你既無心我便休

話說客席主持摩摩在《歷任上司評》中留言，提及其奇葩上司Ｒ。由於資料大過豐富，魔術師僅以時序重新整理如下：
２０１５年７月：摩摩入職。面試官為美帝上司Ａ及Ａ的上司Ｒ。Ｒ經摩摩查證，出身是 sales，並無 technical background（１）。
２０１５年９—１０月：兩至三個月來，摩摩跟A通常都有交流，但Ｒ卻是在公司直行直過，（扮）睇摩摩唔到，就算偶有同其他同事吹人，亦不會「預埋摩摩」。其間Ｒ見到摩摩上甜（大誤）與工作無關的網站，並怒斥了一頓（２）。
２０１５年１０月： Ｒ指派摩摩做某項工作，但就叫蝗廠的蝗下屬Ｊ監視摩摩進度，借啲易搵位入 lead 住摩摩（３）。
２０１５年１０—１２月：Ｒ指派的工作遇上阻滯，摩摩承受來自Ｊ的壓力；但來自Ｒ的壓力卻不大（４）。同期，摩摩與上司Ａ一同 sell 某個 proposal 俾Ｒ，結果俾Ｒ Ｄ到Ｘ忽開花；但摩摩事後細想，卻找不到任何 quantitative 的 comment（５）。
２０１６年初：上司Ａ下台，Ｒ變成摩摩的明文上的直屬上司，但對摩摩的態度卻是一貫的「冷處理」；而Ｊ則依然是不成文地高摩摩半級的存在。有乜依郁，摩摩第一個就要匯報俾Ｊ聽。
２０１６年１月 - ２０１７年１２月：雖然 project 係出自摩摩的手筆，但上司Ｒ就唔帶埋摩摩去做 present，反而會帶同是巷漂的心腹手下Ｆ上陣（６）。Ｆ亦疑似是奉命監視摩摩的工作表現，但由於資歷與職級都跟摩摩相差太遠，故被摩摩賞了一記臭臉（７)。上司Ｒ亦刻意唔同摩摩溝通，只係跟摩摩身邊的戰友Ｈ聯絡（８）。雖然如此，但摩摩仍能跟公司內其他同事相處融恰。
２０１７年底 - ２０１８年初：上司Ｒ與再上司Ｄ在公司內權鬥敗陣，要另開新部門，並將摩摩「過戶」，其時上司Ｒ方有較多機會跟摩摩溝通（９）。
２０１７年下半年—２０１８年４月：project X 同 project Y 都由舊部門過渡至新部分。根據緩急先後，摩摩全力先做 project X，亦得到上司Ｒ和半上司Ｊ的允許；但在某次 presentation 中，上司Ｒ忽然發難，謂理應做 Y，並追問 project Y 之進度（１０）。
２０１８年４月—８月：Ｊ本來要求摩摩以 agile 模式匯報 project Y 之進展，並謂不成功便成仁；但最後 project Y 根本是無人理，亦已被 plan B 取代。期間上司Ｒ與半上司Ｊ多次明示暗示摩摩係「最無價值球員」（Least Valuable Player, LVP），意味着可以自由轉會...（１１）
２０１８年１２月：Project Y 由新人Ｌ接手（１２）。

＊＊＊
魔術師分析如下：
１. 問題是主考官是誰？由於Ｒ不是 technical 人，有理由相信主考官是上司Ａ，亦只有Ａ才有能力分辨摩摩的技能是否適用。很可能再上司Ｒ是來「監視面試過程」，由於此人是sales oriented，理應看不順眼 technical guru，在面試時已經對摩摩印象唔好，甚至乎一早就想趕走Ａ。同時面試時亦礙於主考官是Ａ，所以便將計就計，「empower」咗Ａ先，容後再整治摩摩。
２. 此乃一痛腳位。一旦被Ｒ有藉口「自我感覺良好」，認為自已「料事如神」、「我無睇錯人」，無論幾細微嘅錯都只會 reinforce R 對摩摩的 bias。
３. 因為Ｒ唔想「管理」摩摩（魔術師自己也曾跟妹頭說過自己是「unmanagable」（即是桀驁不馴）的，要魔術師做嘢就要俾空間自行發揮），所以便叫較為「聽話」的Ｊ代勞，將「直屬上司」嘅責任外判開去。
４. 當然喇！Ｊ現在的責任就是要「管理」摩摩，Ｒ當然樂得「不在其位，不謀其政」。
５. 基本上只係一個藉口。無論Ａ及摩摩的 presentation 如何完美，Ｒ都可以用「（主觀地）唔鍾意」而 refute 之。
６. 可能Ｒ是 sales，個 present 一定唔會帶個不受自己信任的 tech guy（摩摩），以免佢講錯嘢自己都唔識得兜，倒不如帶個經驗淺，聽聽話話的「秦舞陽」去仲好。
７. 「打狗要看主人臉」，摩摩Ｄ９個監軍太監，肯定又係惹怒了Ｒ的導火綫了。
８. 「專登同你隔離嗰個傾計，但係就唔同你傾計」成４０歲人都仲玩呢種小學雞遊戲，未免太過失身份；但在職場上出現，其實當事人都應該心知肚明，應當早日求去了。或者更早的跡象就是「經常一開頭稍稍唔到題，就會被佢搶白一輪然後打發我走」，其實已經預示咗無運行，無謂在呢間公司浪費生命也。
９. 因為權鬥敗陣，Ｒ與Ｄ要開新部門，headcount 為重，所以才會「跪地餼摩摩」罷？有多一個人頭，總好過留返佢係舊部門「自生自滅」呢。講得唔好聽，這就是摩摩對Ｒ而言，最後的「剩餘價值」了。
１０. 有無Ｒ和Ｊ白紙黑字的 email，話做Ｘ才是 priority？既然已接近決裂階段，倒不如直接（平和地）話「做Ｘ先」，係「你地批准嘅」、「如果話要做Ｙ，可以再 prioritise，但此時此刻咁講法我真係好震驚」（７７７腔）...
１１. 其實Ｒ和Ｊ一早就知project Y 已被 plan B 取代，只係「俾啲嘢摩摩做」，到「真係證明唔到 project Y 有存在價值」的時候，就係藉口同摩摩 part company 咯。
１２. 至於要Ｌ接手，其實就係想藉此整死 project Y，證明「換埋看守領隊」，隊波依然係唔掂（話之你個看守領隊其實只係青年軍），來給個藉口 plan B 正名。畢竟Ｒ和Ｄ剛在權鬥中敗陣未幾，元氣未復，新部門的 budget 也有限，所以公司方向如果係要搞 plan B 的話，正好就找個機會篤死 project Y 的搞手，以證明自己的「存在價值」（做廠都做到咁多辨公室政治攻心計，呢間公司都可以休矣）。
＊＊＊
《書劍恩仇錄》中，金笛秀才余魚同愛上了人妻駱冰，但自忖人家夫妻情深，自己人才武功卻又不及其型仔老公四當家奔雷手文泰來，見了破廟中有「你既無心我便休」，便把心一橫，走去出家做和尚。不過，總是會有慧眼識痴漢（誤），千金小姐跟毀了容的金笛秀才不離不棄，結果余魚同還是「姣婆守唔到寡」，還俗娶老婆去了。
在職場中，有時都要知所進退，「你既無心我便休」，與上司關係不能搞得太僵，以免將來為 reference check 埋下伏線。以魔術師自己為例子，搞得最唔開心的就係同上司Ｓ鬧交，在魔術師轉 team 予妹頭後，Ｓ曾經寫評語話魔術師「唔尊敬上司」，但就被妹頭 refute 了：「我唔覺你唔專敬我吖！」。所以話，如果唔想 internal transfer，頂唔順既不如裸辭，休息一下（學余魚同咁出家做和尚），之後再出發，可能仲好。
最後，點一首歌給摩摩，就此作結。

＊＊＊
伸延閱讀：
歷任上司評