一人飯局（2023年10月）

 1. Shake Shack（金鐘店）

這晚魔術師收工忽然發牙痕想食著條，於是便去到金鐘太古廣場試吓呢間尾帝「高檔」快餐店，貪其薯條在「妄想」風評唔錯，食完行出去就有巴士返屯門也！

(圖片來源：Openrice > 餐廳 > 香港 > 金鐘 > Shake Shack (太古廣場), captured on 4 Oct 2023)

個 menu 只有雞腸，絕對係在「傷害中國人民感情」

但自助點餐機卻有中文顯示，扮洋腸扮得不夠徹底也。另外，就連「取餐 call 機」都係由客人在點餐時自助嘟埋，此真貫徹了「自助」的精神：

餐廳的另一角有餐具、調味料、醬汁、滾水等提供：

魔術師就叫左熱狗、薯條、和汽水，薯條果然相當夠水準，又熱又脆；但個熱狗就 hea 咗少少，個包軟熟係唔差的，不過條牛肉腸就比較乾身，魔術師唔係咁識欣賞：

魔術師餐單：熱狗（全天然牛肉腸，更可隨意添加生菜、蕃茄、醃青瓜或洋蔥）$36、脆波浪薯條＄29、無糖可口可樂 (大杯)＄27＝＄92

2. 羅麥記（奧海城店）

日前摩摩傳來飛鴿傳書，話奧海城羅麥記的脆皮燒雞「好X正」，推薦魔術師去試吓。

（圖片來源：摩連奴）

其實魔術師在數年前已是呢間羅麥記的脆皮燒雞鐵粉，只是疫情關係餐牌取消了燒雞，魔術師便沒有再幫襯（除了脆皮燒雞之外，呢間嘢其他食品真係麻麻地）；而且羅麥記雖然係連鎖店，但燒雞呢味嘢唔係間間都有，起碼以前在屯門 V-City 的羅麥記（現已結業）就無，所以要食最就腳都係放咗工搭黨鐵去奧海城食。

(圖片來源：Openrice > 餐廳 > 香港 > 大角咀 > 羅麥記 (奧海城2期) , captured on 5 Oct 2023)

這天魔術師便去奧海城羅麥記「碰運氣」看看有沒有脆皮燒雞吃，果然不出所料因太晏收工，去到經已售磬，唯有退而求其次叫個半隻蔥油雞：

同樣不出所料，蔥油雞只能算是不過不失，全靠醬油吊味，雞肉本身有啲乾，醬汁淋上去都救唔返，只係雞皮有啲油光而已。

捱吓捱吓，終於食完餐飯，埋單已是差不多夜晚9點，信步行出中庭，雖然播緊亞運，但只得小貓三數隻在睇直播，完全沒有夜繽紛的氣氛。

魔術師餐單：蔥油雞（半隻）套餐、送中湯，埋單＄88

3. 安安燒

魔術師都寫過幾次呢檔嘢，都算係 MK 一眾串燒食店中的好選擇。

(圖片來源：Openrice > 餐廳 > 香港 > 旺角  安安燒 (染布房街), captured on 5 Oct 2023)

記得以前8點幾去到係要等位的，一人餐隨時都要等半粒鐘等到9點先有得食；但唔知係咪因為呢幾年 MK 開多咗串燒店，搞到這天魔術師8點幾去到只見得一枱客，直接行入去坐定就有得食：

魔術師咁鐘意去呢間嘢都係因為佢啲海鮮相當齊全，有扇貝、蟶子（是日沽清）、蜆、蝦、生蠔等，要在 MK 其他串燒店搵到咁齊全的 combination 幾乎就只此一家。唯獨呢間嘢有樣唔好就係熱賣食品例如雞翼似乎係燒定先，上枱前再加熱，唔係即叫即燒。如果係旺場咁做法貨如輪轉都算可以接受，但今日無乜客燒定先就好似唔係幾好了。

魔術師餐單：燒菠蘿＄25、蒜蓉燒扇貝（4隻）$60、辣汁煮海蜆＄53、燒司華力腸＄25、燒雞中翼（3隻）＄38、燒羊肉串（2串）＄40、麻辣金菇＄40、Coke Zero一罐＄15，埋單$296

＊＊＊

伸延閱讀：

一人飯局（2023年1月至2月）

安安燒