選擇禮物

那天魔術師打電話給兩位舅父話請食飯，其中舅母乙回電問魔術師用開邊隻香水．嘩，點答呀，香水古龍水等等魔術師一向無用開，就算有，唔通叫舅母去Zenga， Boss，Tiffany，或者Lacoste之類既鋪頭睇，只好話唔使啦！
＊＊＊

話說舊年表弟A藍血大學畢業，魔術師幫舅父甲佢地一家，連同舅父乙及其他親戚影相．好喇，影完之後就將ｄ相zip哂擺係魔術師某個私人space內，叫佢舅父甲下載完便轉送俾其他有份去影相既人．

點知過左兩個禮拜，舅母乙打黎話舅父甲仲未俾ｄ相佢地．魔術師即時心諗，而家係表弟A做host，就算佢阿爸阿媽無左回事，佢自己都好應該主動地做野，咁大個人咁小既事都唔識處理，反而要魔術師自己send返ｄ相俾舅父乙，真係令魔術師有ｄ怨言失望．

話說當時臨近冬至，趁大家會出來食飯，魔術師便哂左幾張影得比較好既相俾舅父乙，仲響Tiffany買左個純銀相架（梗係再包過唔好咁揚），同一枝2000年既Reserve De La Comtesse俾佢地，反正呢幾年舅父乙兩夫婦真係幾關心魔術師，仲好幫手添．而舅父甲呢，紅酒一樣，相架，就一個細細既咪算羅．

＊＊＊

魔術師一向都唔太喜歡舅父甲一家，兩公婆都係好充之人，表弟A就呆，表弟B就頑劣．當年媽媽見表弟B對家裡所養既小烏龜有興趣，便買左兩隻小龜送給他．點知唔夠一年，再見時問佢，兩隻小龜已經俾佢玩死左！

大佬，魔術師自細就同小貓小狗，雞仔鴨仔一齊玩，見佢可以連烏龜都玩死，真係好嬲呀！

＊＊＊

魔術師小時候物質並不缺乏，「不缺乏」既意思唔係話屋企有錢（住木屋同公屋，直程係窮啦），而係魔術師自細便沒有「人有我有」的心態．縱有簡簡單單的玩具車，始於沒有活生生既小動物咁好玩．故此根本唔會有而家果ｄ「基層人士」咁，小朋友無遊戲機玩慘，無得去睇「哈利波特」又好慘，無錢去飲茶又慘，總之同學仔有，自己無就慘就自卑．頂丫，佢地唔係人窮，係心窮啫．

諗起小學時，聖誕聯歡會有交換禮物，每人買一份，規定某一個銀碼之內．有一年魔術師買左個筆盒，仲特意揀左過圖案中性ｄ既，希望抽到既同學會喜歡，而唔係將份禮物同其他人交換（魔術師覺得，抽到禮物，始終算係人地既心意，無論鍾唔鍾意都好，係好應該自己收起佢既）．

點知，果年，魔術師抽到既係，某即沖飲料(例如好立克，柯華田)所附贈既水杯．呢位同學就係將響超市買既一大罐即沖飲料所送既禮品拆出黎交換，不費分文．

魔術師當時真係好嬲，唔係話份禮物值幾錢，而係呢位同學根本係無heart，求其搵ｄ野交差算數．

而ｄ同學呢，個個彈開哂，驚死魔術師搵佢交換！

＊＊＊

魔術師第一次收由女生送來的禮物，係一條領帶，佢仲同魔術師逛Pacific Place逛足一晚，睇過N咁多款先買左條Y記．

本來魔術師都幾鍾意呢個女仔，有一次同佢上去深圳遊盪，佢仲彈左隻巴哈既唔知乜樂曲俾魔術師聽，仲將晚餐食唔哂既片皮鴨粒飯打包，第二日約埋羅去叮熱食．

個feel好浪漫架，可惜turn out呢位女仔係港女一名，唔會鍾意魔術師呢類咁單純既「鄉下仔」，後來嫁左鬼佬lu．

＊＊＊

日前喵喵話唔知送咩野俾朋友做結婚禮物．魔術師就認為，如果係唔係諗住送ｄ「行貨」，最好就係自製，獨一無二；退而求其次，買一些現成的東西，自己再加一ｄ　Value Added既野落去（例如畫幅公仔）．
當年魔術師送俾港女朋友兩公婆既結婚禮物有兩份，就係自己－幫佢地搵到Fly Me to the Moon既琴譜，仲有用software將Can't Take My Eyes Off You既現成歌唱版變成卡拉ｏｋ（即係而家老餅同喵喵玩緊既野，魔術師好幾年前已經有做），找背景音樂，跳舞音樂，做開場片等等，總之一腳踢．而家諗返，阿鬼佬同港女朋友好似乜都唔識，無乜準備咁．

而第二份禮物，就係找來幾份結婚音樂琴譜，印成一本書，去做硬皮釘裝，當成結婚禮物．

呢份禮物，絕對係用心之作．

當年老豆見魔術師為左呢位港女既婚禮，搞左幾晚，又問人借projector，攝錄機，自製卡拉ｏｋ音樂，編排跳舞歌曲等等，都稍有微言．

但係，人對我無情，我唔可以對人無義，佢老公又無「兄弟」，咪當幫埋呢次，算係盡最後心意羅．

＊＊＊

至於俾父母既禮物，心意同經歷便已足夠，而唔係平時黑口黑面，淨係一年一次父親節母親節食餐飯做戲咁做羅！

2007/07/24 00:42:42