2013年1月9日 星期三

夜崇基

(幕開)

(夜,中大崇基書院,未圓湖畔。)

(漆黑的街燈下,一名年約二十歲的少女,一腳高一腳低,跌跌墥墥的走着。)

女子:師兄!師兄!你去咗邊呀?做乜呢度好似個迷宮咁嘅?我唔識路返出去呀!(唱)

「只想身邊有某個作伴 誰願理彼此也戲弄

 然而就算相依也相擁 總不相信

 回頭獨個只好乖乖的走進

 夜迷宮

 夜迷宮」

(一名帶眼鏡小個子的青年,色迷迷地借故走近。)

青年:(笑淫淫)妹妹仔,蕩失路呀?不如我帶你上去我系會休息室度透下吖!

(青年乘機去拉少女的手。)

(一名架着墨鏡的中年漢,手中拿着一個大白色膠袋,飛奔而至。)

女子:(喜出望外)師兄!

師兄:喂,死花,你想點呀!師妹隻手我都未拖過呀,想搶我頭啖湯乎?

(青年忽然變得有點不自然,神經兮兮地離開了。)

師妹:師兄,你夜晚黑都戴墨鏡,果然夠煞氣,豪哥都無你咁威呀!

師兄:梗唔係喇!我老喇,再鋒利嘅刀都有生銹嘅一日。拳怕少壯,如果頭先打起上嚟,我驚俾條靚仔打鑊金咋!

師妹:(捏了一下師兄的手臂,眼光卻盯在他的胯下)嘻,我就話師兄同靚佬湯差唔多嘞!

師兄:咪講咁多住喇,食咗嘢先喇!

(師兄示意師妹在台階上坐下,打開膠袋,內有飯盒、飲品、和甜品。)

師兄:(打開飯盒)你最鍾意嘅炒貴刁呀,仲有奶茶添!快啲趁熱食喇!

(師兄用筷子挾了一口給師妹吃,自己又吃了一口。)

(師妹忽然抓起師兄的手,放在自己胸前。)

師妹:嘻嘻,有師兄你在我身邊,食乜都咁好味!頭先你行開咗嗰幾分鐘,我個心卜卜咁跳,又亂咁行,仲以為係世界末日添呀!(唱)

「Why does my heart go on beating?

 Why do these eyes of mine cry?

 Don't they know it's the end of the world?

 It ended when you said good-bye.」

師兄:(慌忙縮開手)咪傻喇!邊有世界末日喎!啲人都呃人嘅,無啲誠信!況且就算真係世界末日,我化灰都會咁愛你架!(唱)

「願思念是並沒盡頭

 沒有依附現在過去或以後

 即使這驅殼有一朝化盡塵垢

 仍能跟你纏綿於宇宙」

(兩師兄妹一人一口,很快便分享完一盒炒貴刁和一杯奶茶。)

(師妹取出紙巾,抹了抹微翹的小嘴。)

(師兄眼泛淚光。)

(師妹用剛抹過嘴的紙巾,給師兄擦去眼淚。)

師妹:師兄,你做乜喊呀?俾個飛吻你嘞!

師兄:我係諗起以前未曾相戀已分手的舊情人啫!(唱)

「曾經痴戀 曾經分手

 如今跟你又聚頭

 一種他生的感覺 心底默默流

 如果當初 從不分手

 人生一起怎麼走

 可惜當初的一切 不可以回頭」

師妹:(嬌嗔)哼,我咁大個人係度,唔準你想住第二個呀!

師兄:對唔住囉!呵返呵返!食甜品喇!(打開甜品發泡膠碗)今晚係涼粉啊!

師妹:(充滿期待)咁食完涼粉,我地今晚做乜好呀?

師兄:不如我地今晚在未圓湖泛舟泛天光,完成我未圓的心願呀!(唱)

「曳搖共對輕舟飄 互傳誓約慶春曉

  兩心相邀影相照 願化海鷗輕唱悅情調

  艷陽下與妹相親 望諧白首永不分

  美景醉人心相允 緣柳花間相對訂緣份」

師妹:好呀!你快啲去book艇呀!

師兄:(掏出手機)哦,等我打去相熟的士多先!

(師兄邊打電話邊行,愈行愈遠。)

師妹:師兄,你去邊樹呀?

師兄:可能我用手機打得機太多,個電話壞壞地,要行出啲先接收到呀!

師妹:哦,咁我丟咗啲垃圾先喇!

師兄:好呀!

(師妹拿着膠袋,躡手躡腳的往大路走去。)

(師妹到得大路,往港鐵站狂奔。)

(去到港鐵站,師妹已是香汗淋漓,氣喘連連。)

(在港鐵站門口跟師妹會合的,是剛才那猥褻青年。)

青年:錢呢?

師妹:(將膠袋遞上)嗱!

(青年丟掉吃完的飯盒和飲品杯,卻小心翼翼地將涼粉倒進垃圾箱。)

(在涼粉盒的底部,有一個小透明膠袋。)

(青年慌忙取出膠袋,內有一個利是封。)

青年:變態!

師妹:咪係!人叫援交佢叫援交,條老野又要我扮佢失散咗幾十年的師妹,夜麻麻學人戴黑超,狄龍就唔似嘞,成個阿倫咁囉;又要人「師兄」前「師兄」後咁叫佢,兩個人食一盒飯,飲一杯嘢,食得嗰廿幾蚊!仲話撑艇仔撑天光,成晚煲埋啲無米粥,我懷疑佢都唔知係咪唔得嘅!

(青年打開利是封。)

師妹:幾多錢呀?

青年:吓!得嗰二百五!我同你去遊行都有五舊喇,我使乜去做扯皮條?

Picture 

(圖片來源:過眼未雲煙《夜崇基》)

(幕下)

***

參考資料:

夜崇基

我和靚佬湯有個約會

那夜非夜

我真係賊眉賊眼?

最鋒利嘅刀都有生銹嘅一日

***

伸延閱讀:

魔術師歌劇系列之《望 . 兩秒》

2013/01/08 23:47:08 

6 則留言:

  1. 哈哈哈!好笑!

    回覆刪除
  2. 不敗的魔術師2013年1月9日 上午8:20

    你真係快手!

    回覆刪除
  3. 唔覺意見到你放咗Black-Scholes model條link,應該會用得著,第日唔駛再搵,多謝先!

    回覆刪除
  4. wahahaha, 笑死我喇!
    我胯下,真唔講笑架,韓信都要跪低 XDDD
    睇到微翹的小咀,以為真係師妹番咗黎,唉,come back to me ~~~~

    回覆刪除
  5. 不敗的魔術師2013年1月9日 下午8:25

    有用就好...

    回覆刪除
  6. 不敗的魔術師2013年1月9日 下午8:29

    下次寫篇令你夢想成真又點話!

    回覆刪除