清一色選擇困難

日前魔術師已收到某專業團體的奪命追魂 call（通常呢啲情況只有在老媽在生時發生），溫馨提示魔術師１２月１９日「記住」去投票，支持完善咗的選舉制度。這天魔術師打開信箱，赫然就見到選舉投票通知書（幸好沒有寄錯資料，見伸延閱讀）。

由於魔術師唔係選痿會同埋無能組別選民，就只有一票投直選。諗諗吓魔術師都重新畫界的十大選區都係不甚了了，所以就上網先暸解一下：

（圖片來源：香港特別行政區政府 選舉管理委員會 > 2021年立法會換屆選舉地方選區分界 > 分界圖索引, retrieved on 4 Dec 2021）

魔術師居住的屯門區是屬於ＬＣ８新畀西北區，果然不愧「大西北」之名。ＬＣ８有三名分區直選候選人，分別是１號周浩鼎（頂爺）、２號田北辰（田二少）、３號黃俊瑯（郎郎，或丙郎），三人競逐兩個「出線席位」：

１. 先睇頂爺的「選舉信息」，魔術師就唔係好明「工業４.０」究竟係乜，１.０至３.０又係乜嚟嘅呢？實在無心機去問谷歌神找答案。至於通唔通關和健康票，恐怕都要問過新變種病毒 Omicron 甚至日後的 upgrade 版才知，未必係人力可以說了算。另外，見到頂爺個 email 仲用緊 hotmail.com.hk 真係令魔術師「不禁倒抽了一口涼氣」，同個 QR Code 真係唔係好夾。最後，究竟個 QR Code 係乜嚟嘅呢？沒研究便沒發言權，魔術師當然要親身感受一吓，原來是頂爺在蛇齋黨的選舉專頁：

（圖片來源：頂爺２０２１立法會選舉專頁, captured on 4 Dec 2021）

再最後，魔術師都見到頂爺有助理在屋企附近派吓傳單，算係有做嘢咁。

２. 田二少的「選舉信息」就四平八穩，通篇都係講緊「善意批評」，小罵大幫忙。同埋，田二少果然係「企業家」，email 係用自己 domain（＠michaeltien.hk），果然夠哂專業。

３. 郎郎（或丙朗，３者丙也；３亦為Ｃ，即「Ｃ朗」也）的「選舉信息」就走簡約路線，只係「萬藍叢中一點白」，加句「你真係想清一色？」，不過就無講係唔係選咗佢就唔會「清一色」呢？究竟丙朗係白點，定係「大海藍」呢？木宰羊。再睇返丙朗相頭，魔術師就覺得個嘴有少少「木」，屬「吹火嘴」格（有錯請更正），唔多受落。最後，丙朗兄個 email 竟然唔係私人郵箱，而係 general mailbox（thirdsideoffice@gmail.com），似乎爭咁啲誠意囉。

究竟投邊個好呢？魔術師當然唔會在此 disclose。以魔術師咁多年都有去投票的慣性，即使２０１９區會選舉都照樣「行禮如儀」，應該唔會唔去投或者好似啲黃人咁無聊只為表態而去投白票嘅。

（註：溫馨提示，各位網友留言時請注意不要觸屬選舉條例，只要提及一個候選人的名字，便要講哂其他相同界別或選區的候選人名字方可。)

＊＊＊

伸延閱讀：

選民收非所屬選區候選人簡介　選舉事務處致歉　稱因承辦商包裝資料時出錯2021-12-03 23:02:12

【有線新聞】有選民較早前收到不屬於自己選區的候選人簡介，選舉事務處致歉，說是合約承辦商出錯。

選舉事務處說有選民通知收到不屬於自己選區的候選人簡介，調查後發現合約承辦商包裝資料時出現人為錯誤，將另一選區的候選人簡介錯誤地寄給數十名選民，處方正在盡快安排，將正確的候選人簡介重新寄給受影響的選民。

選舉事務處對事件引起不便深表歉意，會加強監管防止同類情況再發生。