魔術師資產配置（２０２０年３月結）

因疫情關係，魔術師本月各投資組合均直插無水花，認真係有今生無來世。
大洗牌後，佔第一位的竟然是複式盈富（！），收報每單位我城貨幣（下同）＄１２７.９７，較上月跌９.８２％；第二位的是大反身的商品基金（！！），收報＄１１９.３０，較上月跌６.４７％；第三位是沉船基金，收報＄１１８.３０，較上月跌１３.５７％。
強積金組合佔第五位，收報＄１１４.９０，較上月跌１０.４３％；第五位是生活基金，收報＄１１３.６８，較上月跌１２.０４％；第六位為房託組合，收報＄１０３.１２，較上月跌２８.８７％，重災區為下跌超過６０％的 New Residential Investment Corp. (NRZ.NYSE)。
合格線為債劵及現金組合，收報＄９２.２９，跌２２.１７％，重災區為各式低評級垃圾債。

金股債全線下跌，就連自住樓的銀行估價也輕微下調。本月資產淨值下跌％，收報每單位＄，唯一比較幸運的是資產淨值（身家）前一次的目標，暫時算係不幸中之大幸。呢次經驗再一次話俾魔術師要知足，花無百日紅，資產到咗某個目標之後真係要鎖定利潤，套現又好做期權都好，點都要買個保險，呢啲錢唔慳得。
本月結算魔術師資產淨值（身家）為每單位＄１３,９３４，較上月下跌１５.５４％，回復至２０１７—１８年的資產值。淨流動現金為１３２.２８％（起始日為２０１６年３月３１日），較上１下跌２０.５６％。

收息類跌幅較大，主因係魔術師硬食了 interest risk、reinvestment risk：在低息的環境下，將股息債息與及薪金儲蓄等現金流投入票息較高的低評級垃圾債及高息房託證券，企圖以較少本金的去打造較多被動收入現金流，過度集中而導致風險增加，呢一點將來要再加留意，調節返自己的要求。

暫時來看，魔術師每月收息組合包括除重災區 NRZ 大減派息９成之外，其餘房託、債劵、ETF、CEF 等均僥倖未見有違約或減派息情況（將來會否出現就仲未知）。雖然賬面值有相當程度的回落，但魔術師又無做孖展沒有補倉斬倉的壓力，資產負債依然是正值，故此暫時可以靜制動，以不變應萬變，先由小修小補做起，循序漸進減低風險，但就不用將一次過將投資組合以低價走貨同人鬥癲。
本月魔術師身家的 beta 值為０.３７，correlation 為５６.９２％，比對上月兩者皆有所上升：

講到近日的斬倉潮，其實最緊要係睇自己的客觀情況，是否真係要斬來減少風險，抑或係自己情緒不安：例如心存僥倖孖展做大咗，即使心知未到一定要斬的階段，但自己的「僥倖」一旦不存在，心中會很不好受，繼而驚慌起來。事實係事情唔發生都發生咗，最重要的是冷靜分析一下問題有幾大，想辦法解決問題，例如證券行（咁銀行呢？）會否要求加按金之類（見伸延閱讀）。
家家有本難唸的經，正如回報率係對自己交代就夠，唔需要同人比較；斬倉亦然：人地點解斬倉可能有佢地自己的原因，自己使唔使驚使唔使斬就要視乎自己的經濟能力、家庭負擔等等，例如唔好用槓桿投資收息供樓養家，錢使咗去仲話「今年輸4-5%根本用上年的息都可補返」；收息時就計槓桿後個數，市值下跌時就計槓桿前的跌幅（見伸延閱讀），亂搬龍門，自欺欺人。總次就係無需要被市場氣氛影響了自己的情緒。總之，做投資最緊要就係要夠冷靜，淡定有錢剩。
＊＊＊
伸延閱讀：
Seeking Alpha: New Residential Investment declares $0.05 dividend (Mar. 31, 2020 7:39 AM ET)
乜 sir：減息至0%後債基及美股處理手法 #2028
乜 sir：金價避險變兇險, IB隨時CALL MARGIN