點解要買樓

一字咁淺，個案三答到你...

點解要買樓 (一)

點解要買樓 (二)

數年前二百萬以下的上車盤，現在幾乎絕跡，年輕人普遍收入和儲蓄不多，難以獨力上車。面對「癲價」樓市，不少家長唯有替子女支付或墊支部分首期，協助他們趕上樓市的高速列車，這筆首期彷彿成為父母給子女成家立室的禮物。不過，亦有年輕人不願向高樓價低頭，寧願租樓，不為「樓奴」，希望活得更自在。 

港府早前雖出重招穩定樓市，樓價升勢稍遏，不過市場憧憬美國新一輪量寬措施會吸引資金再度來港，推高樓價，加上低息環境持續，樓價仍有上升壓力。本集會探討「趕上車」與「不買樓」兩類年輕人的現況。

＊＊＊

個案一：一生兒女債

 

８０後的阿Elle與丈夫月入共三萬多，二年前買咗層１３０幾萬的屯門樓，兩房，建築面積５３０幾呎，按揭分二十年攤還，但兩小口最初只有十多萬首期，九成按都要供三十年，「要供到退休好辛苦」，結果阿Elle的父母俾咗二十幾萬佢地做首期。

雖然話理論上係供三十年，但係呢個世界有通脹，佢地兩公婆咁後生應該會有晉升和跳槽機會，過得幾年每月還幾千蚊就唔係負擔了。做咗咁多年人，兩個加埋都只係得十幾萬首期，仲話要未婚搞嘢搞出人命添！佢地父母就勁嘞，唔單止養大佢地，仲幫佢地置業；到佢地自己要做人父母，又能夠幫自己仔女置業嗎？

＊＊＊

個案二：父母最緊要「生性」

 

Olivia，８０後，在大學工作，月入超過兩萬，又係有父母幫手上車；但所謂「幫手」，其實係父母一直將佢俾的「家用」儲起來，再幫佢俾首期，你話有「生性」嘅父母係幾咁重要呢！

Olivia四年前買入屯門一個建築面積５８０幾呎的兩房單位，作價１５０萬，月供４千，現在樓價幾乎升了一倍。佢自稱自己「好彩」，如果無買到樓一定會後悔，因為當時５０萬已經夠俾首期，如果唔係依家隨時要拎８、９０萬才能夠付首期，香港唔係個個家庭「現兜兜」有８、９０萬，所以首期才是致命傷云云。

又係唔記得有按揭保險呢樣嘢。如果係講緊自住樓的話，層樓就算跌咗價你要依然要住的，所以做九成按就算係有較大風險變成負資產，都依然做得過，先決條件係量力而為，就算經濟差你可以有本事搵到嘢做，有收入供得掂就可以了。

更頂癮的就係，Olivia話佢就算結咗婚，住響男家，呢層樓依然係「佢嘅資產」。以私房錢作個保障的角度來看係無錯嘅，之但係聽起來，卻又很有很重「你嘅錢係我嘅，我嘅錢又係我嘅」的港女味囉。

＊＊＊

個案三：家有一老，如有一寶

點解要買樓？無錯嘞，咩嘢資產升／保值都係次要，最緊要的就係自己有處安身之所，唔使受制於業主加租。

 

梁太，五十幾歲，８５年時與丈夫以１成首期在青衣買了個建築面積４００幾呎的私樓，當時樓價不足２５萬，儲了近１０年才夠俾兩萬幾蚊首期，每月供１,８００元，而月入才只有不足４,０００元，結果一供就供咗１５年，４０歲就供完層樓，仲養大咗兩個仔女添！上一輩人，樓價低物價低，有職升有人工加，更重要的是「阿仔唔使學呢樣嗰樣」！

仲有就係，阿梁太真係識教仔（讀緊中五），不但儲緊一筆錢做投資幫阿仔（希望唔好係101 plan喇！），連「阿仔能力唔夠的話，最差咪住係奶奶度」都講得出，教到個仔能屈能伸，真係前途無可限量！梁太的故事，真係要俾依家啲「供樓好辛苦」、「唔想做樓奴」、「唔想供三十年」的年輕人學吓！

＊＊＊

個案四：金魚哥哥

 

阿Ｏ，８０後，電台ＤＪ，為咗結婚，睇樓睇咗成兩年都買唔成，大埔區２５年樓、實用面積３１５呎，２９０萬嫌貴，話成３００萬都有「好多選擇」，情願揀「綠油雅丸」咁話。

結婚要買樓可以理解，但３００百其實唔係好多選擇；又點解講到佢另一半好似唔使參與供樓咁嘅呢？香港地，好多家庭都係公一份婆一份架喇！

＊＊＊

個案五：金魚小姐

學有線網頁留言話齋，金魚小姐情願租樓，其實咁先係做樓奴，因為佢地只會為業主供死一世樓。當然，只要非常「有型」地去做可以「尋覓理想」的工作，唔要犧牲人生的選擇，不屑去搵錢，收入只要夠低自然就可以住公屋架喇！所以依家先有咁多年輕人申請住公屋，證明自己夠浪漫夠有理想不為五斗米折腰，係一種朋輩肯定來的！

2013/01/16 00:53:53