2017年3月12日 星期日

有樓萬事joke(五):有咩嘢伏好中?


真係估唔到,最後一集就係叫觀眾,唔想「中伏」,就要讀投資班!
1. 由大學拍拖到依家29歲,大學畢業兩小口「基於大家嘅背景」,都係會計師,死都要買樓的原因竟是:「結婚擺酒時俾人問起,如果自己答係租屋住,會好無面,會被人睇唔起。」買唔買,有無需要買,有乜心水想買乜,自己需要啲乜,資金有幾多,供唔供得起...呢啲都係自己嘅事,同啲三姑六婆無關,做乜係都要將感性放在理智之上?
2. 兩小口睇咗70個盤,裝潢唔夠靚(靚裝一定貴,殘裝可自己裝嘅啫),個則唔夠靚,嫌三嫌四,等樓市爆破,等低位,等最平先買,等...十九幾萬個藉口,到時真係跌到沙士價你又唔敢入或者無能力入嘅啫(會計師喎...)!基本上,呢種人升又唔敢買,跌又唔想買,亦即係永遠都買唔成!
3. 物業投資班導師帶佢地去睇盤,原來係已間咗做劏房嘅盤。當然佢地又嫌呢嫌路,又講返以前個 dream house 600幾萬,依家就700幾萬幾平...話重點係「以投資眼光去睇」,而唔係 dream 唔 dream。導師話佢地「怕輸」,其實「輸唔緊要,最緊要輸得起」...魔術師就唔同意導師所言,基本上自住樓主要應該以配合自己需要去睇,投資價值係次要,但呢啲都唔係呢對會計師拖友的問題:佢地嘅問題主要就係讀壞書,你做得會計,連市場價不因人的意志而轉移、等候的時間值及機會成本、歷史價位只是 sunk cost 等基本概念都無,只能夠話係「蠢到PK」吧?


4. 原來幾年前的盛女 Whitney 已經結咗婚,當陀住第二胎時,為咗小朋友要買樓,當時嘅老公同地產代理拍心口話做到九成按,俾完一成大訂(40萬),但結果最後上唔到會,無銀行肯做九成按,只能做到六成按,結果要撻訂(40萬)仲要賠雙倍佣...魔術師就覺得相當奇怪,乜自己買樓唔係自己去暸解同安排財務,而係走去信地代?仲有撻大訂唔係撻訂咁簡單,有可能要賠埋業主損失架喎!
5. 唔知係咪就係因為呢件事,結果前盛女就同時任老公離婚,由盛女變人妻再變單親媽,最後仲爆埋原來前夫都係經紀...呢個故事有幾成真魔術師就唔知嘞,不過都係老生常談喇,「經紀靠得住,豬乸會上樹」也。
6. 神奇地單親媽又有錢去報導投資班,物業投資導師先爆出來話:「自僱人士的收入不算是固定收入,打工的才算是固定收入。」乜呢啲咁基本的按揭知識對一般傷民來說真係咁難明?抑或只係單親媽無知?點都好喇,再一次證明,糧單真係好重要!

7. 最後係玩藝術的柒青音樂人,猛咁話錢同理想(音樂)不可並存,就係因為無錢買樓而同女朋友散咗,只能在工餘跟班 friend 一齊在街頭打 band 心理排洪,而班損友亦係認為「有樓先可以有女」云云。果然係人以群分,物以類聚,群埋班咁嘅損友,思想當然有偏差。魔術師雖然唔知道詳情,但直覺上認為唔係「有樓先可以有女」,而係你有無上進心先係問題:無論是否做音樂抑或係做其他職業都好,最緊要係你俾唔到人地(包括女朋友)睇到你有得發圍向上的決心和可能性。你做埋啲嘢都無前途的話,又憑乜嘢可以叫人同你一齊捱呢?
8. 物業投資導師又出嚟教路,叫佢出水嚟睇下樓,行動最重要,自己暸解下,唔係淨係聽人講...魔術師對此就真係無乜 comment,因為一早就慣咗,大把同學同事朋友都問魔術師投資心得,魔術師一向都唔會藏私照直講哂出嚟,反正俾佢地知道個心法又如何?呢班港豬根本就唔會有行動力去執行,連開個戶口唔去做,俾本秘笈你又如何呢?佢地註定就係一世都係係度羨慕其他人,猛咁問:「點解人地會成功?」而唔係問:「自己點解會唔成功?」
最後,個節目又要 recap 一下:
高潮女原來係咁諗:「高潮令子宮收縮,受精更加容易...」

「唔需要話男人必定有事業...佢能夠保護一個女人,就似係一個男人,而呢種「保護」就係出自自己內心,唔係出自『錢』,『錢』只係一種工具,可以一齊搵...」魔術師真係要俾個 like 呢位盛女 Inky 姐!
***
伸延閱讀:
社區法網 > 樓字買賣 > 違反買賣合約的後果
一切由糧單開始

10 則留言:

  1. //「結婚擺酒時俾人問起,如果自己答係租屋住,會好無面,會被人睇唔起。」
    //你做得會計,連市場價不因人的意志而轉移、等候的時間值及機會成本、歷史價位只是 sunk cost 等基本概念都無,只能夠話係「蠢到PK」吧?

    因為中學同學好多都讀會計,所以都接觸好多會計界人士(包括佢地的大學同學、同行等等,亦包括後來轉左去做財務管理的)。基本上佢地俾我的印象,即使無呢對拖友咁極端,但都是1)偏向世俗 2)投資計死數,例如PE和NAV。

    總的來說,就是對「現存的東西」比較執著--可能這是職業病。

    周顯大師都講過:基本上無乜投資高手是會計師來的...

    //你做埋啲嘢都無前途的話,又憑乜嘢可以叫人同你一齊捱呢?
    //魔術師真係要俾個 like 呢位盛女 Inky 姐!

    但好多巷男的心態是:要我請妳去米芝蓮固然話你現實,但妳請返我去都唔得,因為會令我自尊受損;最緊要個女仔肯同我去麥X勞。

    所以呢位盛女上次話「你無樓唔緊要,我有」其實是很扣分的--起碼在一眾傷港柒男心中。

    //猛咁問:「點解人地會成功?」而唔係問:「自己點解會唔成功?」

    最直接了當係問:「我如何會成功?」

    回覆刪除
    回覆
    1. //周顯大師都講過:基本上無乜投資高手是會計師來的...

      但有會計師會自稱係畢老弟子又開投資班呀咁...

      //對「現存的東西」比較執著--可能這是職業病。

      挑剔一輪然後no action,咁即係永遠唔使郁。少做少錯,咁唔好做會計師喇,做公墓員仲好。

      //但好多巷男的心態是:要我請妳去米芝蓮固然話你現實,但妳請返我去都唔得,因為會令我自尊受損;最緊要個女仔肯同我去麥X勞。

      我果然係只憧得「以己度人」,唔識「設身處地」站在柒青的角度想,又係死鬼老媽教落:「你咪以為人人好似你咁叻至得架!」

      //最直接了當係問:「我如何會成功?」

      朱HD會反問:「我地做乜要成功?唔成功唔死得人架!」

      刪除
    2. //有錢男/7青都唔鍾意「有本事」的女子..

      我知道柒青咁諗是因為真係聽過有柒青話:"女人都係現實,貪錢唔肯同你捱..."對方曰:"咁咪搵個有錢過你既囉!"柒青一時為之語塞,一臉不順又無可反駁...由此可知柒青係唔"lookup"有錢過自己的女的,而係要同自己同一階層又肯同自己捱既女...當然有錢過佢地既女lookup佢地與否不在佢地考慮之列.

      有錢男如果是富二代草包,的确未必搵有本事女子; 不過有身家有自信的(例如魔兄之類,嘻嘻),就唔係咁講啦.

      //只要稍為慬得理財, 咁30歲人出頭應該都有呢個資產吧?
      //「你咪以為人人好似你咁叻至得架!」

      你又嚟嘞,講真一個22歲攞十成姦窿的大學畢業生,第一份工薪水不是特別高的話,連養家其實頭三年真係所剩無幾; 職業生涯頭十年走過彎路亦可原諒,即使唔大使,加加埋埋30歲有五十萬積蓄已經還神了。

      例如小弟,都要30出頭先開始"覺醒", 不過係返去馬屎撈底層,開始知道S加兩棟是什麼...

      //朱HD會反問:「我地做乜要成功?唔成功唔死得人架!」

      如果唔干涉他人,朱HD咁問算係咁了,起碼知道自己要乜; 點都好過你d同事: 又要恨又要問自己又唔肯郁手.

      刪除
    3. //由此可知柒青係唔"lookup"有錢過自己的女的,而係要同自己同一階層又肯同自己捱既女...

      其實都係木門對木門,竹門對竹門, 大家的對象都係同 level 就最啱嘴形...

      //不過有身家有自信的(例如魔兄之類,嘻嘻),就唔係咁講啦.

      妖...

      //即使唔大使,加加埋埋30歲有五十萬積蓄已經還神了。
      //都要30出頭先開始"覺醒", 不過係返去馬屎撈底層,開始知道S加兩棟是什麼...

      咁我真係要多謝當年在置地basement 惠康話要「買樓收租」的港女同事, 令我97時便開始「覺醒」...

      //點都好過你d同事: 又要恨又要問自己又唔肯郁手.

      所以佢地都係「薯粉」, hea 下 hea 下咁就一世.

      刪除
  2. "所以呢位盛女上次話「你無樓唔緊要,我有」其實是很扣分的--起碼在一眾傷港柒男心中。"

    所以佢冇仔... (so sad)有錢男/7青都唔鍾意「有本事」的女子..

    回覆刪除
    回覆
    1. 咁呢位盛女又唔係話好「有本事」, 佢都只係買間小窩居啫, 講緊應該都只係一百幾十萬包哂首期佣金律師費印花稅等等, 只要稍為慬得理財, 咁30歲人出頭應該都有呢個資產吧?

      刪除
    2. 論相學,師兄又點睇呢幾位女士
      Inky 較為順眼。
      大X女有人造人成份,怪怪地。諗起,自己都難有高潮。
      一百零五,路姿似黄老太,嘴臉同把聲太令人衝動而想打七之。

      刪除
    3. 簡評:
      睇asset,Inky 田宅宮(眼臉位)唔錯幾闊,主有asset; 大x妹反而較窄,睇怕2000呎都係得個望字;105都有田宅, asset 應該都有啲, 但眼太細, 感情運麻麻, 怕因財失義.

      刪除
  3. 嗰位搞磚頭投資班的FCI Anthony,早幾年被爆係專搞投資班,再游說學員搞眾籌集資,夾份開公司買磚頭,然後掠眾籌合伙人水
    GW

    回覆刪除
    回覆
    1. 所謂「夾份開公司」先係伏吧?

      眾籌呢家嘢真係願者上釣, hea曾同糧油就有辦你睇.

      刪除