排排坐的藝術

在疫情特別規例下，餐廳都會為堂食客人量體溫。由於魔術師基本上每天都會出外用膳至少一次，行到邊食到邊，亦即係話每日都會有人幫自己量體溫，感覺十分健康；不過，餐廳中桌子要隔１.５米、不得有多於4人同坐一桌等規例對小店茶餐廳來說真係十分「離地」：加盟外賣 app 成本又重，自家聘請外賣仔步兵成本都唔輕，堂食地方淺窄只靠薄利多銷人客流轉，實在係難以實行。有些面向外街的餐廳，便索性將桌子都「延伸」到店舖之外，叫「不得超過該處所通常座位數目的50%」之規定形同虛設。

這天就是咁的，魔術師眼見某茶餐廳店內還有吉位，但店員兀自強行將魔術師帶往店外座位跟人搭枱；本來魔術師都唔會太介意呢啲事（反而有時有啲傷民會介意陌生人來搭枱），但只見本來在座的那位阿哥早已食完，卻賴死唔走一面撩牙一面食煙...喂，阿店員哥哥，就算無疫情，你都唔係叫客人要直接面對另一位客人的二手煙迎面噴掛？
其實，一枱四人，四人同行或者係兩人兩經茶餐廳卡位多數都會係咁安排，無甚爭議：

咁，如果魔術師打單泡的話，咁會點坐好呢？

一個人坐四座位，如果你兩邊貼牆的話，坐Ｃ位就最好，自己容易出入（Ａ位出入最不便），又唔會阻住通道妨礙人家做生意（坐Ｂ位就擋住Ａ位吉位）：

咁點解魔術師唔坐Ｄ位呢？魔術師是考慮到，如果魔術師先到，後來有客人要搭枱，在限制令之下食客距離分得愈遠愈好，坐對角就最好。咁如果要新來客人一來就坐牆角，人地未要肯，間接影響了店主生意：

所以魔術師寧願坐Ｃ位，讓新來客人坐Ｂ位，再有客來打單泡就坐Ｄ，最後才坐Ａ，咁就可以幫店主 maximize 到個 profit 嘞！
不過，有一個例外，如果魔術師係約咗人的話，先到先等之下，通常都唔會背向門口自己面壁，俾到背影人地認的。到時魔術師就會坐Ａ位，方便友人見到自己，咁先至夠細心架嘛！

＊＊＊
伸延閱讀：

《2020年預防及控制疾病（規定及指示）（業務及處所）（修訂）規例》刊憲指示一：餐飲業務
有關要求包括—
(a) 餐飲處所售賣或供應食物或飲品，供在該處所內進食或飲用，則該處所內的顧客的數目，在任何時間均不得超過該處所通常座位數目的50%；
(b) 任何餐飲處所內的桌子擺放布局，須確保該處所內任何2張供顧客使用或顧客正在使用的桌子之間，最少有1.5米距離或設有某種形式的隔板作出有效分隔；
(c) 在任何餐飲處所內，不得有多於4人同坐一桌；
(d) 任何人身處任何餐飲處所內，除於在該處所內飲食時外，須一直佩戴口罩；
(e) 在容許某人進入餐飲處所前，須先為該人量度體溫；及
(f) 須在任何餐飲處所，為在該處所的人提供消毒潔手液。