早前魔術師在屯門區內搭短途狗巴，手快快拎部 iPhone 就去嘟「發達通」（魔術師專門開咗一張手機版發達通用來領消費劵，見《小藍人喪跑消費劵》），說時遲那時快已嘟了一聲俾咗錢，手機馬上顯示扣賬額，竟然係原本的全程價，無咗分段收費。
魔術師一呆，望住巴士司機，話：「你收錯錢喎！」
|
| （示範圖片，並非案件重演） |
巴士司機馬上按鍵改正，只係講句：「唔好意思。」（好彩唔係「sorry 囉」）
魔術師當然唔會同司機爭拗，免生意外大攬炒；只係影低車牌和司機名字，再轉頭坐好。睇返其他排在魔術師之前上車的乘客，似乎無人知道被司機收多了錢，心想手機版發達通真的有其好處。
坐定之後心想狗巴 app 有個 tab 叫「即時對話」，只係魔術師平時只係用個 app 來看班次，無乜用過呢一個功能。在電車職業病發作之下，今次便姑且一試。
估唔到一試就通，於是魔術師就以約臨姐訪問金家朗的腔調問：「司機收多咗錢，點算？」
更估唔到的是對話方塊（更希係真人唔係 chat bot）竟然有 template 俾魔術師填，申請 refund。
雖然個版面 formatting 出哂界，相當「唔理想」，但魔術師都唔介意。幾蚊車錢事小，「公義得以彰顯」事大。
遞交了資訊之後，過幾日就有狗巴職員打嚟話處理緊，遲啲再會 call 返魔術師；又過咗成兩個星期，當魔術師都唔太記得件事的時候，竟然又收到狗巴的電話，先就司機收多咗錢致歉，又話過兩三日只要再搭狗巴嘟返同一張發達通，俾多咗嗰幾蚊就會自動 refund 返（應該都算係消費劵 refund case），全程相當有禮，服務態度良好。
只係在呢個數碼年代，仲要靠司機去人手調較分段收費，未免有啲落後，而且對其他無發現被多扣了車資的乘客不公。其實狗巴的 GPS 照計都幾準吓，點解唔自動化調較收費，又或者將「分段收費機」普及化呢？
|
| （圖片來源：九巴官網 > 最新消息 > 九巴於7月17日實施將軍澳區短途分段收費計劃 16條路線 27部拍卡機 輕鬆領取優惠, 2021-06-30） |
＊＊＊
伸延閱讀：
沒有留言:
張貼留言