家徒四壁屋

首置客買２,０００萬西貢豪宅，厘印只需俾７５萬（相對來說，有樓揸手者就要俾ＤＳＤ，即是１５０萬），究竟啲錢係點嚟嘅呢？靠父母幹，定係「換樓」：先沽後買都可以當成係「首置」，呢種語言偽術又係點現法呢（３７：０３—４７：１８）？

樓盤傳真 2018/12/29 2018/12/29 23:37

2018 年樓市：先升、後跌、再回穩，上半年連創癲價紀錄，下半年隨即跌價、撻訂，有喜亦有悲，又一次引證香港樓市之極端現象，而推跌樓價？元凶，往往是前所未有的事，拖累發展商賣樓成績及政府賣地收入大減，各方對 2019 年樓市前景，繼續好淡爭持。
至於二手市場，2018 全年成交量，尚算追貼去年全年，而涉及的成交金額，大約有 3,320 億元，創八年新高。過去一年二手放盤，大約一半成功沽出，豪宅較難轉手。
年度驗樓高分王，由信和、新世界、新地三分天下。而何文田 KADOORIA 管理費每呎 9.2 元，跑馬地服務式住宅 THE UNIT 最細單位 91 呎，皆創出歷史紀錄。
夫婦習慣租住服務式住宅，首次置業，買入 2,000 萬元豪宅，設計要求延續服務式住宅感覺，時尚感最重要。

兩夫婦習慣租住服務式住宅，最多加埋個工人，三個人一齊住，唔需要追求「家的感覺」，只需要型，咁設計Ｃ就易辦喇！

本案為「三房半一套」，所謂「半間房」，其實就係位於單位上方的一個類似房的「空間」；由於無窗，所以亦唔能夠裝門建「房」（左上）。由於單位只有屋主夫婦二人加工人居住，於是設計Ｃ便將原主人房與及「半房」及房２打通，變成特大主人套房加男女戶主各自的衣帽間；房１則變成書房／打機房／影音房／客房，節目並沒有詳細介紹（右上）。飯廳有三幅特式牆：從客廳望去，左面擺滿人面碟子裝飾（雖然這些人面碟子並非人像、面譜，但魔術師仍然認為此等裝飾可免則免）；由大門引伸過來的就是水泥瓷磚牆特色牆，上面的燈掣仲好似 fire alarm；另一幅牆就係黑色斜條子牆身（左中、右中）。黑色斜條子上建有暗門，可通往廚房；廚房沿用交樓標準，沒有改變（左下、右下）：

基本上整個客飯廳都無乜櫃同裝飾，非常簡潔，認真係「家徒四壁」（左上）。餐枱可以拉長，可以透過玻璃枱面看到裡的金屬機關，帶點 Roland Iten 皮帶扣 feel；而餐椅都係黑色，同背面的黑色牆身配合，造成保護色的效果（右上）。Free stand 電視唔係好大，但就方便旋轉，無論係坐係梳化、定係食緊飯，都可以睇住楊ＯＮＱ發言（左中）；電視機頂盒及其他影音設備則拉線到連接房１牆後的企身櫃（右中），櫃的另一邊就用來放唔去旅行會死的拖篋（左下）。同樣，客次沿用交樓標準，沒有改變（右下）：

主人房擴闊後相當寬敞，三邊落床係奉旨的，床頭板和床頭櫃沿用簡潔設計，無甚花巧（左上、右上）。男戶主的衣帽間實際係得三邊櫃，不過以現今 dress down（即係黃Ｃ上司叫魔術師唔好着得咁身光頸靚）的潮流，男戶主仲有咁多西裝同領帶實在是非常 impressive（左中、右中）。女戶主則佔用了整個「半間房」來攏包包和衣妝，弧形衣櫃轉過去就係梳妝枱，並可作屏風之用（左下）；而梳妝枱張凳就十分似「滿清十大酷刑」中的「木馬」（右下）：

唯一無講到嘅就係，客房１都算有個企身櫃睇吓，至於工人房，就無得睇，無從知道２０００萬豪宅內，工人姐姐的居住質素喇！
＊＊＊
參考資料：

（圖片來源：《建築師的揀樓智慧》蔣匡文編著　萬里機構出版　２０１０年二月第二次印刷）

（圖片來源：Roland Iten Mechanical Belt Calibre R822 "Predator", retrieved on 19 Jan 2019）

＊＊＊
伸延閱讀：
香港政府一站通：印花稅收費