醫生醫生，你幫我打針得唔得呀？

魔術師早前去睇開個醫生到覆診，順便問吓醫生打唔打得疫苗；如果打得嘅話應該打蝗針好定係「伏必太」好。醫生就話依照魔術師呢個廢中年紀，最好都係打蝗針，保護率低少少唔太緊要，最緊要係個技術係 proven 嘅，無謂試啲本來要成７年臨床數據才可通過的新技術；如果年紀大先至要大「伏必太」，皆因蝗針無乜廢老數據，而且廢老中招會好有可能有生命危險，取捨之下割可打保護率高啲嘅「伏必太」。

不過，由於屯門的正苦疫苗接種所在４月底已經打完蝗針，５月開始打「伏必太」，所以魔術師都要在私人醫務所打了。咁啱呢間醫務所每天下午才有 slot 幫病人打針，魔術師就唔會呆坐等大半天，所以都係告辭，諗住去另一間較就腳但唔係睇開的醫務所去打。

（圖片來源：2019 冠狀病毒社區疫苗接種服務社區疫苗接種中心, captured on 11 May 2021）

呢間較就腳的的醫務所屬於集團式經營，好處就係「顧客（即係病人）」的紀錄比較有條理，電腦系統比較先進，衰就衰在事事都要按規矩做，無乜位走盞。

魔術師就係後者個 case。先打去約期打針，今日約聽日有得打。去到醫務所，姑娘說明現在要打的是科興，然後便幫魔術師量血壓度心跳。雖然血壓正常，但心跳就快咗啲，仲要度咗兩次都係快，結果被個醫生 reject 咗無得打。

魔術師一向心跳都係快，唔關個姑娘索唔索事。於是都係去返睇開個醫生度打，又係今日約聽日（下午）有得打。

去到醫務所，姑娘就連血壓心跳都唔使幫魔術師量，只係說明現在打的是科興，再給魔術師簽好「生死狀」（即係清楚明白針藥的副作用），坐低休息一陣就可以打了。

都只係拮一下而已。真心唔明白打針有乜咁可怕。

打完又要休３０分鐘，跟姑娘吹水才知道原來醫務所咁多個星期以來都只係打咗４０針，並無病人有過激反應。

魔術師都係一樣。無事無幹就走得。

呢個醫健通 App 真係有啲搞笑，竟然係要魔術師手動輸入資料兼在紙版針卡上拍照，夠哂手動：

而智方便程式就好似醒啲（見《自願性監控》），真係可以下載到張電子針卡出來：

而過咗幾日，姑娘都會問吓魔術師情況如何，以免倒斃在家都無人知，算是貼心。

＊＊＊

伸延閱讀：

醫健通eHealth 手機程式

自願性監控