何物孖屣停？

話說魔術師在這間公司工作之來，短短數個月內已接手了好幾個智能手機應用程式（app）的項目。不過，唔好以為好好玩，原來好多客戶都只係想將公司網頁有嘅功能塞哂落去隻app裡面，真係整嚟都唔知做乜 - 如果只係想將網頁用手機上呈現的話，整個responsive layout已經得喇！

又，原來好多人係唔知User Experience (UX) 係乜，乜嘢叫做 flow，只能見實物才可以 visualise，俾個乜都無只得個「框加」嘅 wireframe 佢，係唔能夠「腦補」想像出將實際內容填入 dummy 空格內的情況，變成下下都要繪圖做layout，逐張圖換俾佢睇效果（其實成個framework從來無變過），甚至乎在layout上mockup句子，用字顏色逐個做出來俾佢選美，仲要逐個錯字執。
魔術師心想，改字改顏色你用Word或Powerpoint都做到，使鬼將句句子擺落個app嘅layout度先睇到效果?就算個layout做到100% perfect，但係去到電車部串錯字，咪又係錯！要捉就梗係捉出街件貨，捉個mockup有鬼用！
而呢啲諗法咁離奇的客戶，卻多數都係孖屣停人。

由魔術師細細個讀大學時開始，就覺得ＢＢＡ係好神秘的一個學科，讀會計大概都知讀乜，讀孖屣停就係神秘中嘅神秘：成日見班女同學着哂套裝黑絲咁，究竟上的是什麼課。
到得大咗，讀返個ＭＢＡ進修，裡面的孖屣停又係唔知教乜嘅，有啲似做branding，又有啲似係做communications，一講到科學化少少做問卷調查，統計數據等，一眾同學又係耍手擰頭，好鬼老套地話：「文科生唔識計數！」
而到咗依家呢個新科技年代，去造個app，竟然就係由呢班無abstract thinking能力，只能靠visualisation去做判斷的孖屣停人主理，梗係無腥士得嚟變咗將個網頁塞落去個app到，又要幫個app寫說明書，畫公仔畫出腸，話怕啲用家唔知道「三點」（或者係Google的「九點」）的意思係"More action"咁鬼無厘頭喇！

究竟「仆街們ＧＯ！」的意念是誰帶起的？睇怕傷港的孖屣停人都唔會知道ＡＲ（Augmented reality）係乜。
當然魔術師只係雇傭兵，最多只會彈一句「乜你用智能手機會睇說明書嘅咩？」窒下佢地就算，始終佢地係老闆，要點搞咪點搞囉，肯俾錢就得嘞。
不過睇住由呢班唔識科技的孖屣停人主理埋啲科技project，定埋啲requirements蠢到死，俾意見佢地又唔聽或者聽唔明，最後不斷地撼頸埋牆，冷眼旁觀就會發現一眾商家可能真係要學６８９咁另起爐灶搞個創科部門先有運行，否則俾班諗嘢古古怪怪又捕捉唔到科技市場脈搏的孖屣停人打骰，嗰啲公司的前途只會似咁。
好彩，一物治一物，孖屣停人都有死對頭。有些金融機構的客戶個app最後要「過compliance」，而compliance係唔會理user experience嘅，所以就將成個設計好哂的design左加一條banner「投資可升可跌」，右邊一條「基金價格過去表現只作參考」，上邊一條「吸煙危害健康」，下面一幅圖係骷髏骨...將整個諗好哂的設計破壞到美感全失，用戶一login就唔會想用。Compliance到咁嘅程度，只係倒自己公司米，唔好做生意好過了。
所以話，在香港，搞創新難（因為有創意，肯用腦思考，唔係淨係用眼睇，同夠膽運用出來的人太少），金融創新就更難（因為一出事總有刁民左賴右賴，又有唯恐天下不亂的傳霉搞大件事）。學網友話齋，深圳地鐵話起就起，我城地鐵就慢到要處理掘到的古蹟都要搞幾年；人地搞微信支付，我城就仲係攬住個曾經攞過獎的八達通當係寶。
故步自封得咁鬼勁，唔怪得班瀆派成９日叫住話要「閉關鎖國」喇。
＊＊＊
伸延閱讀：
維基百科：八達通