一人讀書、全家移民

如果各位讀者記得的話，魔術師的前同事兼朋友Ｓ乃是一名典型黃色巷豬：後生時疑似讀書唔成好在有父幹可供其到楓葉國留學（唔知點解無入藉）；大學畢業就回流我城去到魔術師前公司打工，一做就成二十多年；期間魔術師雖然教過佢唔少理財知識，但由於平時就Ｓ就係一頭不理世事「睡着了的巷豬」，未結婚就只係埋首工作事宜，結咗婚生咗仔就一頭栽進「小朋友的世界」，唔使旨意佢會讀書學習為自己增值，反而思想愈來愈「小朋友」（因為湊仔要將自己投入小孩子的思維）。

到得近年老共「魔爪」逼近我城，又８３１又全面管治權又國安法，加上Ｓ老婆乃黃人一名，Ｓ自己意志不堅就自然轉黃，於是開始學人「搞移民」。魔術師對詳情都不甚了了，只知Ｓ要走去考 Java programming 之類之類（結果好似肥咗佬要 retake，足證呢條友有幾「聰明」）...魔術師再上網查找一下，見到有移民顧民公司標明呢類「楓葉國救生艇移民計劃 stream A」為「丈夫持學簽讀書，妻子申請工作簽，小孩也可申請學簽」，最高齡產婦巷豬試過去到６０歲嘅廢老「中年人」（高 IQ 前焗腸腔）都得：

（圖片來源；【 香港救生艇 】港人看準 Stream A 讀書移民 的5大優勢，需求量仍居高不下！, captured on 4 Jul 2022）

過咗幾個月，皇天不負有心人，精誠所致金石為開，月前Ｓ傳來訊息話終於拎到楓葉國的「study permit」，可以以唔知讀乜Ｑ的名義帶埋一家人去「移民」（應該唔係「移居」，因為我城屋企已被掛牌出售）。果然係「一人讀書、全家移民」。魔術師只係冷冷地恭喜便算，心諗要你進修真係難過登天，唔係楓葉國好似米帝咁有得俾你「假讀書真移民」都幾難叫係讀多個 degree（定係 diploma？） 返嚟（對話框為左Ｓ右魔，下同）：

本來魔術師都無乜興趣理呢條「已覺醒的黃人」，就連問幾時同佢餞行都廢事；點知日前Ｓ無端端又傳來訊息，問魔術師有關楓葉國的稅務事宜。魔術師一睇就怒從心中起：你當魔術師係 tax advisor 咩？乜Ｑ國家的稅務都識？故此魔術師的即時回應就係叫佢食自己，俾多啲 attention to details 去睇清楚條文再用自己的聰明才智去思考，考慮投資回報率、現金流等才決定是否參與那些勞什子的「稅務延遲計劃」，再唔係就「俾錢搵專家」搞掂：

不過，魔術師都係犯賤，過咗一陣無咁忙，得閒便上網 search 吓有關楓葉國呢個 Registered Retirement Savings Plan (RRSP)，當做是長自己知識。見到網上有個懶人包，都唔理是否食第Ｎ手飯，便掟了給Ｓ參考：

魔術師回家再細閱，先假設Ｓ去到楓葉國讀書食軟飯，老婆做工資奴，在楓國打工所得的 earned income 便可以兩公婆「共享」此等免稅優惠（有點像我城的夫婦合併報稅） — 當然前題係Ｓ的港婦老婆唔自私肯「益」老公先算。不過Ｓ就後補返佢地有「own source of income」，應該歸類唔到入打工賺取的 earned income，咁個 RRSP 對Ｓ兩公婆都好似無乜用，亦唔明既然Ｓ都好似做過基本 research，做乜咁無信心走嚟問魔術師呢個從來都無研究過楓葉國稅法的人...無理由當咗魔術師係「財演ＫＯＬ」，講嘅嘢就一定啱先得㗎！

睇返 RRSP 的概念有啲似我城的「強積金可扣稅自願性供款」，又係自己喜歡幾時供都得，供咗嘅款項可以有各種投資選項，都係有上限（２０２２：楓幣$29,210，或 earned income 的 18%，以較低者為準，遠較我城慷慨），同樣可以扣稅。但和「強積金可扣稅自願性供款」不同，RRSP 容許「市民」幾時取款都得，但就要在取款的年份入賬（連預繳稅），否則一直唔提款等到「市民」７１歲時就會撥入 Registered Retirement Income Fund（RRIF）、又或者「市民」到時可以用既定方法提取戶口款項。基本上如果是在財務自由退休後提款，即使 RRSP 戶口有賺但總體 tax bracket 不高，依然可以達至延後交稅、慳稅的目的。

魔術師都有諗過，反正長線持有盈富基金，每年沽少許將資金轉入「強積金自願供款」就可以「慳稅」，以現時每年「可扣稅自願性供款」６萬元計，１７％稅階可慳稅＄１０,２００；但投資強積金先無咗股息，又要多交基金管理費，假設合共每年「資金成本」為３％或，則 breakeven 點為 ５.６７年（=17%/3%），即係要在退休前５至６年「轉會」才叫有着數，其中也只是慳了５、６萬稅款而已。

（註：本文並非廣告，引用有關移民顧問資料純粹因為佢 summarize 得幾好。）

＊＊＊

伸延閱讀：

強制性公積金計劃管理局：強積金制度 > 自願性供款/可扣稅自願性供款

Canada.ca > Immigration and citizenship > For new immigrants > Get a permanent resident card > Understand permanent resident status

Canada.ca > Taxes > Savings and pension plans >  RRSPs and related plans > Registered Retirement Savings Plan (RRSP)

钱小移记：加拿大RRSP一篇看懂

與Ｓ對話

怒髮衝冠