打開話匣

同事Ｋ在工作上時常要面對陌生既同事，佢就曾經同魔術師講過，想容易同陌生人打開話匣子，最佳的話題莫過於投資搵錢云云，因為係人都鍾意錢；魔術師聽左就暗自納悶，開口講錢埋口講錢，唔覺滿口銅臭，膚淺得交關既咩？
不過，響某些聚會裡面，真係要識同陌生人打開話吹下水，否則便會悶出鳥來．
＊＊＊
這晚，魔術師站在一旁，冷眼旁觀，看看一干人的眾生相．
理所當然地，靚女自然多（男）人走去撘訕，這邊的「滕麗明」固然惹來不少狂蜂浪碟，那邊的「阿Ｓａ」更是令人瘋狂，情況好似真既阿Ｓａ黎左拍「阿Ｓａ真人騷」一樣，只見眾港男人人奮勇，個個爭先，真係邊個話港女無人吼，只不過好些港男都係地中有海又或者中年發福又或者兩者皆然啫．其實你地知道會唐突佳人，仲會嚇親人添架？

魔術師反而留意到一位坐在「阿Ｓａ」附近既女孩，她化著淡淡的妝，臉圓圓的，似笑非笑地看著「阿Ｓａ」被眾港男圍攻的窘態．魔術師見同是天涯淪落人，大家都係咁悶，便走過去搭下訕，原來女孩是教琴的（咁咪唔使報稅！？），閒時仲會行下山，算下命，仲要係紫微斗數添！真係開正魔術師果瓣，便由音樂行山攝影講起，同時望清佢對眼同個鼻，都幾好丫，對眼有神，鼻樑又夠挺直，嘴角笑起上來又無虎淚紋，係塊面包左少少啫．
真係爭在未睇埋掌同問八字起命盤！
呢個時候，音樂響起，魔術師往舞池一瞥，赫然見到工管班的高挑靚女同學Ｗ也在場，正被一位不知名的男子抱著纖腰，都唔知係男既唔識跳定女既唔識跳抑或係兩者都唔識，總之就尷尷尬尬地在舞池ｕｎ下ｕｎ下咁．
魔術師為免被Ｗ見到魔術師見到佢既醜態，都係躲起來再說．
＊＊＊
在歸程上，魔術師諗左一陣，遲ｄ考完試，都係要學下跳舞，同埋正正經經咁搵個老師學琴．
2008/01/10 22:46:04