反思職場話術

前幾篇講開同事光頭Ｍ的頂癮嘢，諗諗吓在呢間公司都見到幾多「話術」，隨手就拎幾個例子嚟講吓：

１. I will get back to you later

在前幾篇提及的公司同事光頭Ｍ，其職能跟魔術師一樣都係 Project Manager，一樣有 projects 要跟；不過由於佢唔追進度任由電車仔自由發揮，佢通常都唔會肯定地講明 幾時有貨交（講咗 release 又做唔到的便要孭鑊，乜都唔 firm 就係「保護自己」的技巧），結果啲 project 就好似ＭＫ條行人天橋，隨時做廿年先做得完。有時其他部門不耐煩走來追問，光頭Ｍ都會以一句「I will get back to you later」打發佢地走 — 當然呢句只會係門面話，光頭Ｍ根本就唔會跟進，唔提就唔存在，直至其他同事再追問為止。

事實上唔只光頭Ｍ，公司內唔只係從事 project management 工作，抑或係產品支援、系統分析等的同事都喜歡咁答，只有魔術師是例外 — 魔術師的回答一定是很確切的。想深一層，「I will get back to you later」同「Noted」無異，僅僅好過「已讀不回」，算是有個 acknowledgement，而實際上回應嘅人根本就唔知道答案。當然明白無人會即時可以答到所有問題，一時唔識要 study 吓亦屬正常；不過如果係有誠意回應的話，應該講明對問題的最基本分析，會同邊啲同事一起跟進，大概幾時會再有 update 等等，而唔係虛無漂渺的一句「get back later」。

遇到呢啲毫無誠意的耍人技倆，魔術師是很 piss off 的。

＊＊＊

２. 盡力即是留力

「盡做」、「盡力而為」之類的話語其實並唔只在呢間公司流行，在魔術師以前的工作機構、甚至係日常見聞好多時都會聽到。咁啱唔知點解社交平台又無故推送以下「金句」給魔術師。

魔術師雖不喜歡補習天王界的明星，但也不會因人廢言，呢位補習天后講得也是相當的好。的確，以魔術師做過咁多 projects 來說，聽到「盡做」、「盡力而為」的時候多數都係遇上不可能的任務，例如極度唔夠時間、人手、預算等，可以分期進行唔使打定輸數（「盡做」即是「 hea 做」）已是萬幸，好多時都要同老細或持分者解釋解畫。

故此除非逼不得已，「盡做」、「盡力而為」等話語都唔會出自魔術師口中，但最弊就係大部分拍檔和電車仔等都唔會對文字咁「敏感」，討論中好容易會搞到有唔好的印象。可能呢啲都算係「語言偽術」，出得嚟行點都要識少少暗黑語法吧。

＊＊＊

３. 鐵鎖橫江

丁典道：“好吧！你師父外號叫作什麼？”狄雲道：“叫作‘鐵鎖橫江’。”丁典道：“那是什麼意思？”狄雲遲疑半晌，道：“這種文縐縐的話，我原本不在懂。猜想起來，是說他老人家武功了得，善於守御，敵人攻不進他門戶的意思。”

丁典哈哈大笑，道：“小兄弟，你自己才是忠厚老實得可以。鐵鎖橫江，那是叫人上也上不得，下也下不得。老一輩的武林人物，誰不知道這個外號的含意？你師父聰明機變，厲害之極，只要是誰惹上了他，他一定挖空心思的報復，叫人好似一艘船在江心渦漩中亂轉，上也上不得，下也下不得。你如不信，將來出獄之後，盡可到外面打聽打聽。”

— 金庸《連城訣》第二章　牢獄

查實魔術師都有「鐵鎖橫江」的一面，當然唔係講緊「誰惹上了他，他一定挖空心思的報復，叫人好似一艘船在江心渦漩中亂轉，上也上不得，下也下不得」，而係如果魔術師下了決心的話，認真起來可以令對方找唔到破綻。就好似今次轉工一樣，幫魔術師搵新工的獵頭囝囝重覆不斷溫韾提示魔術師的「交足」學歷證明、工作證明（包括幾時入職幾時離職等）；因為獵頭囝囝見過唔少申請人都衰在這些文件的甩漏之上，故此千叮萬囑。點知佢講得幾講已被魔術師打斷叫佢「唔需要再提，魔術師啲文件係唔會有甩漏的」；而事實上的確如此，自從「懂事」開始（即是初小時忘帶功課被班主任用Ｑ棍篤眼），魔術師便開始接受有「Filing 達人」之稱的老媽子的地獄式訓練，基本上重要的紀錄都唔會丟失。以前用紙本紀錄都可以做到，現在有電腦、有掃描器、 有雲端備份幫忙就更加無問題。

到了要辭職時，人治部阿姐Ｄ猛咁說魔術師做到最後一日，寧願俾錢買假都唔想魔術師以有薪年假抵銷最後一個星期的工作；不過魔術師又肯定地打斷了阿姐Ｄ的說辭，頭頭是道地同佢分析魔術師早就計算好出最後一次 release; 的日子、幾時可以做完最後一次 post implementation review，到下一個 release 又相隔幾耐，時間點一個接一個，顯示返魔術師返埋最後一個星期其實都無乜意義，何不成人之美，大家好來好去，讓魔術師早點休息為返新工作準備呢（當然，無講出來的是儘快唔使見到光頭Ｍ）？阿姐Ｄ無法反駁，之能話要跟看守領隊商量一下，最後都係答應魔術師的最後工作天可以提早一個星期。

不過，睇完補習天后引述呢以上呢句，諗諗吓魔術師慣性計劃得太完美，滴水不漏，都「會給人一種得勢不饒人的壓迫感」，無咗「做錯嘢一齊補鑊」的人性和「樂趣」。似乎日後都要學習吓點樣計就計得足，但又要有時扮吓嘢有返些許甩漏，等上司、拍檔有機會抓到魔術師的錯處來顯示自己的存在感，唔會顯得自己太低能。只要甩漏只係微不足道的小錯而魔術師又做好準備補飛，咁就大家開心，有點「缺陷美」的效果比1 take 過完成可能仲好。

＊＊＊

伸延閱讀：

逆工管思維（二十六）之當我係羅拔

逆工管思維（二十五）之劣幣驅逐良幣

學師