冇嚟你度留言呀?

    回覆刪除
  6. 我剛才去投訴的時候

    看見你原來和我都是投訴同一個人的..

    (這個人真的很過份..)

    所以便按進來看看啦!!!

    你這裡有很多文章哦!!

    因為不能在你的留言簿留言..

    所以在這裡說..不好意思

    回覆刪除
  7. 不敗的魔術師2007年7月22日 晚上8:37

    我諗表弟A係唔識應對同交際,而且表達能力有問題,唔能夠好精簡咁講到要講既野.
    舊年佢HKU畢業,我幫佢地一家和其他親戚影相,根住成set相斜左佢,照計佢係龐該負責consolidate哂d相再send返出去俾所有人,但係佢都唔識咁做,連舅父乙兩公婆果份都無.
    結果係我幫舅父乙搞掂,仲幫佢地哂返一d影得好既相.
    其實呢d係主人家主動要做既野,好明顯表弟A係乜都唔識羅.
    而佢咁naive,我覺得係佢父母太保護佢既後果,好似讀幾年大學,一年宿舍都未住過,又點會有搞人際關係既經驗呢?

    回覆刪除
  8. 所以你話養仔女到底係投資定係負累

    回覆刪除