2018年5月11日 星期五

Claim 完保險再食雞

真係估佢唔到,魔術師昨天下午將申請表以電郵寄回法國醫院(見《續・天敵(四)之保險佬》),今日就收到電話話藥費清單已經準備好,魔術師可以隨時去會計部拎。會計部仲要係收晚上八時,魔術師放咗工去剛剛好;而更令人喜出望外的是:打印呢份清單係唔使收錢的!

拎完藥費清單,魔術師便跳上由法國醫院去旺角的紅 van,食完晚飯再返屋企。紅 van 在先達背後的花園街落車,再行兩步竟然就見到呢間手撕雞專門店(見《食雞食着債》),更出奇的是竟然有飯和冷麵堂食(呢間嘢多數的分店都是做外賣,少數如上環店會有飯和冷麵餐,但同樣都是外賣),於是一於坐低,叫了個手撕雞拼雞腎冷麵,加辣,仲有一小碗例湯送:

有時少少地一個餐,唔食咁飽,仲好似精神爽利咗咁,感覺都幾良好。個餐盛惠40大元,真係幾抵食。
***
伸延閱讀:
續・天敵(四)之保險佬
食雞食着債

6 則留言:

  1. 哈哈哈 仲以為魔兄食雞係食最近大熱果隻PUBG添

    回覆刪除
    回覆
    1. 哈哈, 我仲係打緊三國無雙斬的說(我係無課玩家,進度係慢一啲架喇!) XD

      刪除
    2. 遊戲既野最緊要一個字~~ 爽
      依家D死人驚搞到大家太忙,一味要課金,失去左輕鬆一下既樂趣呢
      不過反轉來詋,依家D驚令到D人咁沉迷,身為QQ既股東都唔知算唔算係一件美事~
      又再反轉來說,無課玩家在訓練紀律同定力(唔課金)都係一件幾過癮既事黎既
      雖然小弟有D手遊都會課下金buy some time 但大課就只能留給後生果批支持下中日台既經濟了

      刪除
    3. //又再反轉來說,無課玩家在訓練紀律同定力(唔課金)都係一件幾過癮既事黎既

      呢個係一個幾有趣的題目, 作為無課玩家, 我會去諗點樣最省遊戲資源去optimise個遊戲流程, 都有啲經濟學概念. 等我諗下下個星期有無時間寫.

      //依家D死人驚搞到大家太忙,一味要課金,失去左輕鬆一下既樂趣呢

      D, 課親金都幾百, 課多幾次PS4都買到部喇, 使乜玩手遊?

      //但大課就只能留給後生果批支持下中日台既經濟了

      佢地只能夠從遊戲中向上遊了.

      刪除
    4. 依家PS4都要你課金買DLC(額外內容)
      有些更無良game廠, 隻$500的game弄得只完成3分2一樣, 迫你俾多200-300買DLC去玩欠左的3分1
      其實這樣的不良消費體驗極度趕客


      刪除
    5. //有些更無良game廠, 隻$500的game弄得只完成3分2一樣, 迫你俾多200-300買DLC去玩欠左的3分1
      其實這樣的不良消費體驗極度趕客

      電車業慣咗咁樣操作, 美其名為「分 phase 出」。 我就唔會幫襯呢啲咁無良的遊戲開發商嘞!

      刪除