２０萬納米宮殿

４００萬買個單幢樓納米盤，１９６呎實用面積，再用２０萬裝潢，究竟女戶主使唔使練成九陽神功的縮骨功才住得落（３６：４０—４６：２９）？

樓盤傳真 2020/09/05 22:26

第三波疫情放緩，加上新盤空窗期，二手樓成交明顯以倍數回升，成交價一般比今年高位回落 1% 至 10% 之間，由於跌幅有限，投資者會尋找另類低價盤源，如「半契樓」，單位只得半份契，但可近乎半價買入，博取較高租金回報，但亦伴隨高風險。

日出康城有新盤入伙，加上終於有大型商場開幕，令區內 8 月租務成交衝上歷來最多。今集帶大家參觀的租盤正是位於日出康城的晉海II，兩房連儲物室的間隔，月租與新入伙盤 MALIBU 的兩房戶相若。

新九肚富豪·山峯慢銷分層單位，以約 2 萬元呎價出售 20 多個分層單位，驗收其中一個單位，玻璃瑕疵最嚴重，需要按標準更換 20 多塊。〈裝修解密〉正式開始髹漆！上色前要打磨、掃清牆身，調釋好油漆份量，再用適當的手法掃牆，一起跟師傅學習髹漆入門。

納米樓空間可以如何發揮？設計師利用高架床組合家具，模擬閣樓效果，又嵌入摺疊家具和儲物空間，令納米樓搖身一變成迷你宮殿。

叫人感到納悶的是，個單位明明細到好似山洞咁，做穴居人都嫌窄，但女戶主就要設計Ｃ玩宮殿 feel，係咪巷女總係有公主病？

土瓜灣迎豐，開放式「大單位」號稱實用２００呎，但減去玄關廚廁露台，就只剩１００呎（左上）。一入門口，一眼睇哂，但竟然無直衝露台，估唔到都叫合風水法度（右上）。原裝的微波爐和雪櫃在玄關的左手邊（左中），開放式廚房就在玄關的右手邊，廚房對開的白色櫃有隱藏式可延伸餐枱，與及衣櫃及全身鏡（右中、左下、右下）。咁樣佈置法可能食完飯順手可以方便女戶主從衣櫃中取出毛巾抹嘴。

行前多一步，就有兩級升高地台，設計Ｃ話可以用來放鞋（左上、右上）。再行前一步，幾乎墥親頭，原來單位上方空間間咗做床，樓下就係客廳（左中）。電視掛板貼住上閣樓床的樓梯，後方有櫃可以儲物（左中）。部電視頗大（可能係間屋細），尖角凸出於樓梯扶手之外，相當危險，住得一排唔係電視崩角就係損手爛腳（左下）。睇電視的單人梳化位比戲院最前排更近（右下），連自問鍾意睇大電視（見《嚴選影音產品（六）之弊傢伙！電視壞鬼咗！》）的魔術師都覺得唔係好掂。

單位樓底９呎，下面６呎上面只得３呎，身形嬌小的記者妹行上去都要彎腰（左上、右上），肯定不是招呼男伴的「my place」。設計Ｃ話高架床用鐵架支撐好穩陣，咁就多咗５０呎實用面積出來了（左中、右中）。床背設有燈光，但就直吹冷氣，而且床褥雖然可以放到４呎半但不可能太厚（左下、右下），否則貼住天花板訓真係人都癲。

最後，樓梯級當然能夠儲物（左上）。為了減低左收右收的納米樓與「維多利亞式宮殿」之間的違和感，設計Ｃ找來了有如肚臍餅（花占餅）粒糖一樣的時鐘（右上），法蘭西進口的花花牆紙（左下），與及跟牆紙呼應、以花瓣形態設計的天花燈（右下），整色整水。

＊＊＊

伸延閱讀：

嚴選影音產品（六）之弊傢伙！電視壞鬼咗！