積壓如山煲劇單（2025年1月）

睇咗

1. Netflix：《格林童話變奏曲（The Grimm Variations）》

CLAMP 合作企劃動畫單元劇，畫功亮麗（睇字幕竟然有國內工作室參與！），可惜只有6集。雖然是黑暗風格，但與「格林童話原裝黑暗版」無任何關係，最多只屬於 inspired by 系列。有啲故事的「原作」魔術師真係唔熟，唔太知道個「致敬位」係邊樹：

魔術師評分：75分（100分滿分）

2. Disney+：《女巫阿嘉莎（Agatha All Along）》

《溫黛與幻視（WandaVision）》衍生劇，由該劇反派角色阿嘉莎帶動，連同其他 WandaVision 臨時演員續演「未完的故事」。但成個故事劇情有點支離破碎（其實魔術師一直都唔明 Wanda 本來係因為接收了 Mind Stone 的能量而異化得到超能力，點解在 WandaVision 就將 Wanda 的力量改為魔法，進而成為 Scarlet Witch...），搞到呢個世界好似周圍都有女巫咁，話組隊就組隊。阿嘉莎同佢班隊友之前有乜故事無講、女死神的目標唔知為乜、又無講到點解會有「阿嘉莎以仔換《黑暗神書（Darkhold）》」的傳說...總之，本劇只能算係唔係太差，但都係伏伏地的 Marvel 劇。

唯一可取的是首歌《Ballad of the Witches' Road》幾好聽，夠哂洗腦：

魔術師評分：60（基本）＋5（主題曲）＝65分（100分滿分）

3. Netflix：《黑鴿（Black Doves）》

呢個間諜劇劇情緊湊，文武戲處理出色，但牽涉的案件實在太無厘頭，而且牽涉中英兩國關係，中方無可能咁好相與。女主角 Keira Christina Knightley 勁靚，衰在又要整到個男主角係 gay（夾硬搞到男女主角無感情線？），仲有女殺手二人組似係 Les，呢 part 魔術師最唔鍾意。

魔術師評分：80分（100分滿分）

4. Max：《企鵝（The Penguin）》

DC《蝙蝠俠（The Batman）》2022年版衍生劇，聚焦電影結束後，葛咸城內黑幫的權力鬥爭。劇情有板有眼，遠勝《女巫阿嘉莎（Agatha All Along）》。最大問題係魔術師分唔清啲人物樣貌、名字、同關係。大屋放煤氣死全家、企鵝被條廢老打到飛起仲可以逃得性命，呢兩場戲太夾硬嚟。

魔術師評分：75分（100分滿分）

將睇未睇

1. Disney+:《照明商店（Light Shop）》

《Moving 超異能族》作者又一力作，似乎幾好睇。

2.  Netflix：《暗夜情報員（The Night Agent)》第二季

第一季幾好睇，希望第二季唔好爛。

3. Disney+:《無限可能：假如…？（What If...?）》第三季

估唔到多元宇宙吹水動畫都可以發展到第三季。之前兩季都只係一般，只係因為睇開而睇埋最終季。

4. Apple TV+：《君主組織與神秘巨獸（Monarch: Legacy of Monsters）》

又係呢類見《XX宇宙》收得便無限伸延加油添醋的衍生劇。其實橋唔怕舊最緊要受，只要識見好就收，唔好愈寫愈過火同主線故事有犯駁就得。

5. Netflix：《W - 兩個世界（W）》

唔使講，都係睇妄民稱「顏值最顛峰時期」的韓孝周(同《Moving 超異能族》個樣都幾唔同，魔術師睇預告就覺得 Moving 時的韓孝周仲靚啲)。

6. Netflix：《諸神末日（Twilight of the Gods）》

估唔到 Zack Snyder 連動畫都玩埋，將玩到爛的題材「開新篇」，即管又睇吓好唔好睇。

7. Netflix:《星期三（Wednesday）》

魔術師第一季都未入坑，卻連第二季預告都出理，唔知幾時至有得睇，要諗吓等唔等埋一次過睇：

8. Netflix：《魷魚遊戲（Squid Game)》第二季 魔術師不嬲都唔覺第一季水準高，尤其是個主角簡直是不知所謂；第二季訪間負評「滿點」，故事講到一半，都係等墥第三季再睇。

9. Netflix:《Fubar》

久違了的大隻佬再現《幼稚園特警》式的動作喜劇，本來諗住用來攝時間，但竟然有第二季，咁就等吓先。

10. Netflix:《阿諾舒華辛力加：人生三部曲（Arnold）》 

好多人鍾意史泰龍，貪其對 Rocky 和 Rambo 不離不棄，但魔術師就鍾意大隻佬多啲，雖然佢無乜演技但木口木面就係演技，而且無 set 死角色（Terminator 除外）戲路亦較史泰龍多變（起碼以史講嘢一舊舊咁，就好難做到喜劇效果）：

11. Disney＋：《天龍八部》

CCTVB 搞咗兩對「中年好聲音」出嚟唱主題曲，又可以湊吓熱鬧睇吓完全無刪剪版係點嘅一回事。

仲有大量動畫、舊劇、紀錄片，包括 Marvel 劇、《陰屍路（The Walking Dead）》、《迷（Lost）》、《GANTZ 殺戮都市》、《二戰大事記彩色版（Greatest Events of WWII in Color）》 等...未能盡錄。

＊＊＊

期待中

暫時無。

＊＊＊

無乜期待中

1. Netflix：《殭屍校園（All of Us are Dead）》第一、二季

未入坑。如果兩季完魔術師都可以有時間就睇：

其他：《黑鏡（Black Mirror）》：因單元故事，表現飄忽，魔術師暫不評分。

＊＊＊

最後貼上魔術師的 all time favoruites 影集/動畫/單元劇/紀錄片頭十名（僅限現時在 Netflix、Disney+、及 Amazon Prime 的非電影類片種)，排名分先後：

1. Netflix:《闇（Dark）》

三季完燒腦穿越神劇，無 bug。

魔術師評分：100分（100分滿分）

1. Netflix:《魔剎（Monster）》

漫畫改編之暗黑系動畫，分鏡出色。魔術師由錄影CCTVB直至買碟二刷，同先父一齊欣賞之動畫之二（另一套就係《銀河英雄傳說》）。

魔術師評分：100分（100分滿分）

1. Netflix:《今際之國的有栖（Alice in Borderland）》

兩季完求生劇，漫畫改編。淨係睇囡囡已能完勝。

魔術師評分：100分（100分滿分）

4. Netflix：《狂賭之淵（賭ケグルイ，Kakegurui – Compulsive Gambler）》真人版 第一、二季

睇多啲濱邊美波就要睇呢套劇！顧名思義本片為漫畫真人化劇集，一眾動漫造型的「鄉下妹」上半身給你一式一樣的校服誘惑、下半身就有各式短裙仔裸足或黑絲化身賭神賭聖賭俠任君選擇，當然還少不了每次美波賭身家時的高潮樣（仲要係從不出千），與及一眾「旁白」配角的誇張對白和表情、賭局中主人翁內心戲的場景切換只會令魔術師愈看愈興奮（！），看完只能說句「鄉下妹」顏值真係無得輸，怪唔之得泡菜妹要以整型才可挽回一局。

魔術師評分：95分（100分滿分）

5. 《紙房子（Money Heist）》

知名西班牙「神劇」，五季完。雖然講到教授幾咁算無遺策，但其中靠不可預測的巧合及符碌的情況亦唔少，真係「好運好過好波」；要睇不如睇女督察（後稱里斯本(Lisbon)）的英姿、奈洛比（Nairobi）的「人事管理技巧」；及東京（Toyko）的西口西面。

魔術師評分：90分（100分滿分）

5. 《新世紀福爾摩斯（Sherlock）》

魔術師最鍾意 attention to details！

（圖片來源：BBC iPlayer: Sherlock, captured on 26 Aug 2023）

魔術師評分：90分（100分滿分）

5. Amazon Prime Video：《刺客旅館：捍衛任務世界（The Continental: From the World of John Wick）》

《殺神（John Wick）》衍生前傳劇集，講大陸飯店經理 Winston（Colin Woodell 飾）的前半生。酒店接待沙隆（Charon）讚以青年身份出現。有 John Wick 式打鬥，係幾爽幾好睇。本片仲有 Mel Gibson 參加演出。

魔術師評分：90分（100分滿分）

5. Disney+ :《Moving 超異能族》

韓孝周在本片的知性型後生至中女形象（副眼鏡幫咗大忙，做了眼鏡娘直程唔同咗樣），實在太正！

魔術師評分： 90分（100分滿分）

9. Netflix：《冥王（Pluto）》

浦澤直樹又一力作，喜歡《魔剎（Monster）》的觀眾不容錯過。劇情改編自手塚治虫的《小飛俠》篇章《地上最強的機械人》，所以有不少手塚治虫的「童真」feel，跟浦澤直樹的暗黑風有少許錯配，而且結局解畫有啲牽強，個人覺的得稍不及《魔剎》和《二十世紀少年》。故事起源於一個似曾相識的背景：中亞國家波斯王國被某自稱世界警察的國家指控藏有大殺傷力機械人，聯合國調查團發現本無此事，但戰爭經已開打，引伸出不少愛恨復仇，人類和機械人（人工智能）的包容與矛盾的故事。

魔術師評分：85分（100分滿分）

9. Netflix：《The 8 Show》

大橋類似《饑餓鬥室(El hoyo/ The Platform）》的貧富懸殊、社會階層欺壓、為金錢出賣人性、直至最底層的人發出絕望的怒吼（同時也暗示了網紅靠出位嘩眾取寵表演（飲酒飲到死？）賺打賞的畸形制度）。本片好睇過《魷魚（The Squid Game）》。 看來泡菜人民真係好壓抑，才經常有呢類的劇集、網漫流行起來。

另外，本片配樂用心（包括曾在《銀英傳》中採用過的配樂、華格納 Wagner《Ride of the Valkyries（女武神的飛行）》），值得加分。

魔術師評分：85分（基本）＋5分（配樂）＝90分（100分滿分）

11. Disney+:《美國恐佈故事（American Horry Story）》第一至十三季

季度單元故事，共用相同或類似的世界觀，追看無難度。本來係幾好睇的劇集（魔術師個人喜歡 Season 2《Asylum》、Season 1《Murder House》＋Season 3《Coven》＝Season 8《Apocalypse》），但愈拍愈頹，由第10季開始覺得有啲無厘頭，故事亦開始唔吸引，無乜新意和追看性，加上元祖演員全數退場，無哂癮，追看下去也只是情意結而已。

魔術師評分：（第1至13季平均)80分（100分滿分）

11. Netflix: 《少年法庭（Juvenile Justice）》

呢套係少有可以叫魔術師有心機追落去的韓片，有時仲深宵播放一晚追睇兩集：是關女主角的價值觀啱哂魔術師：年輕唔係大晒，對於窮兇極惡的少年犯，一定要嚴懲，否則佢地只會嘲笑法律的無能。不過，本片結局有啲不太合理，太過正能量：以結局案件的有青之殘忍性格，無可能只在女主手臂上刺一刀，而唔係割喉棄屍；肥婆部長亦不可能在庭上為其慣性草率結案而影響的受害人公開道歉吧！

魔術師評分：80分（100分滿分）

11. Disney+: 《解碼追兇（Signal）》

金憓秀實在太迷人，估唔到當時48歲的女主在過去時間線做20歲出頭的新紮師妹毫無違和感。本劇在逆轉時間線的劇本尚算講得通，但本來應該是正義化身的「電波刑警」卻有不少徇私、鶳之舉，加上個結局為了鋪下一季（結果唔成事）而寫爛咗個尾，美中不足。

魔術師評分：80分（100分滿分）

11. Netflix：《Happiness》

雖然話係喪屍劇，但係沒有一般喪屍片的壓迫感，似乎係影射新冠時泡菜政府對疫情的處理多啲。描寫人性醜惡就寫得幾「透徹」，反派角色又奸又蠢。劇情有些許 bugs，美中不足。好在有韓孝周支撐場面。

魔術師評分： 80分（100分滿分）

11. Amazon Prime Video：《死期將至（Death's Game）》

泡菜仔大學畢業後 7 年都搵唔到嘢做，投資被人呃錢，無錢交租被逼走，又自卑感作祟受靚靚女朋友（又係《超異能族 Moving》的金允貞飾演）接濟食軟飯，要自殺不特止（泡菜國的自殺率滿高的），還要將死亡看成是「低等手段」，結果便要被死神罰死完又死...當中當然又穿插了主角「間接被逼自殺」的前因後果、愛情線和親情線等。最弊就係復仇線有 bug，即使主角具有多個人世的記憶都不等於有能力去做哂呢啲人做到的事也。

魔術師評分： 80分（100分滿分）

11. Netflix：《黑鴿（Black Doves）》

呢個間諜劇劇情緊湊，文武戲處理出色，但牽涉的案件寶在太無厘頭，而且牽涉中英兩國關係，中方無可能咁好相與。女主角 Keira Christina Knightley 勁靚，衰在又要整到個男主角係 gay（夾硬搞到男女主角無感情線？），仲有女殺手二人組似係 Les，呢 part 魔術師最唔鍾意。

魔術師評分： 80分（100分滿分）