2017年1月2日 星期一

70幾萬,猶如垃圾

唔知點解過咗3個星期,畸寶都唔 release 段片給 public access,各位讀者可以試下撳,設計環節在35:04開始,如果睇唔到片就要睇住魔術師的截圖先喇(又或者,等設計師一稿兩投將「設計單位」個案寄去CCTVB...)!
樓盤傳真 2016/12/10 2016/12/10 23:05

美國即將議息,預期加息機會大,但低息持續,實際供樓負擔又會加重多少?
加辣增加換樓難度,換樓鏈隨時被打斷,盤源愈來愈緊絀,沙田第一城業主,叫價反而更堅挺。
西半山敦皓,廚房隱蔽位出現輕微漏水,失分最多。
馬鞍山迎海.星灣御,間隔大反轉,甚至封了工作平台的出入口,改造成衣帽間。
由恆基(00012.HK)和新世界(00017.HK)聯合發展的馬鞍山迎海.星灣御,戶主唔知為乜大屋搬細屋,2年前樓花買入,現在新入伙,1,015呎,坐擁無敵海景(左上、右上),但係就有4間房3個洗手間加1間雜物房、一間工人房連工人廁(左下),於是戴咗副眼鏡改變形象,叫人差啲唔認得佢的鎢絲 sir 又發揮環保敵人的本色,將所有牆壁連新簇簇的交樓標準家電拆哂,再重新規劃:

鎢絲 sir 將單位右手邊的房間和廁所全拆掉(左上),造了個開放式廚房,仲有個懶西的中島island,原來的主人套廁變成客廁,又在廚房對面間了兩間房俾仔女,一於俾油煙薰住佢地球右上)。Island kitchen 以雲石打造,延伸出一張飯檯,不過燈就係由戶主自己揀,而唔用鎢絲燈(左下);廚房隔離係客廁,鏡櫃以光管圍繞,唔怕黑麻麻痾尿射出界(右下):

鎢絲 sir 又將單位左手邊的房間全拆掉(左上),由於工作平台細到用唔到(右上),鎢絲 sir 便將工作平台封掉(左下),用來造衣帽間的全身企櫃,而鏡頭右手邊的壁就預留位置釘上鋼管供屋主跳鋼管舞掛衣。不過,如果工作平台有乜事要維修,甚至乎樓上掟枝煙頭落嚟留下火種,咁又點算呢?

鎢絲 sir 繼續發揮破壞王本色,將原來的廚房、工人房、工人廁等拆去(左上),跟衣帽間打通變成特大主人房,房門以趟門與客廳分隔(右上),而近玄關位則放鞋櫃及洗衣房(左中)。由於主人房本來係廚房,景觀難言優質,果然只係近望樓景(右中),將無敵海景留返俾仔女,真係可憐天下父母心。主人房地板鋪到上床頭,床頭當然少不得鎢絲 sir 的最愛鎢絲燈在吊吊揈(左下);套廁浴室個壆鬼死咁高,話可以淋浴浸浴兩用咁話,但係就非常之叉錯腳 PK friendly:

阿女在外國讀書,但睡房卻毫不馬虎:藍色床頭牆身,床尾牆身則是磁石版,唔知點解人在外國仲要在我城記事(左上、右上)。阿仔間房床都無張,唔知係咪未買床(點解唔訂造埋?)定完全唔返嚟訓,更唔使好似阿女咁遮遮掩掩,就連窗簾都唔使落,盡覽無敵海景,而老豆老媽就捱近樓景(左中、右中);不過阿仔個衣櫃又係偏細,只係用玻璃牆可供寫字做 gimmick:

洗衣房竟然設在大門隔離,同衣帽間一個在南一個在北(左上)。因為洗衣機、乾衣機會有噪音,故在玄關設一玻璃趟門分隔,半掩就係屏風(右上),全掩就可以完全隔音(左中);個設計雖然算唔錯,但成件事始終係因為柒頭柒腦地將洗衣房放在玄關而起,再靚的補救也只是得啖笑。放在洗衣房中的熱水爐(右中),應不會是給客廁和主人房用吧?如果唔係,條水喉鬼迷咁長,冬天時熱水都變凍水喇!客廳電視櫃懸空(左下),最遠處紅圈框住的地方只是浪費;另外客廳近露台的儲物櫃附設水喉,給女戶主整色整水種嘢用(右下):

根據記者妹報導,被圍堵的工作平台以呎價計約值20萬,被拆掉的原裝浴室廚房家電設備約值50萬。魔術師就認為唔止咁少,因為間屋俾鎢絲 sir 搞到鬼五馬六,resell value 行情更為看淡。

***
伸延閱讀:
迎海.星灣御官方網站
香港特別行政區政府 一手住宅物業銷售監管局 主頁 > 給準買家的資訊 > 常見問答 > 實用面積

15 則留言:

  1. 我認為將廁所廚房位變做睡房係非常危險嘅事。樓上樓下都係廁所,你就係到瞓。哈哈!

    回覆刪除
    回覆
    1. 哈哈C嬸諗到呢瓣。

      理論上新樓唔會咁快漏水,但而家d用料唔似以前,所以好難講...另外就算唔漏水,有濕氣都唔系咁好

      刪除
    2. //樓上樓下都係廁所,你就係到瞓。哈哈!

      樓上個外傭在屋主頭頂大便,風水認真唔好!

      //理論上新樓唔會咁快漏水,但而家d用料唔似以前,所以好難講...另外就算唔漏水,有濕氣都唔系咁好

      留意係廚房同工人房/廁, 間屋的quality attention 應該唔係擺係呢度...所以會係高危地區也說不定.

      刪除
    3. 首先,感覺唔好。
      然後,人哋出出入入廚房廁所,嘈住曬。特別係而家啲人唔知點解咁鍾意係廚房到洗衫。
      起嘅時候喉管防水各方面都一致咁設計。冇啦啦中間有一間扭咗去第二邊,效率當然冇原裝好。又萬一樓上一個唔生性,漏水唔知唔理,久而久之破壞結構,要使一筆大執先能徹底解決問題。

      睇番示範單位,原則其實都唔差。改咗並無大大改善咗啲咩。何必使一大筆去冒呢啲風險?
      http://hk.apple.nextmedia.com/realtime/7015342/20140925/52941096

      刪除
    4. //效率當然冇原裝好。
      //睇番示範單位,原則其實都唔差。改咗並無大大改善咗啲咩。何必使一大筆去冒呢啲風險?

      鎢絲sir 厲害在marketing skills 了得, 每次都可以說服到屋主改到鬼唔馬六, 將原有用途無厘頭反轉, 增加風險又無實質改善.

      刪除
  2. 哈哈, 呢D間隔實在很有趣, 謝魔兄分享!
    另祝新一年萬事如意, 快樂!

    回覆刪除
    回覆
    1. 謝謝, 大家咁話, 身體健康搵多啲!

      並祝塘人快啲搵返隻自來貓...

      刪除
  3. //理論上新樓唔會咁快漏水
    過多幾年樓上裝修廁所....

    //放在洗衣房中的熱水爐(右中),應不會是給客廁和主人房用吧?
    果個圓姑碌型的熱水爐,唔係儲水式下話.....

    //我認為將廁所廚房位變做睡房係非常危險嘅事。樓上樓下都係廁所,你就係到瞓。哈哈!
    樓上幾時疴夜尿都一定知

    //鎢絲sir 厲害在marketing skills 了得
    同怪獸嘉獎講留返最好(海景)畀對仔女,得咗


    回覆刪除
    回覆
    1. //過多幾年樓上裝修廁所....

      咁樓上裝潢廚房會唔會趕到啲曱甴走落樓下呢?

      //果個圓姑碌型的熱水爐,唔係儲水式下話.....

      係小型水缸...

      //樓上幾時疴夜尿都一定知

      沖廁會有水喉聲.

      //同怪獸嘉獎講留返最好(海景)畀對仔女,得咗

      中剷父母的錢真係易呃.

      刪除
  4. 其實想問下,咁改動唔洗向屋宇署入則申請咩?
    上晒電視咁揚,唔怕俾發展商告要業主還原?

    回覆刪除
    回覆

    1. //咁改動唔洗向屋宇署入則申請咩?

      不牽涉結構牆的更改間隔,應該只屬小型工程,無須事先獲得屋宇署批准及同意便可進行。
      http://www.bd.gov.hk/chineseT/services/index_mwcs_items.html

      //唔怕俾發展商告要業主還原?

      發展商賣咗樓就關人個關,又點會走去告小業主? 況且,又可以告佢啲乜呢?

      刪除
  5. 1100呎但內籠無主力牆,好適合「推倒重來」設計.

    咁多窗,間五間套房收租都應該做到.

    回覆刪除
  6. 廚房直沖2個仔女房, 認真為屋主著想

    咁大間屋都無位擺野, 真係夠晒簡約生活, 定係搬晒去迷你倉?

    回覆刪除
    回覆
    1. //廚房直沖2個仔女房, 認真為屋主著想

      火氣攻心,子女變激進笨土可期 XD

      //咁大間屋都無位擺野, 真係夠晒簡約生活, 定係搬晒去迷你倉?

      有櫃嘅,不過我無capture啫.

      刪除