網購手錶開箱記（2023年3月）

魔術師返咗呢份新工半年有多，一路都唔能夠適應上司和同事的工作文化；本來返電車工返到好似劣師樓咗每字每句每個 format 樣樣都要審過，又或寫嘢間接啲要人諗吓估吓，仲事事要證據要簽名已係唔係坊間一般電車部門的作風，但係咁嚴謹事事一板一眼產品卻依然成日有 bugs 卻是奇聞。難道花超多心力時間去 mirco-management 逐份 document 去追，個個同事都好似人肉鬧鐘咁，樣樣家長式睇到實都係做唔到個品質出嚟？公司咁嘅管理方法魔術師返工一定唔會有乜熱情，只能夠當係有糧單出住份糧打發日晨，俾班電車仔女激親就當係練EQ。之但係，以魔術師唔開心就會去買嘢的性格，積埋積埋來次大鳩嗚都不是奇事（見《魔術師資產配置(2023年3月結）》）。

魔術師依家手頭上有兩隻「名錶」，一隻係、江詩丹頓馬爾他系列計時碼錶（Vacheron Constantin Royal Eagle Chronograph 49145/339A-9057）係魔術師的第一隻江詩丹頓，後來唔知係咪誤將手錶放在喇叭旁邊搞到受咗磁，拎去原廠維修期間就敗了另一隻江詩丹頓縱橫四海系列兩地時間（Vacheron Constantin Overseas Dual Time 47450/B01A-9226，見《在黃Ｃ上司面前放閃》)：

（圖片來源：Horoguides > 江詩丹頓 > MALTE > 49145/339A-9057, captured on 17 Mar 2023）

（圖片來源：Horoguides > 江詩丹頓 > OVERSEAS > 47450/B01A-9226, captured on 17 Mar 2023）

個錶盒都殘殘地，遲啲換！

諗諗吓資產配置重組加埋通關可以收返啲租之下，不如由瑞士隊轉會德國隊，一於敗返高級品牌朗格錶（A. Lange & Söhne)。魔術師就覺得既然買得貴錶，就無理由買隻最無功能的陽春版，但複雜功能如萬年曆（完全不用調較日期，二月跳三月（包括閏年）自動跳轉）就一來太貴、二來萬一要調較都幾麻煩；退而求其次買隻有年曆功能（一年只需調一次日期，即二月跳去三月，其餘大小月份會自動跳轉，小月轉大月無需手動跳走31號）可以平一大截，用起來都唔錯。況且年曆功能係朗格特有而江詩丹頓沒有的產品線，就更多一個理由俾魔術師轉會喇！

朗格具有年曆功能的產品線有兩條，Saxonia（薩克森洲）系列的年曆錶於2010年發行，屬自動錶系，儲存動能為46小時；1815系列的年曆錶則於2017年發行，手動上鍊，儲存動能為72小時：

（圖片來源：朗格官網 > 朗格腕錶 > 1815腕錶系列 > 1815 ANNUAL CALENDAR, captured on 16 Mar 2023）

（圖片來源：朗格官網 > 朗格腕錶 > SAXONIA腕錶系列 > SAXONIA ANNUAL CALENDAR, captured on 16 Mar 2023）

鑑於手動上鍊一來怕唔記得每日擰幾下，隻錶停咗要較月相個滿天星就麻鬼煩；二來成日擰個錶冠容易造成損耗；三來魔術師年紀開始大眼力唔係咁好，1815 個錶盤以指針顯示日期（1-31）未免有啲「驗眼 feel」，Saxonia 的日期在12點位大大隻字就非常靚仔，錶盤擺位亦清晰簡潔；加上魔術師已經有幾隻手錶輪換，手錶唔戴都會放在錶盒自動上鏈，順理成章都係會揀返 Saxonia 系列的自動錶而唔係 1815 手動版：

（圖片來源：Horoguides > Filter 「朗格, 年曆」, captured on 16 Mar 2023）

（圖片來源：Horoguides > 朗格 > SAXONIA > 330.026, captured on 17 Mar 2023）

以上價錢係朗格在2023年3月底未加價前的價目，魔術師知道朗格現時的營銷策略已轉為一致由專門店訂貨，故早前周圍去我城的代理商問價亦不得要領，唯有問道於網上買錶平台 Chrono24。理論上唔經我城代理買的就是「水貨」，但呢類名牌都會有全球保養，只要係真品實在見唔到有問題，畢竟大把傷民「返鄉下」掃化妝品、或到法國、瑞士掃包包買名錶都係一樣「走水貨」也。

講返 Chrono24，呢個 係個類似 Amazon 的平台供全球大中小型商戶甚至乎個人客戶做手錶買賣的平台，貨品有全新有二手，最主要係提供 Buyer protection，即是中介服務幫買家 hold 住筆錢，到買家落完 order 賣家發貨，買家收到貨有14天去驗貨，確認無爛無壞無假，Chrono24 才會放錢給賣家，否則買家在14日內是可以要求退貨退款的保障；而且網購買家唔使到實體店，唔會有被賊人埋伏搶劫的風險（見伸延閱讀），加上 Chrono24 亦提供某程度上的認證與及用戶評級，將假錶或壞品的情況減到最低，所以即使上百萬我城貨幣的名錶都會在 Chrono24 有交收。 

（圖片來源：Chrono24 主頁 > Filters: A. Lange & Söhne, Only show listings from commercial dealers, Saxonia, Includes Buyer Protection, New/unworn, captured on 16 Apr 2023）

魔術師自去年底開始「貨比三家」，research 包括研究一眾賣家的網上評價，確認該賣家的實體店地址，及唔經 Chrono24 直接網購的價錢（平台費就係抽佣同提供買家保障的溢價），見到朗格 Saxonia 年曆錶的貨量遠較  1815 年曆（1815 系列畢竟是新產品線，貨量就比較多同受歡迎，看來用家都唔會覺得手動上鍊麻煩），偶爾有一兩隻 Saxonia 年曆玫瑰金版的，只上架數天便被掃走。不過咁都唔係太關魔術師事，反正玫瑰金版太過土豪 feel，魔術師戴返工都係低調啲好，呢隻白金版可以扮鋼錶（笑），配上藍色指針就 fit 哂魔術師：

魔術師在 Chrono24 提供的通訊平台上跟網店問這問那，清楚明白後再講少少價，呢間尾帝經銷商就話可以退返200元帝幣運費俾魔術師。魔術師在3月15日下單，3月20日便以 FedEx 寄到，真係快到離奇。

打開 FedEx 個盒，內有泡泡袋保護，然後係係朗格原裝盒、說明書、用來調較年月日月相的專用針（篤錶身旁邊隱藏式按鈕）、保用證、手錶本身、原裝錶帶錶扣及保護膜等：

Fedex 包裝（外）

Fedex 包裝（內）

朗格原裝盒（第一層）

朗格原裝盒（第二層）

朗格原裝盒開箱

朗格原裝說明書、保用證、針

朗格 Saxonia 年曆白金版 330.026 正面

朗格 Saxonia 年曆白金版 330.026 背面

而魔術師亦乘機走去專門店由針扣換成摺扣，咁樣戴同除錶時就唔會成日拉扯條錶帶，同埋亦減少錶帶孔洞上的損耗（所以魔術師都係鍾意鋼帶錶多啲）。同樣係白金質料，盛惠我城貨幣28,000：

魔術師唔記得影針扣的 close up，唯有借用 Chrono24 魔術師買錶時的 demo 照

在專門店換上白金摺扣後；已戴過數天，錶帶開始軟返，貼近魔術師手型

又，大額網購魔術師會用大貓 Red Card，每曆月首我城貨幣＄12,500 會回贈 4%（即$500），之後無上限回贈 1%，即一共回贈3,000多元我城貨幣；之後仲有分期計劃，12個月分期「只需」在首月俾哂全期「手績費」（語言偽術，其實即係利息）便可。好似魔術師咁35萬我城貨幣分12期還，加埋3月中買5月才開始找數，實際「息率」約為 2.6664%，淨係唔還錢住擺 Mortgage Link 都已經有賺，何況魔術師仲有「穩陣投資」可以選擇，遲啲再寫：

（圖片來源：香港滙豐 > 信用卡 > 簽賬分期計劃, captured on 16 Apr 2023）

4月份睇返官網，魔術師呢隻錶的價格依然係「去專門店查詢」，但可以作參考的 1815 年曆就加價 9.16%，相對起黨鐵，以百份比計已算「溫和」（笑）：

（圖片來源：朗格官網 > 朗格腕錶 > 1815腕錶系列 > 1815 ANNUAL CALENDAR, captured on 16 Apr 2023）

最後，就以朗格 Saxonia 年曆錶的 Youtube 片作結：

＊＊＊

伸延閱讀：

魔術師資產配置(2023年3月結）

在黃Ｃ上司面前放閃

自動手錶

四刀匪著反光衣劫尖沙咀錶行　掠總值逾千萬元名錶　據悉賊人往新界逃去 2023年03月25日

【有線新聞】尖沙咀重慶站CKE商場一間錶行遇劫，4名南亞裔男子持刀指嚇職員，搶走46隻名錶，價值約1,100萬元，消息說根據被搶走手機的GPS位置，相信匪徒往新界方向逃走。

鄰近店舖的閉路電視片段見到，4名男子身穿橙色反光衣，衣上印上「安全至上」，其中兩人戴安全帽。被劫的錶行展示櫃剩下小量手錶，有目擊者說疑犯很冷靜，附近商戶Billy：「沒有聲音、很靜，之後突然有人走出來說打劫，才知道甚麼事。有幾個人冷靜地離開（他們身穿甚麼衣服？）看得不太清楚，但是橙色的反光衣，起初不覺得有甚麼，因為這裡經常有工程，最近又有大火。」警方事後封鎖錶行調查、拍照記錄，又在店內掃指紋。

錶行在彌敦道重慶站CKE商場二樓，下午3時許，4名南亞裔匪徒持兩把30厘米長牛肉刀，入錶行指嚇職員，搶走46隻名錶、總值1,078萬元，另外劫走37,000元現金及一部手機，全程約5分鐘，之後登上私家車向連翔道逃去。消息說被搶走的手機GPS，顯示最後出現位置是連翔道漾日居附近，相信匪徒往新界方向逃走。

尖沙咀錶行劫案｜三南亞裔男子被捕　46隻共值千萬名錶仍未尋回　警：相信有更多人協助或策劃 2023年03月28日

【有線新聞】尖沙咀樓上錶行上周六的劫案，警方至今拘捕三名南亞裔男子，尋回兩輛涉案私家車，相信除當日四名匪徒外，案件背後有其他人協助或策劃，會繼續追緝。

案發在上星期六下午大約三時半，重慶站CKE商場一間錶行被四名男子持刀行劫。警方至今拘捕三人，年齡30至43歲。其中一個印度裔男子星期一晚被捕、持有香港身份證，警方懷疑他當日有份打劫。另外兩名被捕巴基斯坦裔男子分別持身份證和行街紙。

警方說調查發現，除當日匪徒乘坐逃走的黑色七人車，案發前還有另一輛黑色私家車同行，兩輛車分別在元朗錦田和荃灣區水塘路邊尋回，正進行搜證，已經掌握部分在逃人士的身份。油尖警區助理指揮官賈錦林：「第一日（星期日）在深水埗和上水區拘捕的兩人，我們見到是當日犯案匪徒乘坐的另一輛車的車主和司機。我們深信相信背後還有其他人有份策劃持械行劫案，所以你見到被捕的不止該四人，四名匪徒除了是我們追查的一部分，背後人士也是我們追查的一部分。」

警方又說，已經尋回當日四名劫匪穿的黃色頭盔、反光衣和假髮等，會積極追查其他失物，包括被劫去、總值過千萬的46隻名錶