2022年9月29日 星期四

摩摩電影節之《除暴(Caught in Time)》:公安就是偉光正

上月影評留言講到話題作《明日戰記》由劉浩良編劇,而本片則唔只係由劉編劇,佢仲做埋導演添。本片正正就是劉編導根據真人真事改編的大陸警匪片,唔使講一定好有教育意義!

***

本片一開始就是長鏡頭表演:一名公安警察(王千源飾)被眾蒙面匪徒綁了換換提挾持上車,被匪徒頭子(吳彥祖飾)百般侮辱,要公安講個笑話,好笑的話才饒他一命。這時有警車追來,匪徒頭子將蒙面頭罩笠在公安頭上,要將他挾掟出車阻截追兵。這時公安警察發起狠來咬了頭子耳朵一口,眾匪合力制服公安,將他推出車外:

原來公安警察是剛調來普城上班的隊長鍾誠,在車站遇上負責接他的同僚光華。在離開車站之前,鍾誠叫埋光華一齊將貼在公安機關宣傳版上的各式招紙撕去,證明鍾誠是個一絲不苟愛上警察這個職業的白警。在路上鍾誠見到怪事,友誼商店日光日白無理由關門,便走上前去調查,果然見到眾悍匪在持械行劫。匪幫一早就在制高點放置了人手睇水,哨兵見鍾誠有行動便馬上叫眾匪散水。眾匪便趁鍾誠打電話叫支援時偷襲,將他捉上車:

這群匪幫已不是第一次在常普犯案,公安廳紀錄一疊叠咁多。鍾誠一來到便察覺到匪幫故意用較短彈殼的子彈,誤導公安追查槍械彈藥來源的線索,在眾同僚間顯出幹練精明的一面:

匪幫頭子以買月曆做暗號購入槍械,又再想食大茶飯,又去踩線測試報警後警察要多少時間才到達,以計算可容許的犯案時間。鍾誠在分析匪幫的行動,估算到匪幫中有人負責監視警方行動。匪幫今次要打劫銀行,頭子想到單就用繩子加上槓桿力量就可以同時拉爆四個夾萬門。鍾誠等又來遲一步,知道匪幫們打開夾萬的方法,甚至乎在對面街的食店食住麵睇班公安做大戲查案,都感到呢班匪幫唔簡單。

警方將匪幫頭子代號老鷹,是一連串「特大搶劫殺人案」的主腦。鍾誠查到老鷹幫的彈藥是從月曆佬購入,便從月曆佬埋手,要他「警民合作」。在某次老鷹打劫銀行期間,鍾誠集中打擊佔據制高點觀察警方動向的匪徒沙皮。沙皮中槍跌落樓,老鷹為了滅口,倒車回現場跟警方火併,成功將沙皮炸死,然後逃脫。眾警今次雖然有小成果,但鍾誠卻大罵「偉光正」的組女陳倩(衞詩雅飾),話佢既無槍又無連避彈衣,槍戰中走去勇救小女孩好易攬炒。

老鷹幫兄弟嚷着話要幫沙皮報仇,但老鷹制止了,說不讓警察捉到就已經係最大的報復,不過臨走前也要向警方示威,用「一條繩」綁了負責押運現鈔給眾警出糧的伙記,卻沒搶去眾警的工資,鍾誠打開屬於自己的工資信封,只見鈔票上寫着「你還欠我一個笑話」。由1991年至93年,老鷹幫周圍遊走犯案,有時 cheap 到連真・礦場工人(唔係比特弊的「礦工」)的工資都搶埋(都有三幾百萬)。眾礦工不忿有汗出無糧出,便去搶其他人的物資,鍾誠見班礦工咁鬼低質素,只能幫礦工們做一吓思想教育「別人犯法不等於你們也可以犯法」,仲拍哂心口話會破案。

老鷹在慶州踩線期間於夜市遇上了一名給相士睇死佢「無論跟着什麼男人,都不會有好下場」的女子(春夏飾),老鷹勸到女子唔好去跳樓,仲順便成功溝埋添。鍾誠在市內佈置了許多天眼,老鷹要找目標下手有難度。鍾誠一個人頂住眼訓睇 CCTV 片找線索,組員齊兵卻只識開玩笑話「一毛錢都不能被老鷹搶走」,結果鍾誠體力透支,昏倒在地。

話都無咁快,原來老鷹已經同女子同居了一段時間,老鷹見到枝棒棒有兩間,明顯就係阿嫂「中咗招」,而阿嫂亦都知道老鷹是大賊,更對老鷹媽非常孝順,買咗個助聽器做禮物送俾奶奶。老鷹以暗藏約了暫時轉了行去走私的同黨們到羽毛球館商議做案,同時鍾誠也從各種蛛絲馬跡猜到老鷹要打劫解款車。在老解款員跟有青解款員的情誼、有青解款員跟天使銀行女職員之間的約會、老鷹把手榴彈送給街邊蝗孩的喪心病狂、與及鍾誠組齊兵約光華破完案去食麵的 LGBT 描寫下,搶案開始了。

老鷹幫暽間解決了眾解款員,銀行女職員看着愛郎死在面前。眾匪搶完解款車離去時被負責追緝老鷹幫的「專班」鍾誠小隊圍堵,雙方在街頭爆發激烈槍戰,匪徒司機被當場格斃,警察方面齊兵亦身中多槍。齊兵以最後一口氣拉開了老鷹幫貨 van 的尾門,要老鷹一開車所有錢箱都掉到街上。「偉光正」的公安齊兵拼死完成了「一毛錢都不能被老鷹搶走」的諾言,他的犧牲沒有白廢,眾警加緊追捕,又在一組長鏡頭調度下轟斃一匪,捉到另一個,但光華卻因撿走手榴彈時被炸傷,失去一臂。

鍾誠從匪徒身上的傳呼機訊息找到了老鷹的女人文娟進行監聽,但依然給老鷹以暗號跟文娟聯絡上。警方圍堵拘捕了文娟,又強檢了她的住所,搜出結婚證書和照片等,得知老鷹真名叫張隼。鍾誠小組又破解了張隼打給文娟的密碼,去到約定的時間地點拘捕了「張隼」- 但原來這位「張隼」其實是老鷹同伙假扮的。

鍾誠在文娟家中搜出買給張隼媽的助聽器,猜到張隼必定「返了鄉下」(點解唔可以係文娟買俾自己家裡的長輩?)。張隼果然返了屋企去探望耳聾又有點痴呆母親(鮑起靜飾),給她說笑話,又承諾買個新的助聽器給媽媽。斷臂痊癒的光華傳來訊息,賣槍給老鷹的月曆佬的妻兒死在他自己賣的槍彈之下,月曆佬抵受不住也自殺身亡,算是惡有惡報。光華跟鍾誠一起撕去貼在「打擊犯罪 堅持不懈」的公安直傳的街招,足證為了捉拿老鷹歸案,犧牲一條手臂算不了什麼。鍾誠從老鷹從來沒有在雲峰市動過手,猜出這就是老鷹的「鄉下」。

鍾誠從月曆佬臨死前交出來的傳呼機中收到老鷹傳來的訊息,猜到在「一直下雨的地方」見面就是指澡堂。鍾誠在雲峰市逐間澡堂查問,最後找到一位聽力有問題的老闆娘,鍾誠便知道是找對了地方。張隼媽知道鍾誠來意,只得無奈地讓他進去找兒子。鍾誠通知了陳倩要求支援後,便圍着浴巾走入澡堂跟張隼來個赤條條的大戰。雙方互嗆打一輪嘴炮之後便開始肉搏,當然最後是偉光正的公安鍾誠獲勝,得以拘捕張隼,而雙方的浴巾在激烈的打鬥中都沒掉下來。

最後,鍾誠跟法庭證實張隼媽與案無關,文娟雖被判有期徒刑9年,但因懷有身孕,得以「保外坐監」,可謂非常人道。而張隼則被給予「一條繩」,被綁往刑場跟其他同伴一起打靶(文娟相士批命話佢同任何男人都無好結果,還是蠻準確的)。最後,當然要宣傳一下自90年代起,中國大陸對槍械執行嚴格管理,暴力罪案一減,是世界上最安全治安最優良的國家之一(尾帝真係連車尾燈都見唔到)。最最後,就係揭曉當日,鍾誠被張隼捉上車時講過啲乜。原來鍾誠曾誓言「一定會咬住佢唔放」,果然是說到做到了。

***

本片貫徹國產片、合拍片的宗旨,警匪片都係要惡有惡報,除了老鷹及其同伙呢班主犯之外,就連賣槍的月曆佬都要死全家,最後自殺身亡,劉浩良又未免寫得太過「天網恢恢 疏而不漏」。

睇完全完,魔術師不明所以的地方甚多:

1. 老鷹幫的定位唔係好似《紙房子(Money Heist)》的教授團隊咁以俠盜自居,只係「為了私利」去搶劫濫殺,唔會得到群眾支持幫手着草,落網風險非常之大。既然係人都知道大陸有死刑,拉到一定無好結果,老鷹幫仲咁搏為乜?

2. 唔知係咪本片的主線套路實在太過簡單,《盜火線(Heat)》式的街頭槍戰拍得太多太濫亦開始有啲悶,於是劉大導便嘗試加添一啲「人情枝節」,講吓無論係老鷹自己定係佢嘅受害人都係「有血有肉」的人,於是就加添有幾段「散修修」的片段,但就支離破碎,唔知劉大導想點...例如被搶去工資的的礦工要違法達義搶返其他人轉頭、銀行與解款車的小情侶呢幾段,其實 cut 走對劇情都無任何影響。甚至乎,張隼與文娟的感情線交待得頗為突兀,焦厘頭一個市集遇見嘅女子就可以跟老鷹山盟海誓,老鷹就信得過文娟明知佢係大賊都唔篤灰。

3. 解款車的錢箱跌落地就打開,銀紙飛滿一地,卻沒有什麼噴顏料等防盜功能,十分落後。這是真的嗎?

4. 公安出糧用現金,這又是真的嗎?

5. 不時賣弄長鏡頭,開頭到中後段都各有一次短短的幾分鐘。魔術師就覺得呢類賣弄無小兒科,要拍長鏡頭不如學吓查理絲花朗(Charlize Theron)在《原子殺姬(Atomic Blonde)》那或真或假的10分鐘長鏡頭打鬥戲,就算有「出術」人哋都遮得好有技巧也:

6. 最後少不了的當然就係終極戰中戰打不掉的浴巾,叫人十分出戲。

除去以上的 bug、砂石、處理得唔夠好(應寫就唔寫,唔使寫就寫)同埋賣弄之後,本片都唔係一無是處嘅:起碼有鮑起靜出色的客串,單就是幾分鐘的戲份已夠壓倒全場;另外就係經常被貼滿街招的公安文宣,由鐘誠隊長到受傷後的光華都仲 keep 住撕街招,用來暗示縱使民眾對警方「有事鍾無艷 無事夏迎春」,眾公安依然是仆心仆命為人民服務。呢個描寫就幾 okay。

魔術師評分:75分(基本)+5分(鮑起靜)=80分(100分滿分)

***

伸延閱讀:

維基百科:劉浩良

《犯罪現場(A Witness out of the Blue)》:姓古這個人的噚日戰記

14 則留言:

  1. //就連賣槍的月曆佬都要死全家,最後自殺身亡
    唔係吖,老鷹叫做有後送終。

    //既然係人都知道大陸有死刑,拉到一定無好結果,老鷹幫仲咁搏為乜?
    //是世界上最安全治安最優良的國家之一(尾帝真係連車尾燈都見唔到)
    其實GRANDPA係90年代真係武德充沛到離譜。兩條村嘅爭執最終演變成武裝械鬥,不單止步槍,甚至出動到迫擊砲對轟,要由老解干預才收拾殘局。就算近年「槍械執行嚴格管理」,也偶然會繳獲重機槍,不過睇相唔知流定堅了。
    有一個說法,90年代蘇聯解體讓充滿理想的人都絕望起來,唯有把精神體力都放在酒色財氣上,「不是說讓一部份人先富起來嗎? 那就由我先富起來吧! 」巧取豪奪、無法無天......

    WILL

    回覆刪除
    回覆
    1. //唔係吖,老鷹叫做有後送終。

      就係主犯都有氣送終,月曆佬反而死全家,「刑罰唔合比例」(黃人腔)囉! XD

      //「不是說讓一部份人先富起來嗎? 那就由我先富起來吧! 」巧取豪奪、無法無天......

      成日強調要「依法治國」,亦即係話「依法治國」尚有不足之處...又係反思之處,如果地方正苦能夠公平地 settle 各類型事故的話,就唔會有咁多人以鬧事(例如「醫鬧」中醫療事故病人家屬毆打甚至殺死醫生)來解決事情喇!

      刪除
    2. //如果地方正苦能夠公平地 settle 各類型事故的話,就唔會有咁多人以鬧事(例如「醫鬧」中醫療事故病人家屬毆打甚至殺死醫生)來解決事情喇!//

      係一個公信力既問題, 也是傳媒操控力既問題
      伊朗個女仔死既事件, 伊朗連條片都放埋出泥, 媒體話係伊朗政府殺既, 就係伊朗政府殺既
      仲可以點? 叫美國佬泥驗?
      --Dogdogchi

      刪除
    3. //係一個公信力既問題

      我覺得係公信力的問題,又或者社會氛圍都係陰毛論橫行的問題。

      //媒體話係伊朗政府殺既, 就係伊朗政府殺既

      只要有「敵對霉體」嘅存在,就唔會有某些霉體可以「隻手遮天」的情況。

      刪除
    4. //只要有「敵對霉體」嘅存在,就唔會有某些霉體可以「隻手遮天」的情況。//

      係美帝就唔駛封殺 侵侵啦
      --Dogdogchi

      刪除
    5. 所以侵侵都要「被逼」另起爐灶囉!

      刪除
    6. //只要有「敵對霉體」嘅存在,就唔會有某些霉體可以「隻手遮天」的情況

      遙想當年塞爾維亞米洛舍維奇被冠以屠夫的名號,又被控欲以種族滅絕罪行,最後係佢死於海牙法庭內(2006年) 9年後才裁定米洛舍維奇在波黑戰爭中未對克羅地亞犯下種族屠殺罪行。人死了、南斯拉夫分裂了,然後假惺惺地還一個公道俾佢,真係十分化算。NATO 用子虛烏有嘅罪行入侵南斯拉夫係解放百姓於水火; 俄國要去保護30年同一國內同文同種嘅斯拉夫人免受納粹逼害就俾千夫所指。最近當住全世界面前炸了北溪1、2號,「敵對霉體」最終能勝過CNNFOXABC又如何呢! 歐洲依舊要向「孽癌汽」出產地一船一船咁買以免斷氣。

      WILL

      刪除
    7. 同黃霉一樣,求其噏完一樣嘢破壞咗正苦的形象之後,就算發覺唔啱,最多就係登一細格道歉啟事,但傷害已經做成,根本於事無補。記憶中日月神報都好似試過係咗。
      所以霉體不分敵對定係友方,總之就係先下手為強,不理真假,寫先嗰個贏。

      刪除
  2. //原來公安警察是剛調來普城上班的隊長鍾誠
    個名真喺偉光正,冇可能喺奸角....

    //頭子想到單就用繩子加上槓桿力量就可以同時拉爆四個夾萬門
    啲銀行夾萬門拉到飛起, 繩又咁都唔斷簡直喺神級

    //來個赤條條的大戰。雙方互嗆打一輪嘴炮之後便開始肉搏
    //而雙方的浴巾在激烈的打鬥中都沒掉下來。
    腐女表示不滿XD

    //被綁往刑場跟其他同伴一起打靶
    有冇活摘器官呢?

    我覺得吳彥祖唔喺太啱做呢個角色,除非喺由好變壞。呢齣一開始就壞,又咁黑白分明。

    回覆刪除
    回覆
    1. //啲銀行夾萬門拉到飛起, 繩又咁都唔斷簡直喺神級

      呢齣戲啲銀行夾萬、解款箱都好兒戲。

      //我覺得吳彥祖唔喺太啱做呢個角色

      佢個樣似海龜派多啲。

      刪除
  3. 祝魔兄及各網友新年快樂!

    新年流流無咩野做,係時候還返啲“文債”。

    本片事件原型為90年代的張君案,戲中主角名字“張隼”應該取“君”普通話發音jūn的諧音隼sǔn。

    整套電影最深刻是:將90年代大陸的街景、建築、日用品和衣著還原得非常好--衣著算是容易(最簡單是“無大陸男人著牛仔褲”,直至約05年前都是過關後分辨香港和内地男人的不二法門),但以本片拍攝時間為18至19年交界,很多内地城市保留的90年代建築已經不多,一整條街景更是難揾,相信除了維基所言“導演劉浩良在前期耗時數月搜集資料”外,美指、道具和攝影都應記一功。

    (小弟人生第一次上大陸是98年聖誕節,當時周圍物事只比片中稍為新净先進,再對比眾多例如《丐世英雄》的影視紀錄--即是處處都殘殘舊舊、污糟邋遢,建築設計又毫無美感,足証此片的還原程度。)

    //鍾誠查到老鷹幫的彈藥是從月曆佬購入,便從月曆佬埋手,要他「警民合作」

    留意每次和月曆佬接頭都是在“錄像廳”--呢類錄像廳基本是内地七八十後的集體回憶,佢地接觸港產片都係在錄像廳睇老翻,我記得05年時啲黑牌司機等客都是在錄像廳打發時間。10年代後慢慢成絕唱了。

    //「偉光正」的組女陳倩(衞詩雅飾)

    衞詩雅的造型又是一絕,我第一眼都認唔出佢係衞詩雅...另外留意在警署答數學題一幕,睇咀型佢應該係講普通話的!(好多香港演員拍内地電影電視都會用廣東話講臺詞)

    //(點解唔可以係文娟買俾自己家裡的長輩?)

    當是文娟肯定已被起底,已清楚其長輩是否需要助聽器,如果無此需要,則肯定是買給張隼的長輩。

    //而雙方的浴巾在激烈的打鬥中都沒掉下來。

    這亦是無可奈何的事...我記得尚格云頓一幕浴室内的打鬥場面都係起晒飛脚條浴巾都唔甩

    //最後,當然要宣傳一下自90年代起,中國大陸對槍械執行嚴格管理,暴力罪案一減,是世界上最安全治安最優良的國家之一

    我反而驚訝是,原來90年代内地有如此多的特大械劫案--我一直印象是,此類悍匪只會越境做省港旗兵,因爲境内一窮二白無咩好搶也;殊不知在大陸一樣可以搶而且搶九十幾鑊都無斷正,搶現金又不需要銷庒,槍械亦可以在地取得(旗兵也不見得都在香港取軍火),甘除了香港衰左唔使判死刑外,實在想不出一定要來港做案的理由(張子強的結局是後話)。

    //只係「為了私利」去搶劫濫殺,唔會得到群眾支持幫手着草,落網風險非常之大。既然係人都知道大陸有死刑,拉到一定無好結果,老鷹幫仲咁搏為乜?

    既然事件原型也是如此,只能說“存在皆合理”,畢竟人的行爲不能完全用理性邏輯推斷。

    我記得又是04年間睇過一篇報導,話點解内地車匪路霸一定要殺人滅口,是因爲佢地下下打劫以萬計金額,別説90年代,甚至00年代初個個千零蚊人工時已經是“天文數字”,賊人認爲自己犯了滔天巨案,所以一定要斬草除根;以我所知後來學精了,搶了事主幾皮野不如醒返佢幾百做車費,博其懶得報警大事化小。

    //解款車的錢箱跌落地就打開,銀紙飛滿一地,卻沒有什麼噴顏料等防盜功能,十分落後。這是真的嗎?
    //公安出糧用現金,這又是真的嗎?
    //呢齣戲啲銀行夾萬、解款箱都好兒戲。

    這是90年代初的内地...

    //起碼有鮑起靜出色的客串,單就是幾分鐘的戲份已夠壓倒全場

    留意普通話版,吳彥祖與鮑起靜的對話都是用廣東話的;王千源進入澡堂,對鮑起靜第一句也是用半鹹淡粵語問“佢係唔係度”。吳彥祖與假扮文娟丈夫助手的部分對話,也是用廣東話。

    我開頭是睇粵語版,睇左一陣覺得格格不入就即刻轉channel。

    //另外就係經常被貼滿街招的公安文宣,由鐘誠隊長到受傷後的光華都仲 keep 住撕街招,用來暗示縱使民眾對警方「有事鍾無艷 無事夏迎春」,眾公安依然是仆心仆命為人民服務。呢個描寫就幾 okay。

    我反而覺得是彰顯對自己職業的尊重。

    //就算近年「槍械執行嚴格管理」,也偶然會繳獲重機槍,不過睇相唔知流定堅了。

    部分是五六十年代民兵仍爲合法時期的槍械。

    //我覺得吳彥祖唔喺太啱做呢個角色
    //佢個樣似海龜派多啲。

    那倒不是,我覺得佢做《旺角黑夜》個烏鼠就入形入格。

    另外推薦幾套:

    《天堂血路》
    Youtube連結是TVB授權的正規版本...這應該是TVB第一套電視電影,也是唯一套我會刻意翻睇的。

    《V.I.P.》
    無意中睇到,出奇地好睇...好少韓片會甘深入涉獵朝鮮政治和美韓關係!

    《龍虎武師》
    純推薦,因爲是documentary,it tells what it wants to tell already,也不一定要寫觀後感...不過只奇怪一套講香港電影的紀錄片連做樣在香港上下畫都無

    《天龍八部之喬峰傳》
    主要是睇甄子丹如何將其拿手暴力美學融入傳統武俠故事...但有啲喜出望外劇情也拍得不太差。

    回覆刪除
    回覆
    1. 也祝摩摩新年快樂 身壯力健 XD

      //很多内地城市保留的90年代建築已經不多,一整條街景更是難揾

      有部份場景應該係廠景搭出來(甚至我懷疑搶銀行解款車那一段都是廠景)。

      //小弟人生第一次上大陸是98年聖誕節,當時周圍物事只比片中稍為新净先進
      //錄像廳基本是内地七八十後的集體回憶

      咁我70年代細細個都返過鄉下見嫲嫲,燒炮仗過年。深圳當年的確仲係鄉村來的。

      //睇咀型佢應該係講普通話的!
      //王千源進入澡堂,對鮑起靜第一句也是用半鹹淡粵語問“佢係唔係度”。吳彥祖與假扮文娟丈夫助手的部分對話,也是用廣東話。

      我在Disney+ 睇我城話版本,全程都係譚仔口音 XD

      //我記得尚格云頓一幕浴室内的打鬥場面都係起晒飛脚條浴巾都唔甩

      應該係呢段 XD
      https://www.youtube.com/watch?v=yo3R95NaFEM

      //甘除了香港衰左唔使判死刑外,實在想不出一定要來港做案的理由
      //既然事件原型也是如此,只能說“存在皆合理”,畢竟人的行爲不能完全用理性邏輯推斷。
      //話點解内地車匪路霸一定要殺人滅口
      //搶了事主幾皮野不如醒返佢幾百做車費,博其懶得報警大事化小。

      以前無得拍片,殺人滅口好似能夠煙沒證據。現在車 cam、CCTV 成行成市,又或者被途人拍下自己犯案片段而不自知,殺人滅口只會加深自己罪責吧。又睇返好似唐山燒烤店打人事件,其中惡徒都是慣犯好似完全冇諗過會被捕咁。

      //我反而覺得是彰顯對自己職業的尊重。

      唔知點解民眾咁唔尊重公安,要公安「自強」「自己尊重自己」。

      //天堂血路 It's No Heaven
      //殺人優越權 VIP
      //龍虎武師
      //天龍八部之喬峰傳

      已入 list。另外,我在 Netflix 看過一套《邵氏拳腳王者(Iron Fists and Kung Fu Kicks)》,以白鬼角度看巷慘功夫片對歐美電影的影響,連羅芙洛都有訪問。

      刪除
    2. //《邵氏拳腳王者(Iron Fists and Kung Fu Kicks)》

      我相信《龍虎武師》講的都差不多,只是由本地動作演員同製作人角度去講而已...事實上,我認為承傳自中國戲曲武行並風行全世界的港式武打,是香港唯一「全土產」並得到全球接受的非物質文化遺產!

      丹爺都話John Wick已經學左港式製作:
      https://youtu.be/J70aBEuTJlI

      另外除左鬼佬外,憑著現丹爺得力助手、香港武師出身的㗎仔Kenji,日本亦已受影響...充斥港式武俠打鬥的浪客劍心就是Kenji做動作導演。

      刪除
    3. //我認為承傳自中國戲曲武行並風行全世界的港式武打,是香港唯一「全土產」並得到全球接受的非物質文化遺產!

      《邵氏拳腳王者(Iron Fists and Kung Fu Kicks)》裡面提及過 Break dance, hip hop, Parkour 都係受中國戲曲武行到巷式武打影響,話係純笨土非物質文化遺產絕對合理!

      //浪客劍心

      全套五集睇哂,武打場面出色!

      刪除