2018年1月4日 星期四

肥仔的最後一天

肥仔:你整親隻腳,係我第一個打嚟問候你架,我都算同你 friend 喇!
魔:...(心)我記得你想我做完手術後一個星期就跛住腳返工(見《「出咗院未呀?」》)。
肥仔:你睇唔睇英超?不如第日約出嚟睇波飲嘢?
魔:...(心)你係球迷都應該知道腿部骨折,手術後要休息幾耐掛?
肥仔:你第一日返工,我就知你有料架喇!
魔:(忍耐不住,冷冷地)你唔使咁擦鞋喎!
2017年12月29日星期五,肥仔趁最後一天工作,便請魔術師吃個下午茶。其時大部份同事包括包青天上司等都放假,只有少數同事上班,實在也沒有很多工作要做,公司內的 holiday mood 濃厚。
不過,魔術師基於我城的核心價值之一:合約精神,還是依時上班;但肥仔則是10點半才出現,然後又不知去了哪裡(人事部?),到午飯時間還沒人影,實在令人側目。
其實今日佢都仲有糧出,就算無嘢做,坐係位度上下網玩下手機照計都得掛?


***
是咁的,魔術師第一日強勢回歸返工的員工介紹時就提及了近年考到的 Project Management Professional(PMP)資格(見舊文《PMP快速攻略》),同埋「一些其他的學歷和工作經驗」,八八卦卦的肥仔於是就覺得魔術師「好勁」。
原來肥仔也具有 PMP 資格,當日就撲來問魔術師點樣賺「持績進修學分」 Professional Development Units(PDUs)來延續 PMP 資格,否則佢就無得「續牌」。
魔術師大訝:「乜你唔知可以上 webinars 賺學分嘅咩?唔使錢,登記就得。」
肥仔得知此「秘技」後,簡直係將魔術師當神咁拜。
原來一啲對自己係好簡單嘅嘢,對不問世事的伸手黨來說,簡直就如神喻。
***
又有一日,魔術師在「玩手機」時,都幾無禮貌的肥仔竟然又八八卦卦地伸頭來睇魔術師裝咗乜嘢 apps。
當時魔術師正在在 apps 睇拜仁慕尼黑(FC Bayern Munich)足球隊的消息。
「咦?乜你係拜仁 fans 嚟架?」於是呢幾個月來,肥仔 on and off 就同魔術師講起波來。
魔術師多數都係有一句沒一句的敷衍了事,但最介意的就係呢條友會偷睇人地手機,非常無品。
不過呢樣嘢,魔術師當然唔出聲喇。自己小心啲就是了。
***
早前新股熱潮,一眾同事都有談論,魔術師都有加把嘴,但「行家一開口,便知有沒有」。學士學位是讀 Finance 畢業的肥仔,當然又知道魔術師是「有料」的人。
肥仔 on and off 問下問下魔術師投資事宜,魔術師也不介意,就話自己本來是住木屋區,但憑自己努力,27歲時已儲有第一個100萬(見《第一桶金》),之後慢慢實現投資計劃,就連資產配置的原理(不是冧把或 Ticker Symbol,也不是具體操作)也告知肥仔。
「講俾你知又點,你賺到係你本事,我又唔會蝕咗去;你更加無能力『買起個市』令到我有賺。真係講咗俾你聽你都做唔到喇!」在肥仔的最後一天,魔術師一面吃着下午茶沙律一邊作出最後的忠告。
肥仔甚為沮喪:「咁又係呀。我只係個月光族。」
魔術師心中一澟,知道此人絕不可深交,只唯唯諾諾:「咁我初畢業是真係好慳架!同埋我唔玩車,嫖賭飲蕩吹我樣樣都唔好,生活好悶、毒、宅健康架!」
肥仔嘆了一口氣:「咁真係好難...」
***
在最後的下午茶中,魔術師當然扮下關心同事,問下肥仔的CV。
「我主要都係做 contract,3個月又試過,半年又試過。都好難有份長工。」肥仔好似從來唔知自己衰乜。
魔術師苦口婆心,於是就分享了為着 keep 住自己狀態同增廣見聞,又講返給現公司分手後,做幾個月兼職與及前僱傭兵公司的經歷。
「呢間僱傭兵公司只係一間SME,又細又柒,都唔知你點解 take 佢地嘅 offer!」肥仔居然聽過前僱傭兵公司的名字。
就係因為你下下要做大公司,但做嘢又唔小心無 attention to details,所以咪次次都做唔長囉!
魔術師也不說破,只微笑一下:「呢個就係點解我40幾歲就可以初步達至財務自由的原因喇!」
肥仔將魔術師當成是偶像:「你都只係大我十幾年啫...其實你都可以唔使做,咁仲使乜俾面包青天上司架喎!」
魔術師始終唔喜歡肥仔呢種「有青」式好沒來由便要跟老 seafood 抬槓的態度:「風水輪流轉,呢個世界好細架咋,好嘅關係好嘅 reference 好重要。錯就要認,打就企定。無需要下下同人撐到衡嘅!」
***
下午五點幾,肥仔要走了。由於負責 admin 的同事放假未返,本來講好魔術師會幫肥仔 keep 住部手提電腦及其他配件。誰知肥仔就咁將電腦放在枱面,就連火牛都無拔出來,就咁插在拖板吊吊揈。
魔術師見肥仔想將枱面上的電腦 「hand over」 俾自己,便問:「咦!你唔使 pack 好啲嘢先走架?」
肥仔又用懶散的態度回應:「無人會 pack 架!」
「你唔 pack 我 pack。我無你咁無手尾,廢事有嘢遺漏。」於是魔術師肥仔個位的櫃桶找出手提電腦的原裝盒,pack 好部機同火牛,連接線等,萬無一失再鎖好。
肥仔全程站在一旁,只兩手揈揈咁睇住魔術師跛下跛下咁走來走去幹活。
***
伸延閱讀:
「出咗院未呀?」
PMP快速攻略
第一桶金

35 則留言:

  1. 真係抵佢處處遭人唾棄,成個低能仔咁=.=

    回覆刪除
    回覆
    1. 最頂唔順係佢成日想同我扮熟做friend, 但又好似完全唔知自己的行為係幾咁不受歡迎。

      刪除
    2. 梗一有個係左近. 我公司有一個. 成日扮熟, 但又開口夾著脷.
      有次佢有嘢搵我問嘢. 一個電話打嚟, 開口就講:仔啊. 我想問....
      我即刻打斷佢: 你搵邊個?
      佢立時口窒窒....

      刪除
    3. //仔啊. 我想問....

      有時啲大媽/港婦真係好難頂,最近先俾條港婦激親,下星期寫。

      刪除
    4. // 有次佢有嘢搵我問嘢. 一個電話打嚟, 開口就講:仔啊. 我想問....

      唔好意思, 剛剛睇到魔魔嘅回應, 先知有幾個字唔見咗.

      佢嗰句係: freelancer仔啊, 我想問.....
      我當時打個突, 你問人嘢都可以咁無禮貌嘅?!

      刪除
    5. //freelancer仔

      D,最憎同事有名都唔叫...完全係無 business ettiqute.

      刪除
  2. 肥仔有pmp,除非古古怪怪開囗夾着脷,要搵工唔難。按理有四雞以上,肥仔因乜原因月光光。
    魔兄頓成苦海明燈,人生教練一樣。

    回覆刪除
    回覆
    1. 佢係表面正常嗰隻,照計唔會搵唔到錢,乜原因月光就唔知了。學田二少話齋,我同佢唔係好熟。

      我幾乎唔醒起有「人生教練」呢份工作! XD

      刪除
    2. 要搵工唔難,難就難在要KEEP住份工.....做親都唔長......

      刪除
    3. 好似肥仔咁炒散,可以話係無 professional expertise 可言,絶對影響career development.

      刪除
    4. //「你都只係大我十幾年啫...其實你都可以唔使做,咁仲使乜俾面包青天上司架喎!」

      真喺好笑,上司淨喺炒你肥仔嗟,其他人做得好地地有乜俾唔俾面呢?

      //肥仔因乜原因月光光

      又要loop番:唔去旅行會死㗎

      炒散好難有嗰好推薦信。得幾嗰月可以寫乜--不過呢,應徵時其他公司一睇肥仔冇份工做得長都會有D戒心喇。

      刪除
    5. 以佢咁嘅工作態度, 只會一世都係基層....同埋做咗怨婦....

      刪除
    6. //上司淨喺炒你肥仔嗟,其他人做得好地地有乜俾唔俾面呢?

      以肥仔的思維,應該覺得上司係代表剝奪佢薪金(令到佢變月光族)的元兇,所以人人得而誅之吧?

      //唔去旅行會死㗎

      佢真係問過我以前係唔係好慳,例給「唔去旅行」架!

      //應徵時其他公司一睇肥仔冇份工做得長都會有D戒心喇。

      我都有咁講過,不過肥仔自我感覺良好,認為咁唔算係 jumpy....但實際上,jump 唔 jumpy 係人地的觀感,唔係你肥仔自己說了算的!

      //只會一世都係基層....同埋做咗怨婦....

      真係唔使起命盤都可以幫佢算到命!

      刪除
  3. 我覺得佢似啲肥柒青多啲。搵白只飾演啱唔啱?

    回覆刪除
  4. 我以前係加拿大响銀行返 part time 時,一個同事講「佢可以係你 staff,亦可以係你個客,所以就算公司炒人都盡量會客客氣氣。」有為肥青有一日創業做老闆,包青天上司做佢客戶,佢一樣要睇包青天面色。

    回覆刪除
  5. 我claim睇YouTube同書儲pdu....其實好多免費方法,呢位朋友自己無諗過咋。。。

    回覆刪除
  6. 有PMP, 唔係蠢唔係懶(曾經), 就係唔抵得人地 xxxxx; 唔忿氣自己 xxxx, 好難攪, 避之則吉

    回覆刪除
    回覆
    1. 呢禾生日人係「高端有青」,又唔係搵唔到,偏偏就係自視過高,揀飲擇食,搞到憤世嫉俗。

      刪除
    2. 哩類性格,唔係有青專利,我公司一個老鬼,一樣自視過高,日日憤世嫉俗⋯⋯

      刪除
    3. //老鬼

      哈哈, 咁佢可能有啲把炮,有恃無恐.

      刪除
    4. 所有後進的都升咗職,係佢依然最低級⋯⋯

      自視高,表面有料,但一深入就錯漏百出,錯又唔認衰⋯⋯

      成日扮熟,套你講嘢,俾佢知做錯、講錯乜就大事宣傳⋯⋯

      同外人炒大鑊之後,怕有人追咎,又自稱幾咁有禮貎,但大家明明睇住佢聲大夾惡⋯⋯

      刪除
    5. 其實無得升,已經係公司對佢嘅懲罰。如果係私人公司,咁嘅環境捱到好幾年無被炒或自行求去,呢個人都算係奇耙。

      刪除
    6. 魔兄你現服務嗰間大貓,一様有好多呢D人。無他,等肥雞。

      刪除
    7. 肥仔只係三十幾歲,就算佢係長工,無耐未到佢食肥雞;就算有,隻雞都唔肥得去邊.

      刪除
  7. 祝魔術師兄及各位新年快樂、身體健康!

    回覆刪除
  8. 魔兄,請教下,有PMP 在職場有優勢嗎 ?
    Max

    回覆刪除
    回覆
    1. 依家啲商家搞 IT 嘢,多數都係 outsource 俾僱傭兵公司,所以 PMP 已經幾乎成為行內必要資格之一,可能仲要考埋 Agile / Scrum。不過人所共知,呢類 quali 都係用來粉飾窗櫥,員工 sell CV 俾公司,公司 sell 自己的 competence 俾客,到實戰當然又係另一回事。

      以我早前搵工的經驗,如果你個前一份工的 title 唔係名正言順做 PM 的話,多數會被人 challenge。呢個係轉行或「title 與工作不相稱」的朋友要考慮的事。

      刪除
  9. 魔術師兄:

    睇完你篇舊文"PMP快速攻略"後,跟住你所講的心得/提及過的免費資源去應試,結局認真温了一個多星期,很幸運地剛剛好合格了 (2 above target, 1 target, 1 need improvement, 1 below target)


    感激!

    回覆刪除
    回覆
    1. 太客氣了, 刁蟲小技而已!

      記住睇埋呢一篇, 教你點賺PDUs...
      https://magicianyang.blogspot.hk/2018/01/blog-post_4.html

      刪除
    2. 感激! 我就好似嗰個肥仔咁,當你神咁拜....

      刪除