由摩摩電影節之《葉問前傳》到食一個人壽司再到格價精明眼

是日睇完摩摩電影節之《葉問前傳》，基本上劇情犯駁到無倫，無乜point可寫（如果夾硬要寫就變成debug文），個製作有啲似ＣＣＴＶＢ的電視電影，唯一一讚的是武打場面幾好睇，同埋有葉準客串飾演梁壁的演出頗見驚喜；不過由黃奕飾演不惜以貞節保葉問出監的張永成就未免充滿違和感（魔術師總是聯想到黃小姐在《竊聽風雲３》的演出，與及其真人的風流事蹟）。


當然仲有樊少皇的偽文青反派演出，實在是一絕，為本片搶回不少分數，應該開一套《金山找前傳》給力王做主角才對。

＊＊＊
睇完碟有啲夜，便去屯門市中心搵嘢食，諗起日前同ＤＹ留意講起完氣，於是便去食返餐食一個人壽司做晚飯。
魔術師入坐迴轉座位，左手邊已坐了兩名港婦，以賣萌懶Ｑ的聲調跟侍應落單：「我想食～～～呢個呢個～～～嗰個嗰個～～～」、「點解你地黃埔有呢個服務，呢度無架～～～」
魔術師乜斜着眼瞧過去，坐近魔術師左手邊的是一名瘦港婦，再遠一個位是個奧米茄頭、匪姐狀的胖港婦，賣萌聲正是出於其「櫻桃小嘴」。
魔術師有點想吐，想快快點菜，誰知二婦卻是拿着本應放在魔術師面前的菜牌閒話家常憶往事，講下邊次同邊個朋友食咗乜咁。
二婦言談間，提及了瘦婦的老公和胖婦的兒子。
魔術師心想你地有大好家庭做乜兩個走出來食完氣兼玩Lady's talk。
魔術師唯有飛象過河，伸手過去右手邊那檯食客面前拿菜牌。
點過菜，好快就有得食。
「嘩！呢個湯好靚，我又要。」瘦婦用筷子指着魔術師的三文魚湯叫喚侍應。
「我想要烏冬，你要唔要加啲嘢？」胖婦問瘦婦。
「我想要個刺身。」瘦婦又用筷子指着魔術師的三色刺身說。
瘦婦的三文魚湯來了，又要了個碗，跟胖婦分甘同味。
這時魔術師的溫泉蛋來了。
魔術師敲開蛋殼，將半熟蛋打在碗內。
「嘩！個蛋好靚呀！」瘦婦又用筷子指着魔術師的溫泉蛋，胖婦更半站起來張望。
然後，就是甜品時間。
「呢個係咩嘢嚟架？」瘦婦問。
「呢個係泡芙。」胖婦答。
仆佢個街，魔術師忍在好耐先唔怒斥呢兩位港婦，知唔知人地食緊嘢時指指點點人地食緊乜係好無禮貌的事情，仲要幾乎伸埋對筷子到人地面前，真係ＫＬＭ無家教。
證明魔術師的ＥＱ大有改善。
埋單，正在想好唔好同侍應講句：「唔該你睇下有乜嘢我食咗而呢兩位小姐無叫的，幫佢地叫返份。」
最後，都係得過諗字，廢事同啲咁無家教的港豬嘈，揚長而去算了。
＊＊＊
魔術師自從返新工以來，呢幾個月飲食習慣都有所改變，開始學人在家中煮下麥皮，沖杯奶茶（老媽用開車仔紅茶來煲，魔術師偷懶就用車仔茶包，Lipton一定唔用，非常唔得），食個簡易早餐先返工。於是乎，牛奶呢樣嘢，點都唔少得。
食完壽司去「維康」，竟然親身見到以下奇景，唔係想考魔術師對格價精明眼吧？

＊＊＊
伸延閱讀：
維基百科：黃奕
摩摩電影節之《竊聽風雲３（Overheard 3）》：有為青年調理農務
奶茶呵叻