2019年1月10日 星期四

瀕危物種:家教

這晚魔術師到屯門市中心的牛角來個單人網燒。人少少唔使排隊,笑容可掬、幾 pure 幾 true 、站在門口的知客妹妹問過魔術師係要食 À la carte 之後,便帶魔術師入座。
魔術師跟着知客妹妹去到座位,只瞄了一眼便知道不妥:知客妹妹給魔術師一個二人座,但隔離竟然係就係一一枱四人有青。
枱同枱之間的空間甚窄,但坐在梳化位有青是件有如肥豬腱的肥仔,仲要將右小腿打橫塞在左大腿之下,右腳鞋底向外,欄住半條路。
魔術師就算是身形纖瘦,但自忖亦未能唔食鞋底餅而順利通過坐入梳化位。
坐外面唔係唔得,不過係上菜位,魔術師又唔係咁想。
結果,魔術師連講都嫌廢事,只係作狀要行入去,跟手打個手勢,指住隻肥豬脾要肥仔自動縮開(否則就要祭出釘書機...)。
坐定定,點好餐,見旁邊班有青依然係自故自高談闊論,便趁有青們唔覺,順手將肥仔的坐姿拍下來:
其實,魔術師都有留意下公交車或茶餐廳上的客人的坐姿,發覺有唔少人都係鍾意咁坐。一係就係打橫咁蹺起二郎腿,俾鞋底餅人食(如果係啲佬着涼鞋或拖鞋就更核突),真係眼角望到都要洗眼...
幾時開始「家教」呢兩個字已經變成「瀕危物種」?需要我地多加保育?
魔術師自己都試過呢種將一條腿塞在另一條腿之下咁坐,但屈埋隻腳真係好鬼辛苦,又壓住血管,好易坐到腳痺,都唔知點解咁流行。唔通係新式瑜伽?
寫寫吓,忽然諗起蕭芳芳本《洋相》:
呢本書應該係當年大學新鮮人,剛出社會工作時的禮儀入門書藉,可以幫到一般普通人家出身的大學畢業生扮吓藍血,出到大場面都唔會怕失禮人。當然,近年社會貧富懸殊,偽中產5歲人仔就要踏遍七大洲五大洋,咁先叫見過世面;而草根有青呢?嗱,睇下班有青恨高而富球場恨都入骨,講禮儀只會被視作「離地」,要「貼地氣」當然就係要爛撻撻、無家教架喇!

17 則留言:

  1. 「講禮儀只會被視作「離地」,要「貼地氣」當然就係要爛撻撻、無家教架喇! 」我反而認為是霉體作的孽。當身邊有人之患推介「低俗喜劇」、大學教授電視上教大家講粗口時,民風又怎不會以爛撻撻為時尚? DM

    回覆刪除
    回覆
    1. //「低俗喜劇」
      //大學教授電視上教大家講粗口時

      子華神都講過, 唔知點解咁多人俾錢聽人在台上講粗口, 然後係咁係度笑...

      可能呢個社會真係壓抑得太耐.

      刪除
    2. 但真係有人對住佢地講又會起晒「桿」喎! 神奇! DM

      刪除
    3. //起晒「桿」

      己所不欲,請施於人。

      刪除
  2. 作者已經移除這則留言。

    回覆刪除
    回覆
    1. (打錯所以剛左重寫)

      家教幾錢斤? 可以Post 上IG/FB 呃like 或者同隔離陳太矖命嗎?

      上一代多數會教仔女要謙卑低調,唔好打搞到人地。而年輕一代學的係要維權要make some noise。總之以「我」為先,你唔鍾意咪唔好望囉。

      唔單止後生仔,好多阿叔都會咁(或者撐開兩腳,好似想拎中間啲嘢出黎散熱)。不過我地期望後生仔受過下教育,會理下其他人感受所以會有要求啫。

      刪除
    2. //上一代多數會教仔女要謙卑低調,唔好打搞到人地。

      呢啲上一代教育程度未必高, 但係識做人, 通情達理; 但個人性格都幾重要.

      好似我老粗堂阿哥咁, 十幾歲就由鄉間偷渡來港, 做地盤、酒樓等, 梗係無文化喇.
      我老豆都係十幾歲出來, 但係佢鍾意睇書, 學嘅係藝術手藝, 咁又唔同講法了.

      //撐開兩腳,好似想拎中間啲嘢出黎散熱

      我都唔明, 條J好痕咩?

      刪除
  3. 心理學雜誌講襯家長造成今天有青亂成一團的文章,都遭到家長群起罵到體無完膚。民主社會,少數服從多數,喺咁架啦!

    回覆刪除
  4. 有青雖欠家教,但廢中廢老惡行,是有過之而無不及。昨天放工,有阿毛拎住幾袋濕立立菜肉魚橫衝直撞,把菜水抺在路人上有,搭車時掛把餸菜在扶手上欄杆上,或把手推車仔攔在路中心又有。老人擘開大髀,一人坐兩個位更是常見到不得了,坐在旁邊更會發力把你迫開。還有在巴士站食煙,迫其他排隊的人硬食二手煙,亂掉煙頭,隨地吐痰... 整體而言,我覺得有青比廢中廢老應該好一點。
    TK

    回覆刪除
    回覆
    1. //整體而言,我覺得有青比廢中廢老應該好一點。

      正如網友 yan 所言, 「我地期望後生仔受過下教育,會理下其他人感受所以會有要求啫。」; 而且廢中廢老已經係過去式, 未來卻是屬於我們的有為青年們的, 兩者唔應該比較.

      刪除
  5. 無獨有偶, 當年我也買了一本蕭芳芳《洋相》看.

    回覆刪除
  6. //否則就要祭出釘書機..//

    笑左

    真係見識少,未見過有人在公眾地方穿着鞋子這樣坐的。或許我搭車時,只顧著看手機吧。

    回覆刪除
  7. 蕭芳芳《洋相》, 我大學時都問人借過來睇, 最記得芳芳姐總結的懶人包:
    "一味菜一套餐具, 有幾多套就有幾味菜, 由外到內, 甜品最上面, 就唔駛怕拿錯出洋相"
    一生受用

    回覆刪除
    回覆
    1. 可惜呢類做人嘅禮儀,已經隨着「做人要貼地」的網絡文化而被淘汰了。

      刪除