思辨練習題之 debug 開班Ｌ

疫情之下，唔少工資奴無奈要加入失業大軍的行列，網上創業亦變相成為呢一班人的另類出路，而創業教練、激勵Ｃ的衍生行業亦應運而生。呢類創業教練、激勵Ｃ多數在社交平台重金賣廣告，套路就係做標題黨，以吸睛的標題引受眾睇落去，但其實成條廣告片都只係在外圍兜兜轉轉，重重覆覆、言之無物不着邊際，受眾也不知道跟這些「所謂專家」可以學到啲乜，總之個廣告就係要受眾 click link 報 course 再說。最近在 FB 常見的重度課金落廣告天王就係駱鋒（Dan Lok），而我城版就係以下呢位在 Youtube 中非常煩膠、貌似高佬廷的拜仁哥：

由於魔術師都認識唔少人（尤其是大學同學）係以教書維生，前同事博士Ｋ甚至已晉升為「人生教練」，故此魔術師對要有甚麼資格才能開拓「教育事業」甚感興趣，如果學到兩道散手學似乜 sir 咁就無死咯！
１. 窮導師、富導師

做導師，即係將自己的專業（真材實學）教俾其他人，而要證明自己有資格去教人，當然就要考牌。要做足球教練、游泳教練、體適能教練等等都要考牌考證書，依家甚至乎連人生教練都有證書可領（使唔使要好豐富人生經驗才能入學？），做導師辦教育事業真係一條財路。但更屈機的當然是做導師教人做導師，學員有乜專業知識可以教人唔係 concern，最緊要就係教學方法有效，咁就可以全球有過萬學生，搵到７,０００萬（一年？一個月？），不用再做「窮導師」鳥！不過，個 flip board 用得繁體中文寫「怎樣由『窮導師』變成...（富導師？）」，照計與會者「全球」極都有限，真係唔知車腥有幾多高足係外國學生呢？
２. 躺着也賺錢

拜仁哥話題一轉，便話「做導師開班」（乜 sir？）無鬼用，但為會受時間地域限制，十分困身（咁即係一定唔可能係要實體教班游水踢波呢類）。真正的生意係「任何時間都可以收緊錢」（被動收入？），唔使用 Zoom 教學咁 On9，只要「將生意放上網」便可以了。真係開心大發現。
其實做收租仔一樣可以在「睡覺、旅行、陪家人」時都可以收緊錢，要分散政治經濟風險又可以買大灣樓、倭國樓、米國樓、楓葉樓...等等，甚至好似最近因呃防疫基金而被捕的「劏房天王」飛哥咁，無所不用其極地去搵錢呢樣嘢傷民早就優而為之，又使乜一定要搵拜仁哥呢位導師教你點做開班呢？
３. 自我矛盾與釐清式

拜仁哥話佢個課程可以有六大重點教俾導師們，第一式就係建立 Platform，並唔係賣廣告咁簡單。但魔術師明明係見到拜仁哥呢條片係在 Youtube 以廣告形式彈出，先有興趣 drill 落去...拜仁哥咁巴閉又咁有品牌咁有國際影響力又點解唔係單靠佢個無敵 Platform 就吸到魔術師啲睛呢？
第二點講品牌又係得啖笑。運用吓李天命的思考三式：「『有國際影響力』是什麼意思？」，拜仁哥的國際影響力係咪好似侵侵咁狗噏幾句就可以搞到國際市場大升大跌呢？
４. 高大空

第三點又係自相矛盾，咩叫「自動吸客系統」呢？講就好似好勁，但事實上拜仁哥好似成條片都不斷叫人 click link take 課程，如果啲客真係自動識搵上門，就唔使「叫人 click link」，「個客應該自動被吸」、「自動 click link」囉！
第四點砌 Online Program 係魔術師唯一比較認同嘅。無論係砌網站砌網店定係賣課程，做好 user navigation，砌好個 menu、tag，分門別類，邊啲免費邊啲收錢就係成功的基礎，呢啲叫 Information Architecture。
第五點話自動收費，除非顧客真係承諾咗定時是候過數（好似 subscription fee 咁），否則未得別人同意就扣人錢隨時係違法行為。
第六點話會員制自動上課，係咪即係 Webinar？好多專業機構甚至乎流到好似 Project Management Institute（PMI）都做緊架喇！有乜咁神奇、頂級、超卓呢又？
５. 打到四分鐘前的我

魔術師第一次睇到呢到就笑咗出嚟！拜仁哥竟然話有意者要快啲 click 佢條 link，得享免費個人諮詢服務，而呢條 link 又好快 close，因為拜仁哥同埋佢班 coach 的人手有限...咦？咪住！拜仁哥在四分鐘前係呢條片的開頭咪正正話一對一教班無效率，受地域限制，唔能夠躺着也賺錢嘅？點解咁辛苦要用有限人手去做個人諮詢服務呢？叫客仔在網上上課咪得囉！客仔會自動被吸，乖乖的交費，阿拜仁哥同佢個團隊又使乜做到身水身汗呢？都唔好講阿拜仁哥你擺得出 Youtube 廣告，條 link 又點會咁易關呢？
＊＊＊
其實要點樣嘅「導師」，竟然要別人教你點樣去教人呢？呢個「導師」又邊有資格教人呢？始終「開班教人去開班」呢吓嘢非常吊詭。唔通拜仁哥準備搞間教慾大出嚟？
＊＊＊
伸延閱讀：
＊＊＊
伸延閱讀：
HKU Space：人生教練高等證書 Advanced Certificate in Life Coaching

信報　2020年9月4日
「劏房王」涉騙抗疫基金 吳龍飛稱已取消申請警方近日偵破多宗懷疑欺詐抗疫基金案件，以涉嫌欺詐及企圖欺詐罪名拘捕13男2女，其中一名被捕男子是人稱「劏房王」的吳龍飛。警方表示，涉案人士均獲准保釋候查，須在本月下旬至10月上旬往警署報到；吳龍飛昨晨於Facebook發帖證實被捕消息，稱案件已交律師處理，不便評論。
他在帖文中強調，要對個別傳媒一些錯誤報道作出澄清，「當經營事務方向改變時，我已主動通知有關部門取消申請，所以沒有取到資助。」現年40歲的吳龍飛自詡「80後樓神」，不時接受傳媒訪問和舉辦物業投資講座。他曾是自由黨黨員，惟該黨黨魁鍾國斌回應傳媒查詢時透露，吳已經退黨。
警方7月中接獲防疫抗疫基金秘書處報案，懷疑有人企圖騙取資助，商業罪案調查科經調查後，先後於上周四（8月27日）與本周二（9月1日）拘捕15人，年齡介乎31至61歲，涉提交虛假文件及資料申請防疫抗疫基金，意圖騙取共387萬元資助。