2017年8月6日 星期日

真假槓桿投資

不知何解,魔術師最近的資產配置系列文章中,多了讀者問魔術師有無做,或幾時會做槓桿。凡槓桿者,孖展借貸融資也;想當年在雙龍閃時代(見舊文《憶苦思甜「雙龍閃」》)之後,魔術師實在未彈此調久矣,事關做孖展始終係雙面刃,風險無端倍增,好端端的實在毋需咁搏。
所謂槓桿,就係投資人問貸款方借錢投錢,得以以少量按金操控大量資產。如果用100蚊本金買100蚊嘢,無負債之下槓桿比率(leverage ratio)就係1(=100/100);如果投資人自己出40蚊,問人借60蚊,買100蚊嘢,槓桿比率就係2.5(=100/40)。投資人除了要付利息給貸款人之外,萬一資產價格下跌,貸款人有權追投資人補加按金(補倉),直至回復到初始的按金水平;如投資人無錢補倉,貸款人更有權將投資人的資產變賣(斬倉),如果依然是資不抵債,貸款人可以追收差額,投資人有可能要破產收場。
物業按揭嚴格上也是槓桿投資,6成按揭正正就係俾4成按金(首期)買10成貨(樓),槓桿比率為2.5;所以8成按的槓桿比率就係5倍(=100/20),9成按的槓桿比率就係10倍(=100/10),如此類推。
理論上,假如樓價大跌,按揭銀行係有櫂 call loan;如果業主還唔起錢,物業就會拎去被拍賣,形同斬倉;但當然在實際執行上,銀行也不想逼死業主,形響企業形象,而且收樓拍賣所涉及的成本不少,所以只要業主能夠依時還款供樓,銀行大多不會 call loan。唯一有可能出事的,就只是以自身物業加按再加按套現「擁有」第二、三、四、五、六、七...層樓「整大個餅」的物業投資者,萬一市況逆轉收唔到租唔能夠以租代供,又或是因為其他任何原因導致資金鏈斷裂,其「餅」就很可能要淪為銀主盤了。
魔術師如同大部份樓奴一樣,都有一間自住樓物業按揭,理論上是有槓桿成份(魔術師現時的槓桿比率低於2,即貸款額低於樓價5成),但由於自住樓不能算是「投資」,魔術師便打過馬虎眼唔將層樓當係「槓桿投資」了。
魔術師自己也有用信用卡分期套現來買股票(見《信用卡分期不「裸借」》),不過由於操作上屬於「分期付款購物」(跟分期付款買部電腦無分別),亦沒有被追孖展的風險,故此也沒有將之當成係「槓桿投資」。
另外一種「偽槓桿投資」就係持有認購期權長倉。以匯豐控股(00005.HK)為例,2017年8月4日收市價為$78.50,即月及下月認購期權收市價如下:
(圖片來源:香港交易所 > 統計數據及研究 > 衍生產品市場統計數據 > 每日市場報告 (2017 年 8 月 4 日, 星期五)
以8月份$70 call為例,期權金收報$8.58,即是可以以$8.58買入以$70「擁有」匯控的權利,槓桿比率為9.15(=78.50/8.58)。其中概念上,認購期權的內在值$8.50(=78.50—70.00)可被視為「孖展按金」(或「首期」),而「溢價」(或「時間值」)$0.08(=8.58—8.50)則可視為認購期權買家付給賣家的「孖展利息」。
如果到結算時,匯控收報低於$70,$70 call 無法被行使,期權價變為$0,就等同於在$70斬倉。不過與一般槓桿投資不同的是,期權買家就肯定唔使補倉,更唔使上身,代價就係一日未行使,一日都無股息,呢啲都係同「真・槓桿投資」唔同嘅地方。
咁價外期權例如8月份$85 call又點睇呢?舉一反三,咪就可以當係孖長0按金/首期(即10成按揭),全部期權金$0.16為時間值,即係孖展利息囉!
***
另外,在天路客那邊見到有此奇異問題,頗有些乜sir的債劵疊增的影子:
william 6/22/2017 4:06 上午
有些地方想不透故想請教天路客兄,如下
ex
1.房子抵押八成套現100元 需要付銀行年利息1.6%
2.拿這100元去ib買債券a 100 票面利率4%
3.再槓桿80元去買債券b 100 票面利率5% 需要付ib 年利息1.8%
4.債券a債券b同時每半年拿到利息,一年兩次
5.每半年拿到馬上買債券c 100 年利率 4.5% 賺取複利
6.持有直到又賺了一百元賺回一個本金
有4個問題
a.槓桿率是多少?
b.ib維持率是多少跌到多少需要補錢?
c.賺到100元要多久時間?
d.複利半年一次跟一年一次有差別嗎?
謝謝
由於不知道原先房子的按揭比率是多少,難以知道實際本金,故只好假設「做按揭做到盡」:現在樓價為600萬,本金120萬,借8成即480萬,其中100萬為加按套現,即現價比原來樓價升值125萬(=100/80%),原來樓價為475萬(=600—125),原欠債為355萬(475—120),原槓桿比率為3.96(=475/120)。
(圖片來源:香港按揭證券有限公司 > 按揭保險計劃, retrieved at 6 Aug 2017)
假設2017年1月1日完成按揭,套得資金,馬上買入債券A及債券B;在7月1日收到債券A及債券B的票息後買入債券C;在2018年1月1日再收到債券A、B、C的票息...再假設物業按揭與槓桿融資利息均以單息計算,得出下表:

答案:
1. 於2018年1月1日,本金為物業首期120萬 ,總資產為萬(物業$600萬+債A$100萬+債B$80萬+債C$4萬),槓桿比率為6.53(=78/120)。
2. 不知道,要問IB。
3. 一年以來,淨資金流入$1.05萬,「賺」到的是4萬元債券C(債劵A和B都是借回來,最後本金歸還就會抵銷借款),淨額為5.05萬;以簡單複式計算,賺100萬需時19.8年(=100/5.05)。
4. 話明係複利,當然有差別,但如果息差細,時間相差就不是很多。
***
伸延閱讀:
憶苦思甜「雙龍閃」
信用卡分期不「裸借」

8 則留言:

  1. 多謝魔術師,最後個簡單例子好易明,我一直都想知正式應該點計槓桿比率!
    話晒咁大舊錢,真係最重要知道自己做緊乜,風險管理好重要。

    回覆刪除
    回覆
    1. 不用客氣。 我剛剛也發現了個Excel 入錯了貸款利率, 現在已經更正了.

      刪除
    2. 而家個人想融資的渠道真的很多,信用咭、稅貨、加按、IB等等,如果真係全部用晒,一出黎做野應該都可以操盤百幾萬。

      貸款利率的話,信用咭平息係計算上應該比較方便。IB利息係每月計,其實會比本身利率多左(又係複利),我計算大概係多3%左右(由2.6變2.678%)如果仲keep到咁低息就唔算好大差距

      刪除
    3. 其實現在不同渠道的融資利率相差不遠,最大分別是可借金額. 始終我個人比較保守, 拎一大舊錢去IB做孖展會做成心理壓力, 而且我一枝公日常使費大極都有限, 又唔係有野心要做啲乜嘢, 無需要搏到咁盡.

      刪除
  2. //萬一資產價格下跌,貸款人有權追投資人補加按金(補倉),直至回復到初始的按金水平
    到 所需的「維持」保證金水平 ,而一般來說維持保證金水平比初始保證金水平低。

    回覆刪除
    回覆
    1. 我是依書直說,以期貨交易來看待了, 股票孖展的做法未能在文件中找到:

      Study Manual for Paper 1 Fundamentals of Securities and Futures Regulation of the Licensing Examination for Securities and Futures Intermediaries version 2.8 (Aug 2016)

      5.17 Maintenance margin requirement levels represent the minimum amount of protection against potential losses at which the HKFE Participant will allow its customers to carry a position or portfolio. Should the margin requirement on deposit fall below the maintenance level, the HKFE Rules require that the account be re-margined back to the initial margin requirement level.

      (按:HKFE refers to Hong Kong Futures Exchange Limited)

      刪除
  3. 在現時低息環境越來越多人用槓桿的市況下,魔術兄可以獨善其身,心態認真強大。

    回覆刪除
    回覆
    1. 謝謝鼓勵. 其實無話意志堅唔堅定之類, 有需要做嘅我便會去做囉. 暫時我又見唔到呢個需要去做槓桿, 咁咪唔做住囉.

      低息只係話借錢的成本低咗, 但低成本不應是創造需求的 driver. 有錢可以俾你借又唔等於你一定要用; 我都可以當成係 buffer, 循環信貸咁, 有個信貸額係度俾我,有需要時先用囉。

      刪除