魔術夜崩昏

上星期五（10月6日）魔術師又發生意外，放咗工在港島區學人在室內參加某些活動（唔係「夜繽紛」），點知地濕跣腳，成個人跌咗落地，好彩今次無骨折（見《魔術師的恐懼鬥室》），「只係」頭部着地流血，當場又有救護員（？）駐足，好快便扶返起魔術師坐定定，再 call 白車送魔術師入急症室。

救護員一面幫魔術師包紮，一面戴頸套（似乎係頭部受傷的 standard procedure（SOP），唔好以為好大件事），一面就問魔術師知不知身在何方，和個人資料。又幸好魔術師只係墥親個頭當時暈咗一暈，坐定透順條氣之後已經復常精靈返哂，亦沒有嘔吐或《天若有情》式流鼻血，救護員都鬆了一口氣，上白車時已幫魔術師脫下頸套，不會太不舒服。

由於魔術師一直躺平在病床上，白車的救護員非常好服侍，一到達律敦治醫院幫魔術師過了床，又取了魔術師的身份證幫忙做登記，然後就去分流。分流區護士又再問魔術師個人資料，在何地受傷、因何事受傷等，又觀察了魔術師的傷口，最後得出個「次緊急」的排序。

估唔到正苦 App HA GO 亦即時有 update：

魔術師的病床是停泊在床邊，剛巧就有個 flowchart 顥示入院流程：

律敦治醫院真係無乜人等候診症，魔術師只係在大堂等咗個半鐘就有得見醫生（魔術師就孤身一人，由護士推病床去診症室），醫生妹妹視察了魔術師的傷口，又在傷口旁按了按，發現只係擦損了和腫起了個包，魔術師也沒有特別疼痛的地方，便安排魔術師打破傷風針加強劑（因小時候已打過破傷風針，現在只打加強劑便足夠，有效十年），再照吓電腦掃描照吓個腦有無受創，以防萬一。

於是又等咗半粒鐘去照電腦掃描，又等多半粒鐘出報告。醫生妹妹走過來話魔術師頭部無骨折無內出血，只係擦損唔使縫針，只係叫（男）護士幫忙洗吓傷口同埋噴吓噴霧膠布，再去藥房拎啲些痛藥需要時服，俾埋錢就走得。魔術師入院登記時曾被問及是否在我城出世讀書。魔術師是正宗巷男，收費便只$180，十分相宜。

醫院方面都有俾假紙，竟然係夜星期六日兩日「病假」，真係唔知好嬲定好笑。

總括來說，今次公立醫院的服務相當好，實在唔明白點解同一班人會在2019年以「罷工救人」作口號。另外，雖然能夠理解唔可以「醫錯人」，所以每「轉一次手」，包括上白車、到分流站、由護士推病床、見醫生、打破傷風針、照電腦掃描、洗傷口...等等都要問魔術師姓名、個人資料，魔術師只係輕傷神智清醒當然無問題，但如果病人已經係好唔舒服的話，仲要不停被問就只會令人感到煩躁，唔知醫管方面有無方法可以改善吓？

＊＊＊

伸延閱讀：

魔術師的恐懼鬥室