爽歪歪富國島（四）之夜遊富國大世界 Grand World Phu Quoc（Day 3）

位於富國島南部 Sunset Town 的一號酒店「希爾頓格芮精選酒店（La Festa Phu Quoc, Curio Collection by Hilton）」環境真係好得沒話說，話咁快就來到 check out 的日子，靚姐姐自然不放過機會，吃過早餐臨走前便在酒店泳游池來過下水禮，比堅尼泳衣盡顯美好身段（魔術師都算見過世面無流鼻血），可惜伯母在另一邊休息，搞到魔術師想學《精裝追女仔》馮淬帆（定荷蘭叻？）咁藉口幫手搽太陽油都唔敢...

又，原來得幾條繩綁住的比堅尼真係可以游到水又唔會甩...

又又，靚姐姐水着照當然唔會在此刊登。

Check out 後 call 車，下一站便是位於富國島北部的二號酒店「富國島海洋灣度假村（Ocean Bay Phu Quoc Resort and Spa）」，一入到去便見到全酒店是木系建築，感覺一片大自然氣息（燈都無幾枝）：

返房要搭電動車。職員帶魔術師去到一間木搭嘅「獨立屋」，要行一小段碎石路再上幾級樓梯先上到房：

打開門就係納米盤 studio flat 設計，king size 床面對露台，背後是書枱。由於屋仔位於「極低層」（事實上亦無「極高層」），只係對住啲樹，無景可言：

次所浴室就相當寬敞，仲有啲漏光的地方（即係外面可以睇到入嚟），到夜晚黑沖涼時先發覺水溫好難調較到合適。雖然個次所 style 都幾 raw，但係都有抽水馬桶嘅，水力都夠，不過就無拍照留紀錄了。

問題來了，酒店職員帶靚姐姐同伯母去到佢哋間「屋仔」，才發覺要行碎石級才到達，伯母行唔到落去（尤其是夜晚唔夠光，對老人家有一定危險性），於是要改房間。擾攘了一陣子，睇得出越南的工作效率屬於慢活型，而且無話「話頭醒尾」見到客人係老人家就馬上改房，仲要帶到去門口先發現有問題。同時亦見到呢間酒店缺乏「長者友善」的設施；而且職員的英語水平比上一間酒店差，有時還要靠 Google Translate 才可以溝通到。

搞咗一陣，酒店終於安排到一間比較容易行得到得房間給靚姐姐跟伯母安頓，時間尚早先搞定翌日行程，就係買票（兩成人，一長者）去富國島野生動物園（Vinpearl Safari, Phu Quoc）參觀；而今天就先休息一下，然後就去夜遊富國大世界（Grand World Phu Quoc）。酒店有 call 車服務，當然不能對司機的英語水平有任何期望，依然要靠偉大的谷歌翻譯器。

去到富國大世界，一落車就見到河上有「潮吹式」噴水表演：

富國大世界園區相當大，有 shopping 有表演有嘢睇有嘢玩，不過見到的「名牌」都是A貨，倒不如去坐頁多拉船仔（由於船上照片都有我們三人做模特，那就唯有一切從簡了）：

（在船上攝）

等候坐船仔期間，魔術師就跟靚姐姐一起買「啄啄啄」雪糕，一人一份（最後仲有得落手剷起），也給伯母嘗嘗：

夜晚行不了那麼多地方，玩完貢多拉船仔後便直接去食嘢。呢間打邊邊的服務員用簡單英語問了等們從哪裡來後，竟然識得用我城方言招呼！「地踎」大牌檔的員工語文能力竟然較酒店員工好，認真是怪事。

我們點了個海鮮冬蔭功火鍋、辣酒煮花螺、與及炒了個菜：

9:30pm 仲有晚晚都有嘅夜繽紛水舞間閉幕式，食到飽睇到飽先 call 車返酒店：

＊＊＊

伸延閱讀：

爽歪歪富國島（三）之富國島南部一日遊（Day 2）