西半山三房劏四房

畸寶網頁大革新，樓盤傳真無再分一二三四節，要睇片請自行調較至３７：２５觀賞：

樓盤傳真 2016/10/01 2016/10/01 22:20

無懼供應多，一手成交量再創新高，豪宅盤也高價推售，但認購反應冷淡。
與其300幾萬買新盤劏房，用同一銀碼，北角區二手市場，或有更好選擇。
華置西環南里壹號，蚊型單位附設傢俬套餐，便利業主出租，估計八成買家為投資者。
600多呎三房單位，既要改為四房，也要糾正鑽石廳間隔，設計以創新概念大執位。

俊傑花園位於西半山，２０年樓齡，最近做緊約＄１８,０００一呎（２０１６年１０月１７日中原數據），即係本案的６５０呎中型單位已經叫緊過千萬。業主２００８年買入，住咗八年，兩個仔住到由訓碌架床到要分房訓，要有私淫空間以免打ＪＪ時感到尷尬，但係又要保留書房，原則三房要變四房（點解當初買入時唔考慮住到大要分房訓呢一點？），故此便委託鎢絲 sir劏一劏佢：

本案原本係鑽石廳，三房兩廁，主房和書房對面係洗手間，無套廁間隔（左上）。睇慣鎢絲 sir 表演嘅讀者，都知道佢最拿手就係扑嘢...呀，唔係，係扑爛哂間屋啲牆，重新再間過廳同房，拉過哂水電地板，順便幫個客放血（右上）。鎢絲 sir 話鑽石廳一開門就見到個廳，缺乏私穩度，於是將主人房搬出去原本個廳度（原來主人房的私穩度要比廳低），以鞋櫃做玄關（左中）；客飯廳合二為一，佔用原來個主客廁、書房、同埋條走廊（右中），主客廁搬去原來個廳，客廁在門口左手邊，減去沐浴間，淨係得個馬桶就算，唔知可唔可以算係主人房套廁（左下），個書房就係原來的主廁，細到轉個身都難（留意鎢絲 sir 右手手肘位背位的是檯燈），書香和以前的廁所味共冶一爐（右下）；而仔房就係以前仔房加主人房打通再一開二：

雖然屋主有自己揀的家品，難以配合鎢絲 sir 最拿手的鎢絲燈，但既然叫得做阿 sir，又點會放棄整色整水的機會呢？一入門口就整隻偽狩獵牛頭出嚟搵隻角篤住來人的太陽穴（左上）。廚房大致保留原狀，係鋪過哂啲磚，整埋啲凹凸紋藏油煙漬整蠱自己有排抹（右上）。最搞嘢嘅就係廚房門同客廁係用埋同一道門（左中），美其名為「慳位」，實際上係如果閂門廚房門煮飯，客廁就變「開放式廁所」；就算俾你閂到客廁門，仲要有塊磨砂可以約隱約現咁睇到你解手（右中）。天花板由得佢橫樑壓頂，鎢絲 sir 話順便用來做燈光分隔電視位和梳化（左下）。本來係書房的窗台加高，整個儲物櫃，又做埋梳化靠背（右下）：

魔術師最唔鍾意嘅就係兩間仔房要一左一右，面積一樣，設計又一樣，美其名為「公平」，實際上係無厘性格，貫徹了怪獸嘉獎怕麻煩怕阿仔投訴偏心的因循心態（左上、右上）；但話就話公平，其實魔鬼藏於細節中：由於新客廳的窗戶面積縮小了，鎢絲 sir 話為了「引入自然光」，便在兩間仔房向廳的牆身各自開了一個窗；問題就係仔２間房的窗係對廳，仔１間房的窗係對書房，實際上仔２被監視、唔睇得ＡＶ的自由度遠較仔１為細（左中）。而書房睇真啲就真係得張檯同埋一盞黑警審犯用的檯燈（右中）。主廁鏡櫃在馬桶上方，唔知點用，仲竟然用雲石做檯面，真係唔怕濕水（左下）？睇怕全屋最正常都係個花洒（右下）：

三房劏四房，咁就可以劏個客１１０萬落樓。睇返由Ｃ嬸面書提供的截圖，鎢絲 sir 作為個體戶老闆接多幾單呢類「豪客」，月入１０萬點都走唔甩。查實我城機會處處，一眾有青又點會無上流機會呢？只係睇你肯唔肯做嘅啫！