一人飯局（2023年11月）第二彈

罕有地《一人飯局》一個月內竟然會有第二篇（唔知會唔會有第三篇？腦閉塞用來做「攝」稿都幾好。講飲講食啱哂巷豬 lifestyle 也。），原因只有一個！

1. 羅麥記（奧海城店）

(圖片來源：Openrice > 餐廳 > 香港 > 大角咀 > 羅麥記 (奧海城2期) , captured on 5 Oct 2023)

燈燈燈凳！這天魔術師趁罕有地少嘢做早啲放工，約晚上7:40去到奧海城羅麥記，一入門口先問定有無燒雞餐（如果沽清就掉頭走），侍應答曰：「有！」於是魔術師就終於食返餐好耐都無食過嘅脆皮燒雞套餐！

果然水準依舊，重點就係雞皮夠脆（唔食雞皮者嘥哂！），雞肉雖唔夠嫰滑（冰鮮雞係咁上下，鬼叫正苦因禽流感一役「殺雞儆巷豬」。），而且只有鼓油而沒有淮鹽，但學摩摩話齋真係「好X正！」，魔術師一人都可以清哂半隻雞！

魔術師餐單：蒜香脆皮雞（半隻）連白飯（少飯）、中湯，盛惠$118。

＊＊＊

2. 香港街頭小食風味

每逢周末，龍門居都係魔術師掃街外賣當晚餐的「飯堂」之一，但魔術師食咗咁多年，呢間又真係較少幫襯 - 唔知係咪去親都唔見有人群聚集的原因。畢竟食店無人流都唔係好兆頭：

不過這晚見到有幾條有青加巷囡聚在店外叫蠔餅食，於是魔術師使又湊趣叫咗個細份煎蠔餅。有青巷囡的先做好，中份$110都幾大份：

輪到魔術師時老板仲問要唔要芫茜，魔術師梗係話要。原來一份細嘅都幾大份，拎到返屋企仲熱熱地，不過就係油咗啲，拎咗一段路無辦法喇！

魔術師餐單：細份煎蠔餅，加芫茜，盛惠$70。

＊＊＊

3. 名點屋（屯門市廣場）

魔術師真係唔明，點解呢類 vlogger 好似唔識中文咁，明明係「名點屋」，一時就講係「名店屋」、一時就講係「明點居」(1:35-1:45)，究竟讀啱個名係咪好難？

「名點屋」又好、「名店屋」、「明點居」都好，總之魔術師如果放假訓覺訓得晏，過嚟「名點屋」來個一人飲茶午餐或下午茶都係一個好選擇：

（網上圖片）

是日叫咗個老媽子教魔術師飲食必食的蝦腸、魔術師至愛的炸雲吞、山竹牛肉，仲有金錢肚同灌湯餃搭單。食物質素相當唔錯，係個灌湯餃唔係幾夠湯，乾咗些少。

魔術師餐單：蝦腸、炸雲吞、山竹牛肉，金錢肚、灌湯餃，茶1位，下午茶有全單九折優惠，埋單$176。

＊＊＊

伸延閱讀：

活雞檔的街坊情（領展 > 社區參與 > 823 頻道 > 2021年10月）

一人飯局（2023年10月）