爽歪歪富國島（八．完）之歸途（Day 7）

唔好以為三號酒店「JM卡薩維拉度假村(JM CASAVILLA RETREAT PHU QUOC）」位置偏遠，成個錦綉花園咁就無乜人，原來住客都唔少，相信都係班志在搵個遠離煩囂的地方 hea 的洋腸洋妞居多，亞洲人面孔就比前兩個酒店少。

（網上截圖）

酒店餐廳唔大，但中西菜式不缺，早餐都食得飽嘅。食完就出泳池邊坐吓，吹吓海風。

靚姐姐早有預謀，脫去T恤短褲，原來又係三點式打底（相自肥，不公開），小手袋中又有太陽油（阿雪學唔到㗎喇），魔術師毫無準備備之下唯有陪哂太陽，靚姐姐就落水游一陣。

坐多一陣都差唔多要執嘢走，好在酒店有 late checkout。途中有個小插曲就係越南仔 bell boy 幫魔術師拎行李是出力揈個背囊，搞到右邊肩條帶扣斷咗。

不過呢啲小事魔術師都無諗住 claim 保險，事關呢啲「整得返」嘅損傷保險公司一定要魔術師又 quote 價又聖，仲要搵返當年買背着張單據，超級煩氣，又唔係賠得錢多，唔 claim 好過 claim。

Call 車到去到機場，唔好以為入境時個場咁兜踎，出境時才知個機場都幾體面。入到去都幾大有餐廳有紀念品店，麻雀雖小五臟俱全。

在候機期間，竟然有機場職員問靚姐姐係咪領隊，梗係見佢指揮伯母坐邊，魔術師又大包小包跟尾做觀音兵之過喇！

＊＊＊

伸延閱讀：

爽歪歪富國島（七）之小貓食海鮮（Day 6）