2017年1月9日 星期一

天水圍城風水實習(2017年1月8日)

今天跟老師到天盛苑居屋屋苑中層5室睇風水,先睇巒頭:(1)西鐵路軌玉帶環腰聚財,算係好嘢;(2)不過高架橋呈反弓之勢,不時有重型車輛行過,車速快更是下坡而去,(1)加(2)最多只屬財來財去格局:

天盛苑1999年入伙,為七運樓,屋主係大仔,一手買入,跟母親同住。原則三房無拆過任何間隔,只是將其中一間細房和洗手間變成儲物區。

(3)去到大門口,唔知係咪屋苑的環保措施,有燈都唔開足,只覺光線不足,難以聚氣聚財:

(4)大門入屋見窗對穿,漏財格。用百葉簾遮檔成效不大,需要以「漏光不漏」的窗簾「密封」:

(5)沿客廳窗外望,由於單位位處中低層,以學校做案頭未免太高,而且屋頂有尖角犯煞,遠處仲有689盲搶地起樓,起好之後景觀受擋,徒增壓逼感:

開立極尺起星盤,為寅山申向:

(6)坤位震位缺角,不利母親和長子,正正就係剋住屋主兩母子。
(6a)男屋主五黃土命,睡房山星3碧木剋二黑土加五黃,又係鬥牛煞,主生活工作多激氣事,健康上有可能為手足神經疾患。屋主有腰背痛,宜延醫診治尋找病因,睇下係咪因為有乜神經線受壓而引致病痛。
(6b)母親為四綠木命,訓正艮宮屬土,雙7飛到,強金剋木,木又剋土,浪費精力,不宜作為睡房。
(6c)解救法之一係母親與男屋主調房。假若可行,則母親木人訓木房,不過不失;屋主就土人訓金房,土生金洩一啲氣,一贏一輸好過雙輸局面。但可惜母親不信風水,無謂叫佢郁。
(6d)解救法之二就係男屋主訓出廳,頭靠實牆腳朝電視。廳在南(九紫火離宮),睇下火生土可唔可以生旺自己。2017年立春後1入中,五黃飛到離宮,需要掛風鈴化解,不過呢個只係一年性措施,總好過長遠受制於原來間睡房。
(6e)不吉的仲有波浪型燈槽自制橫樑壓頂,加上米白色牆壁,另外男屋主土命人仲要土剋水浪費精力去對抗個波浪型燈槽同埋土生金,生旺幅屬金的牆,訓出廳都只係好過無。
7. 最後就要講大門,開正東面,水星山星運星飛入咁啱就係68九(!)。6白金為財星宜在官家做事,但由於已過氣,只能穩而不能發達:果然屋主與母親均是公墓園,都算係咁喇。
7(a)但2017年立春後1入中,3碧木飛到大門,木剋土對屋主本人不利。可以放塊紅地氈在大門前,火生土(山星管健康,8屬土;屋主自己都屬土),土又生金(大門的財星,全屋唯一優點),利一利自己都好。
7(b)但木生火,如果紅地氈怕消耗了母親,那就在大門放置動水裝置(例如貓貓飲水機),取其6金生水,水又生木,對母親有益。
其實以上的都只是小修小補,真正可做的事唔多。如果要徹底解決,最好就係搵過一間啱住的屋去搬;退而求其次就搵阿鎢絲 sir 搞場大裝潢,拆得就拆,重新規劃,將個廳搬入房又或者將間房搬出廳,諸如此類。
***
參考資料:
建築師妙手旺宅 蔣匡文編著 2013年7月版

2 則留言: