長者退憂屋

富爺爺富嫲嫲回流退休，搬入大西北，為咗吸引孫仔孫女來探望，竟然不惜工本以２,０００萬掃入連天台複式單位，可以一齊燒烤咁話！乜依家呢類ＣＣＴＶＢ膠劇結局橋仲會吸引到班細路嘅咩（３７：２８—４８：００）？

樓盤傳真 2017/12/16 2017/12/16 23:15

元朗尚悅‧方以三高姿態開盤，高呎價、高按揭成數、高管理費，無視美國加息及香港拆息逼近1.1厘的九年高位。而長沙灣傲凱、及將軍澳MONTEREY，同樣高溢價開售，均銷情冷淡。
新地北角海璇開標，逾五萬元呎創出港島東住宅呎價新高，卻有部分傳統低密度住宅落後大市。翻查又一居過去一年成交，國語拼音客絕跡，是否與樓價落後有關？
新地西營盤明德山入伙，驗樓單位325呎，樓價800多萬，而同款單位月租22,000元，租住會否更划算？歸納新地當日提供的按揭方案，供租大比拼找出答案。
退休夫婦，由外國回流返港，為的是多與兒孫共聚，搬入元朗峻巒，享受屋苑綠化環境，設計也要以共聚天倫為目標。

咁有錢點解唔買獨立屋，反而住分層？魔術師淨係知道人稱頂樓對落一層的「鳳凰層」，樓價反而比頂樓更高；因為頂樓夏天大陽直接哂住又熱，打風落雨時天花又易滲水是也。講到頂層連天台咁好住，魔術師真係識條鐵：

只有兩夫婦住，無工人，用不着四房雙套（左上）。設計師唔使問當然就是將近主人房的睡房全打通，房門移出，即時連走廊都可以用埋（右上）。將主房與客１打通後，放完大床，床尾仲可以放梳化，對面牆掛電視（左中、右中）；電視下有雲石枱，可供男戶主工作，女主人亦可以在此化妝，共享空間（左下）。客房２原先門口封掉，改由主人房進入，化身衣帽間，不過就無乜裝潢（右下）：

設計師話飯廳太過空闊，俾人一眼望穿（左上），無乜安全感，於是整色整水加個屏風同矮櫃（右上、左中）。設計師又話樓梯位無位裝燈，為免屋主上落樓梯時好似魔術師咁跣腳跌親，便造成貼牆貼地滲燈設計，樓梯級仲要以土豪香檳金金屬板包起（右中）。上到天台，設計師話係一家聚會的好地方：遠處有梳化，近鏡頭有木餐檯以供開餐，仲有石製吧枱俾戶主一家燒烤時放食物用具等，但說好的燒烤爐可以放起邊？真係木宰羊（左下）。另一邊就有種植區，以供女戶主消遣（右下）：

個露台由客廳伸延到客房，長到可以打保齡球（左上、右上）。設計師為了賺錢增加氣派，使加裝了電動窗簾，就連百葉角度都可以用遙控調較，全部閂埋打得（左下），打開透光亦得（右下），得咗！

廳外景色暸闊，採光度十足（左上）。客房３門用條子暗門設計，唔講唔知邊度係門（右上）。打開牆上四幅畫隔離的隱藏門，就是客房，給孫女間唔時來住，簡約設計就夠（左中）。主人家唔知作何營生，竟然收藏有銅像同大型雲石枱（右中、左下），不過睇起來都夠氣派，唔似得一屋模型咁 kidult。既然屋主自己傢俱自己出，設計師唯有幫手配下餐椅，用雲石整下矮櫃擺紅酒咁（右下）。

魔術師成日見到呢啲天台設計，都唔明打風落雨屋主點樣收埋頂樓啲戶外傢俱？今次仲要係兩位兒孫滿堂的退休人士，又無請工人，可以點搞？雖然話係用「戶外木」物料，但係天台梳化又如何保養？又頂得住黑雨、十號風球吹襲嗎？

查實，諗埋咁多 fancy 嘢，不如諗下老人家病痛開始多，醫療配套反而最緊要。就算係預約診治，住私家醫院都要出市區；又萬一兩老到時有乜依郁，睇起急症上嚟，新界西聯網就只有屯門醫院係最具規模，都勿話唔遠也。