一人飯局（2023年11月）

1. MOS Burger（屯門錦薈坊）

曾幾何時，魔術師對這間漢堡飽店的印象唔錯，除了食物質素唔錯，包裝貼心顧客食用時唔會「𢲡手唔成勢」之外，部份分店仲有特色餐單例如日式飯同埋沙律餐，即使售價比麥當當貴但以質量來說是遠勝。

(圖片來源：Openrice > 餐廳 > 香港 > 屯門 > MOS Burger, captured on 6 Nov 2023)

可惜疫情期間呢間嘢疑似晉身「黃色經濟圈」，就算當時正苦宣佈「恢復晚市堂食」（直至晚上十點），呢間連鎖店依然「軟對抗」，只係開到黃昏六點，便以店方「唔夠人手檢查安心出行」為由只做晚市外賣。魔術師都無留意呢段「軟對抗」時期維持咗幾耐，總之魔術師都係等到2022年尾先至間唔時去幫襯吓。

這天魔術師去食屯門店，當時未有夜繽紛但都開到晚上成十點都唔識收鋪，以正苦鋪天蓋地「搶人才」，照計現時人手應該較疫情時更為緊絀才對吧？果然，收銀員似是一身兼三職，又收銀又送餐又執枱，好彩都見到佢有清潔雙手，算是比較衛生。

食物水準依舊唔錯，重點依然係粟米湯。

魔術師餐單：辛味熱狗（＄26）＋田園沙律（$26）＋粟米湯（$5）+ 厚切大薯條（$0，會員積分換領）＝$57 * 95%（會同折扣）＝＄54.1。

＊＊＊

2. 牛角（屯門市廣場）

 (圖片來源：Openrice > 餐廳 > 香港 > 屯門 > 牛角日本燒肉專門店 (屯門市廣場1期), captured on 6 Nov 2023）

依家好多連鎖店都玩會員制，有得儲積分之餘，仲有會員生日優惠。就好似牛角咁，上個月魔術師生日可以儲雙倍積分，加埋仲可以用會員續期 coupon 食滿＄300慳$100，咁就無理由唔叫塊和牛嚟燒吓架！

魔術師餐單：燒菠蘿、車海老（即係蝦）2隻、香蔥牛舌（4片）、王樣！和牛，埋單扣哂所有優惠＄185.5。

＊＊＊

3. 譚仔

其實魔術師都唔係好分得清譚仔同譚仔三哥的分別，大家的米線、配菜同湯底味道都差唔多...

 (圖片來源：Openrice > 餐廳 > 香港 > 中環 > 譚仔雲南米線, captured on 6 Nov 2023）

夾硬要比的話，三哥好似係辣少少咁（所以以下米線魔術師叫多個辣椒油），同埋三哥有得由十小辣開始逐格數，譚仔就無咁細緻5小辣、3小辣咁去（魔術師都唔太記得了，畢竟好少咁叫法）；仲有就係小食系列有唔同，好似譚仔以下呢個爽辣魚皮咁，三哥就沒有了（當然也有些小食係三哥有而譚仔無的）。

Anyway, 總之譚仔同三哥都有手機 app 可以落單，而且只要用手機落單，生日月就可以享用免費飲品一杯。咁多間食店都有優惠，婆仔數嚟講一個月都慳返唔少。

魔術師餐單：酸菜米線、湖南酸辣湯底、少米走腐皮（＄37）、爽辣魚皮（＄23）、凍檸茶少甜（生日 coupon 免費）＝＄60。