《龍在邊緣（Century of the Dragon）》：由年廿九玩到年初一

爛 gag 一則：送龍迎蛇，除夕夜梗係寫《龍（年）在邊緣》應吓景喇！

祝各位新年快樂，心想事成，財源廣進，身體健康！

＊＊＊

王志成（古天樂飾）是回黐前的尖子學警，在前事頭婆的畫像之下被阿 sir 安排在我城最有實力的黑社會洪興當臥底，目的是要令洪興及其最出位的大佬飛龍（劉德華飾）永不超生。

三年後，阿成已成功在洪興上位，成為飛龍身邊的大紅人。這天飛龍媽（鮑起靜飾）生日，因父親幫飛龍爸擋刀而成為契仔的姣婆堅（劉錫賢飾）想向飛龍的兄弟、洪興揸 fit 人豹哥（黃秋生飾）度水不果。豹哥集齊人馬要掃平另一個幫會東星的大佬高大衰（李家鼎飾）的檔口，改派在英國讚書唔成卻殺了個黑鬼而「回流」的兒子文俊（譚耀文飾）去參加飛龍媽的壽宴。豹哥在等另一名手下大頭文（尹天照飾），但原來大頭文就是豹哥身邊的臥底，阿成告別豹哥後就是跟他交換情報。大頭文當臥底五年，對自己是警是賊的身份認同有懷疑，但阿成卻很堅定。

飛龍早已金盆洗手，從商做正行，甚至怕 ICAC，拒絕派紅包賄選做鄉已完。這時洪興的另一名大佬馬王（吳志雄飾）及東星大佬花弗（龍方飾）到場，名為祝壽實質搞事（疑似送冥通作賀禮）。阿俊來到宴會，眼金金𥄫飛龍妻 Daisy（關秀媚飾）的領口。阿俊跟飛龍聚舊，講起阿俊兒時被飛龍帶上天台「放飛機」（嚇文俊掟佢落樓）的情景。這時姣婆堅跟花弗賭錢輸咗唔認數，被花弗打一身，最後由飛龍俾錢了事。

豹哥正要出發去劈友，大頭文趕來叫佢唔好去，實際上係唔想豹哥被捕。豹哥堅持親自出馬去掃高大衰的場子，埋伏一旁的高 sir（宗揚飾） 帶隊追捕；豹哥和大頭文一起逃走，結果被高 sir 開槍擊中。

花弗借故來敬酒道歉，飛龍自稱做手術割咗個膽，唔飲得酒，花弗便要要飛龍媽一起飲。Daisy 挺身而出擋酒，一口乾了，反被花弗大讚「不愧為中國城之花」。飛龍哥收到豹哥中槍入院的消息，心情大壞，趁送客時一腳將花弗踢落樓梯。

豹哥一眾手下在羈留病房前嘈嘈閉，高 sir 誰都無面俾，只容許阿豹的兒子文俊入去探望。阿豹脊椎受傷，醫生話會影響活動能力。大頭文認為自己害到豹哥中槍，而豹哥受傷後依然念着大頭文的安危，大頭文非常內疚，在夜總會借酒消愁，向志成盡訴心中情。這時在夜總會工作的志成女友昭昭（萬綺雯飾）出場。志成將大頭文帶回家，但大頭文卻成為電燈膽，阻住志成和昭昭扑嘢。

高 sir 派手下將志成鎖在次所，聲言自己現在是志成的上司，並要志成釘死飛龍，但志成認為飛龍已改邪歸正，沒有證據釘死飛龍。

洪興眾頭領要求飛龍繼承阿豹的位子，飛龍正想推卻，文俊卻以誰找到到警方臥底，誰殺到高 sir 報仇作為做洪興話事人的條件。飛龍樂得順水推舟，同意誰找出內鬼，誰就可以話事；另一方面飛龍又叫志成打探失蹤了的大頭文的消息。

大頭文向高 sir 請辭，諗住着草離開我城，但不料回家後被文俊帶隊伏擊。大頭文和兒子都被文俊及馬王殺死。文俊「探望」父親，細數阿豹以前同飛龍「打天下」，但錢就俾飛龍「搶哂」，而阿豹就連心愛的女人都讓埋俾飛龍做老婆。文俊為了「報仇」，要搶飛龍的錢和女人，更要坐上阿豹個位。阿豹在記事簿上寫了個「文」字，想知大頭文的消息；文俊告知父親大頭文已被自己所殺。文俊不斷糟質父親，又對飛龍說爸爸寫了個「文」字，懷疑大頭文是內鬼，而大頭文主動攻擊，自己被逼錯手殺死了他。病房外，文俊藉辭叔父要求，要將志成借調給他和馬王查內奸的事。志成為免飛龍難做，主動答應。

文俊、馬王、志成在夜總會會面，文俊想要志成殺高 sir，志成當然沒有應承。昭昭來找志成，馬王見到即是硬哂。飛龍跟志成玩打拳，原來飛龍去唔到五眼聯盟國家，就連灣灣都去唔到（點解？）。飛龍就好似小玄子咁懷疑身邊有臥底，而現在最信任的就是志成。志成叫飛龍提防文俊，但飛龍似乎頗為輕敵。

某日，姣婆堅自稱欠咗高大衰五十萬，又要攤大手板問契媽借錢，無錢就要契媽拎啲首飾去典押。飛龍知道了便重重的教訓了姣婆堅，洪興的人走去問東星借錢未免太無面（飛龍忽然又承認自己係洪興人？）。Daisy 來勸交仲俾飛龍鬧埋一份，好在事後飛龍以結婚戒指為證，氹返老婆。

志成將姣婆堅帶回家中，誰知肥仔窮心未盡色心又起，走去偷窺昭昭如次，結果俾昭昭追打。恚成帶姣婆堅去同高大衰講數，文俊、馬王亦在場。志成首先放代了今次飛龍會幫姣婆堅還錢，但只此一次下不為例，所以高大衰以後都唔好再借錢俾姣婆堅了。文俊宣稱飛龍話高大衰報警要 popo 拉阿豹，導致父親身受重傷。志成否認飛龍有咁講過。馬王隨即打蛇隨棍上，想高大衰交出灣仔的地盤作賠償。文俊另為搵人捉走高大衰的老婆，並賴係飛龍指使的。高大衰與洪興眾人開片，高 sir 則早已埋伏在外，趁志成逃走時將他拿下。原來飛龍以前戴上手銬都打贏高 sir，所以高 sir 處處針對飛龍，又不相信文俊才是幕後搞事的人。昭昭知道馬王和花弗到夜總會消遣，便詐醉入錯房打聽。花弗同馬王一面諗住「玩腳都可以玩成晚」，一面商量點樣捉飛龍同埋Daisy。昭昭聽了，又扮做飲醉要嘔，借機去次所逃之夭夭。

馬王和花弗買通 Daisy 幾個姐妹纏住她打牌，再安排眾手下到場抓人。昭昭前來通風報信，Daisy 果然是女中豪傑，即時發難，持刀跟昭昭殺出重圍。另一方面，高大衰信了文俊之言，以為是飛龍下命令殺他全家，於是突襲飛龍家，以串通好的姣婆堅為餌先殺飛龍保鑣阿生（李兆基飾），然後抓了飛龍媽，飛龍無奈投降。貴利高捉住飛龍，談判期間，文俊出現，承認自己才是元凶，花弗隨即槍殺高大衰。文俊稱父親同飛龍一起打江山，但飛龍就拎哂啲錢，現在文俊就要得到飛龍全副身家。文俊糟質飛龍媽，飛龍不得不承諾交出財產。

Popo 在飛龍家找到高大衰的屍體，而飛龍一家又失聯，高 sir 興奮地可以通緝飛龍，釋放了志成，唔使再靠志成做臥底找證據。志成回到家，會合 Daisy 和昭昭。Daisy 回到公司，見到文俊；文俊宣稱飛龍已將公司賣咗俾佢，又話飛龍因殺死高大衰而帶埋阿媽同阿仔着草，Daisy 不如以後就跟佢。這時志成突襲公司，與 Daisy 一起制服文俊，要他帶路去救飛龍。

花弗想虐待飛龍媽，但姣婆堅卻清醒一次，話飛龍哥已將身家轉讓俾文俊，花弗搞飛龍一家人都無用。志成脅持文俊來到，並謂文俊想夾帶私逃，馬王和花弗將分唔到錢。志成逼文俊放人，混亂間雙方展開槍戰。Daisy 駕車接應，墥死花弗。姣婆堅為保護飛龍媽與飛龍仔中槍，最後跟馬王攬炒墥向鐵枝同歸於盡。Daisy 中槍，去到半路不支，交待幾句後事便嚥了氣。

原來飛龍脫離洪興是對 Daisy 的承諾，現在妻子已去，飛龍要重出江湖了。志成向飛龍承認自己就是 popo，但飛龍以小玄子腔話一早就知志成是臥底，飛龍故意留志成在身邊是想志成幫他證閒清白。飛龍去探望豹哥，豹在記事簿上寫了個「殺」字，同意飛龍幹掉文俊。

就在文俊回到公司打開夾萬想夾帶私逃的時候，高 sir 聯同志成去拘捕文俊。文俊發難，搶槍打中高 sir，志成亦中咗兩槍，「但無大礙」。追逐間文俊上到天台，飛龍早已恭候多時。文俊以自己可以證明高大衰不是飛龍所殺，與及歸還公司作「求饒條件」，志成亦趕到不想飛龍因文俊毁了一生。飛龍聽志成勸，拋下槍；但文俊這時撿起槍想殺飛龍，志成及時開槍擊中。文俊依然扳機，但手槍並無子彈。文俊最後墮樓身亡，實現了「唔聽話就被飛龍掟落樓」的「預言」。原來飛龍早就取出了子彈，利用志成殺死文俊。飛龍最後親吻了戒指一口，施施然離去。

＊＊*

本片於1999年上映，掹車邊仲算係90年代戲，有當其時一貫的「粗疏」特質。睇返有時唔太準的維基，原來又關王精事（監製、編劇），怪唔之得女演員唔錯 - 在《𣊬間睇廣告（二十）》中摩摩提到要睇癲峰時期的萬二蚊就要睇本片。果然，圓口圓面 有啲 baby face 真係幾 cute；而且，令魔術師想不到的是，原來關秀媚都好很正。

不過王精出品，劇情預咗粗製濫造，講個故事都講唔通，或者相爛夾硬嚟：

1. 首先，在警校中派志成去做臥底的是另一位阿 sir；但由於劇情要聚焦宗楊飾演的高 sir，所以高 sir 就平白焦端用一句「原本的阿 sir 出咗事，你（志成）依家跟我」來草草交代。 

2. 飛龍究竟係味真係想脫離咗洪興，一時又好似想事不關己，一時又好似黑幫大佬。

3. 志成在茶餐廳見完阿豹，轉眼就去到戲院同大頭文交換情報，再轉眼就去到壽宴，而阿豹仲未出發...志成識𣊬間轉移？

4. 究竟飛龍同阿豹係乜嘢關係？係江湖上混的兄弟，定係同母異父？

5. 飛龍媽壽宴時的蟻員，無端端有相爛戲份，但又無下文，唔知想點。

6. 阿豹中槍後，警方放消息係話大頭文被捕，之後又在昭昭工作的夜總會出現過，點解幫會中人又會大頭文「失蹤」嘅呢？既然「失蹤」，又會咁易喺佢屋企搵到佢？

7. 阿豹係脊椎受傷，又唔係中風，點會講唔到嘢？

8. 飛龍被文俊抓到後，又係𣊬間就簽了文件，文俊𣊬間就去到公司，志成和 Daisy 又𣊬間去到公司制服文俊，返到去「藏參地點」，所有人包括姣婆堅、馬王、花弗衣着姿勢完成「連戲」，即係話咁多嘢都係一日之內發生？

9. 高 sir 成日都話飛龍係殺死高大衰的凶手，志成如何說服到高 sir 去拘捕文俊？

10. 志成中咗兩槍都好似無事咁？

11. 文俊求饒的理由都幾好笑，話自己可以證明飛龍並非殺高大衰的凶手。其實志成係飛龍身邊的臥底，又何需文俊去證明飛龍「清白」？

12. 最後在天台，飛龍枝槍係自動手槍，取下彈匣後槍膛仲有一發子彈，文俊唔會完全打唔到飛龍。

13. 飛龍在過程中都開槍打低咗幾個文俊的手下，就算無死到都係無牌管有槍械、嚴重傷人等，又點會係「清白」呢？

總括而言，本片屬於一般流水出產的臥底/江湖片，可能趁當時的《殭屍》熱（《殭屍》1998年首播，本片1999年上畫）搵來況天佑和馬小玲客串配角，演員有亮點（譚耀文都幾好，反而劉華又係一貫面孔），但其他方面，尤其是故事乏善可陳。

魔術師評分：60（基本）＋5（馬小玲、關秀媚）＝65分（100分滿分）

＊＊＊

伸延閱讀：

維基百科：龍在邊緣

𣊬間睇廣告（二十）